<p><strong>Renault Kwid Facelift 2026:</strong> జులై 3న, మన మార్కెట్‌లో, ప్రముఖ హ్యాచ్‌బ్యాక్ క్విడ్‌కు ఫేస్‌లిఫ్ట్ వెర్షన్‌ను రెనాల్ట్ అధికారికంగా ఆవిష్కరించనుంది. ప్రస్తుతం ఈ కంపెనీ అధికారిక వివరాలను వెల్లడించకపోయినా, ఇటీవల బయటకు వచ్చిన స్పై ఫొటోలు & ఆటోమొబైల్ వర్గాల సమాచారం ప్రకారం... కొత్త క్విడ్ డిజైన్, ఇంటీరియర్ & ఫీచర్ల పరంగా గణనీయమైన మార్పులతో రానున్నట్లు తెలుస్తోంది. ముఖ్యంగా డాసియా స్ప్రింగ్ ఎలక్ట్రిక్ కారు నుంచి స్ఫూర్తి పొందిన స్టైలింగ్ ఈ మోడల్‌కు మరింత ఆకర్షణీయమైన రూపాన్ని తీసుకురానుందని అంచనా.</p>
<p><strong>కొత్త లుక్‌</strong></p>
<p>కొత్త క్విడ్ ఫేస్‌లిఫ్ట్‌లో ముందుభాగంలో Y-షేప్ LED డే టైమ్ రన్నింగ్ లైట్లు ఉండే అవకాశం ఉంది. వెనుక భాగంలో కూడా అదే డిజైన్ థీమ్‌తో కొత్త Y-షేప్ టెయిల్ ల్యాంప్స్ కనిపించనున్నాయి. అయితే ప్రధాన హెడ్‌ల్యాంప్స్ మాత్రం హాలోజన్ యూనిట్లుగానే కొనసాగే అవకాశం ఉంది. కొత్త ఫ్రంట్ & రియర్ బంపర్లు, రిఫ్రెష్ చేసిన గ్రిల్ డిజైన్, కొత్త అలాయ్ వీల్స్ కారుకు మరింత ప్రీమియం లుక్‌ను అందించనున్నాయి.</p>
<p>ఇది కూడా చదవండి: <a title="రూ.2,399కే స్మార్ట్ డ్రైవింగ్ అనుభవం - జియో కార్ సింక్ డివైస్ ప్రత్యేకతలు ఇవే!" href="https://telugu.abplive.com/auto/jio-carsync-wireless-carplay-android-auto-device-telugu-251295" target="_self">రూ.2,399కే స్మార్ట్ డ్రైవింగ్ అనుభవం - జియో కార్ సింక్ డివైస్ ప్రత్యేకతలు ఇవే!</a></p>
<p><strong>ఇంటీరియర్‌</strong></p>
<p>ఇంటీరియర్‌లో కూడా గణనీయమైన మార్పులు కనిపించే అవకాశముంది. ప్రస్తుత మోడల్‌తో పోలిస్తే మరింత పెద్దదైన దాదాపు 10 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్‌ను అందించే అవకాశం ఉంది. కొత్త స్టీరింగ్ వీల్, రీడిజైన్ చేసిన ఇన్‌స్ట్రుమెంట్ క్లస్టర్, అప్‌డేటెడ్ డ్యాష్‌బోర్డ్ డిజైన్ క్యాబిన్‌కు ఆధునిక రూపాన్ని తీసుకురానున్నాయి. మొత్తం ఇంటీరియర్ డిజైన్ కూడా డాసియా స్ప్రింగ్ నుంచి స్ఫూర్తి పొందే అవకాశముందని సమాచారం.</p>
<p><strong>ఆరు ఎయిర్‌బ్యాగ్‌లు!</strong></p>
<p>భద్రత పరంగా కూడా రెనాల్ట్ కీలక మార్పులు చేయనున్నట్లు తెలుస్తోంది. ప్రస్తుతం ఉన్న భద్రత ఫీచర్లతో పాటు ఆరు ఎయిర్‌బ్యాగ్‌లను అందించే అవకాశంపై ఆటోమొబైల్ వర్గాల్లో చర్చ జరుగుతోంది. దీంతో క్విడ్ భద్రత ప్రమాణాలు మరింత మెరుగయ్యే అవకాశం ఉంది. అయితే దీనిపై కంపెనీ నుంచి అధికారిక ప్రకటన రావాల్సి ఉంది.</p>
<p><strong>ఇంజిన్‌</strong></p>
<p>ఇంజిన్ విషయానికి వస్తే, కొత్త ఫేస్‌లిఫ్ట్‌లో ఎలాంటి మార్పులు ఉండకపోవచ్చని సమాచారం. ప్రస్తుతం ఉన్న 999cc, 1.0 లీటర్, మూడు సిలిండర్ల నేచురల్లీ ఆస్పిరేటెడ్ పెట్రోల్ ఇంజిన్‌నే కొనసాగించే అవకాశం ఉంది. ఈ ఇంజిన్ గరిష్టంగా 68 hp పవర్ & 91 Nm టార్క్‌ను ఉత్పత్తి చేస్తుంది. ట్రాన్స్‌మిషన్ ఎంపికల్లో 5-స్పీడ్ మాన్యువల్ & 5-స్పీడ్ ఏఎంటీ గేర్‌బాక్స్‌లు యథాతథంగా కొనసాగనున్నాయి.</p>
<p>ఇది కూడా చదవండి: <a title="రియల్ వరల్డ్ మైలేజ్‌లో రెనాల్ట్ డస్టర్‌కు షాక్ ఇచ్చిన స్కోడా కుషాక్!" href="https://telugu.abplive.com/auto/renault-duster-skoda-kushaq-turbo-petrol-dct-mileage-comparison-telugu-251471" target="_self">రియల్ వరల్డ్ మైలేజ్‌లో రెనాల్ట్ డస్టర్‌కు షాక్ ఇచ్చిన స్కోడా కుషాక్!</a></p>
<p><strong>మైలేజ్‌</strong></p>
<p>ప్రస్తుతం విక్రయాల్లో ఉన్న రెనాల్ట్ క్విడ్ 21.7 నుంచి 22.5 కిలోమీటర్ల వరకు మైలేజ్‌ను అందిస్తోంది. ఇందులో ఐదుగురు ప్రయాణించే సామర్థ్యం, ఐదు డోర్లు, మూడు సంవత్సరాలు లేదా లక్ష కిలోమీటర్ల వారంటీ వంటి ఫీచర్లు ఉన్నాయి. కొత్త ఫేస్‌లిఫ్ట్‌లో ఈ ప్రధాన స్పెసిఫికేషన్లు కొనసాగే అవకాశం ఉంది.</p>
<p><iframe class="vidfyVideo" style="border: 0px;" src="https://telugu.abplive.com/web-stories/auto/is-it-safe-to-charge-an-ev-in-the-rain-251746" width="631" height="381" scrolling="no"></iframe></p>
<p><strong>ధర</strong></p>
<p>ధర విషయానికి వస్తే, ప్రస్తుతం రెనాల్ట్ క్విడ్ ఎక్స్‌షోరూమ్ ధర రూ.4.30 లక్షల నుంచి రూ.5.88 లక్షల వరకు ఉంది. కొత్త డిజైన్, అదనపు ఫీచర్లు & అప్‌డేటెడ్ ఇంటీరియర్ కారణంగా ఫేస్‌లిఫ్ట్ మోడల్ ధరలో స్వల్ప పెరుగుదల ఉండే అవకాశం ఉందని మార్కెట్ వర్గాలు అంచనా వేస్తున్నాయి. అధికారిక ధరలు & పూర్తి ఫీచర్ల వివరాలు జులై 3న జరిగే లాంచ్ కార్యక్రమంలో వెల్లడికానున్నాయి. ఎంట్రీ లెవల్ హ్యాచ్‌బ్యాక్ విభాగంలో రెనాల్ట్ క్విడ్ మరోసారి వినియోగదారుల దృష్టిని ఆకర్షించే అవకాశం కనిపిస్తోంది.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
4 months ago
10 
