<p>ఇండియ‌న్ ఎగ్జిక్యూటివ్ సెడాన్ సెగ్మెంట్‌లో 2026లో భారీ మార్పులు చోటుచేసుకోనున్నాయి. ఇప్పటికే హ్యుందాయ్ వెర్నా ఫేస్‌లిఫ్ట్ మార్కెట్లోకి రాగా, ఇప్పుడు హోండా సిటీ కూడా కొత్త అవతారంలో వచ్చేందుకు సిద్ధమవుతోంది. తాజాగా బ్రెజిల్‌లో ఫుల్ క్యామోఫ్లేజ్‌తో టెస్టింగ్ చేస్తున్న హోండా సిటీ ఫేస్‌లిఫ్ట్ స్పై షాట్లు బయటకు వచ్చాయి. ఈ అప్‌డేటెడ్ మోడల్‌లో ప్రధానంగా కాస్మెటిక్ మార్పులపై కంపెనీ దృష్టి సారించినట్లు కనిపిస్తోంది.</p>
<p><strong>సరికొత్త డిజైన్ </strong><br />స్పై షాట్ల ప్రకారం, కొత్త హోండా సిటీలో రీడిజైన్ చేసిన గ్రిల్, మరింత ఆకర్షణీయమైన బంపర్ ఉండబోతున్నాయి. హెడ్‌లైట్ల డిజైన్‌ను కూడా మార్చడం వల్ల కారుకు స్పోర్టీ లుక్ వచ్చింది. ఈ మార్పులు హోండా సివిక్ (Civic) డిజైన్ నుండి ప్రేరణ పొందినట్లు అనిపిస్తోంది. కారు సైడ్ ప్రొఫైల్‌లో కొత్త డిజైన్ ఉన్న అలాయ్ వీల్స్ ఉండవచ్చని తెలుస్తోంది. వెనుక వైపు బంపర్లలో కూడా చిన్న చిన్న మార్పులు జరిగే అవకాశం ఉంది. బంపర్ డిజైన్ మారడం వల్ల కారు పొడవులో స్వల్ప తేడా ఉండవచ్చని నిపుణులు భావిస్తున్నారు.</p>
<p><strong>ఇంటీరియర్, కొత్త ఫీచర్లు</strong><br />లోపలి భాగంలో సీట్ విభాగాన్ని అప్‌డేట్ చేయనున్నారు. ఇండియాలో లాంచ్ అయ్యే 2026 మోడల్‌లో 360-డిగ్రీ కెమెరా, వెంటిలేటెడ్ సీట్లు వంటి ఫీచర్లు స్టాండర్డ్ గా వచ్చే ఛాన్స్ ఉంది. గతంలో 2023 ఫేస్‌లిఫ్ట్ సమయంలో ఇండియా, బ్రెజిల్ వెర్షన్లకు ఒకే రకమైన అప్‌డేట్స్ ఇచ్చారు. ఈసారి కూడా అదే పద్ధతిని హోండా పాటించే అవకాశం ఉంది. బ్రెజిల్‌లో ఆగస్టు 2026 నాటి ఇంటర్లాగోస్ ఫెస్టివల్‌లో దీనిని అధికారికంగా ప్రదర్శించనున్నారు.</p>
<p><strong>ఇంజిన్, పర్ఫార్మెన్స్</strong><br />మెకానికల్ పరంగా చూస్తే ఇండియా-స్పెక్ హోండా సిటీలో 1.5 లీటర్ ఐ-వీటెక్ (i-VTEC) పెట్రోల్ ఇంజిన్ కొనసాగనుంది. ఇది 121 PS శక్తిని, 145 Nm టార్క్‌ను ఉత్పత్తి చేస్తుంది. 6-స్పీడ్ మాన్యువల్ లేదా సీవీటీ (CVT) గేర్‌బాక్స్‌తో ఇది లభిస్తుంది. కారులో 8-అంగుళాల టచ్‌స్క్రీన్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, 8-స్పీకర్ల సౌండ్ సిస్టమ్ వంటి ఫీచర్లు అలాగే ఉంటాయి. లెవల్ 2 ఏడీఏఎస్ (ADAS) భద్రతా ఫీచర్లు కారుకు మరింత రక్షణ కల్పిస్తాయి. కొత్తగా రాబోతున్న స్కోడా స్లావియా, ఫోక్స్‌వ్యాగన్ వర్టస్ ఫేస్‌లిఫ్ట్‌లకు ఇది గట్టి పోటీ ఇవ్వడం ఖాయమ‌ని విశ్లేష‌కులు పేర్కొంటున్నారు.</p>
<p> </p>
3 weeks ago
4 
