<p>YS Jagan: పోలవరం ఎడమ కాలువ నీటి విడుదల విషయంలో సీఎం చంద్రబాబుపై మాజీ సీఎం, వైసీపీ అధినేత వైఎస్ జగన్ మోహన్ రెడ్డి ఎక్స్ వేదికగా విమర్శలు గుప్పించారు. "సీఎం చంద్రబాబు ఇప్పటికే ఉన్న పురుషోత్తపట్నం నుంచి, ఇప్పటికే ఉన్న పంపులతో గోదావరి నీటిని ఎత్తి, ఇప్పటికే ఉన్న పోలవరం ఎడమ కాలువలో వదిలి, దాన్ని చూపించి “పోలవరం నీళ్లు తెచ్చేశాం” అంటూ డప్పు కొట్టుకోవడం ఏంటి?" అని ప్రశ్నించారు. పోలవరం రిజర్వాయర్‌ నుంచి గ్రావిటీ ద్వారా వస్తున్న నీళ్లు ఇవి కావనీ అందరికీ తెలుసు అన్నారు. ఆ నీళ్లు పురుషోత్తపట్నం నుంచి వస్తున్నాయని, కాలువ వైయస్సార్‌ హయాంలో నిర్మించినదని, క్రెడిట్‌ కోసం చంద్రబాబు ఆరాటం పడుతున్నారన్నారు. ఇదేం మ్యాజిక్‌ అంటూ ఎద్దేవా చేశారు. </p>
<h3>పబ్లిసిటీ ఈవెంట్లు</h3>
<p>"సాగునీటి ప్రాజెక్టుల విషయంలో కూటమి ప్రభుత్వం వరుసగా చేస్తున్న పబ్లిసిటీ ఈవెంట్లన్నీ ప్రజలను మభ్యపెట్టడానికే, మొన్న వెలిగొండ, నిన్న పోలవరం ఎడమ కాలువ, ఇంకోరోజు ఇంకోటి. చంద్రబాబు మొదలుపెట్టని, మీరు పూర్తి చేయని ప్రాజెక్టులకు మీ పేరు చెప్పుకోవడం, మీ అనుకూల మీడియా భజన చేయించుకోవడం మీకు అలవాటే. ఒకవేళ అరకొర పనులు చేసినా, అవి కూడా అంచనాలు పెంచేసి దోచేయడానికే. ఏ సాగునీటి ప్రాజెక్టును తీసుకున్నా మీ నైజం ఇదే" అని వైఎస్ జగన్ విమర్శించారు. </p>
<p>పురుషోత్తపట్నం పంపుల ద్వారా విడుదల చేస్తామంటున్నది 3,500 క్యూసెక్కుల నీళ్లు, ఈ ప్రాజెక్ట్‌, ఈ పంపులు కొత్తవి కాదని జగన్ అన్నారు. ఇప్పటికే ఉన్న పంపుల నుంచి నీళ్లు వదిలి డ్రామా ఆడుతున్నారన్నారు. అసలు పోలవరం ఎడమ కాలువకు సంబంధించిన ప్రధాన పనుల్లో 79% పనులు వైయస్సార్‌ హయాంలోనే పూర్తైతే, ఇప్పుడు ఆ పనులన్నింటి మీద నిలబడి అంతా నేనే చేశా అని చెప్పుకోవడం చంద్రబాబుకే చెల్లుతుందన్నారు. <br /><br />Also Read:<a title="కల్తీ నెయ్యి కేసులో సీబీఐకి దొరికిన ఆధారాలు - టీటీడీ డిప్యూటీ ఈవో లోకనాథం అవినీతిలో సంచలన విషయాలు" href="https://telugu.abplive.com/andhra-pradesh/ttd-deputy-eo-lokanatham-arrested-by-acb-in-disproportionate-assets-case-257948" target="_self">కల్తీ నెయ్యి కేసులో సీబీఐకి దొరికిన ఆధారాలు - టీటీడీ డిప్యూటీ ఈవో లోకనాథం అవినీతిలో సంచలన విషయాలు</a></p>
<h3>పోలవరం ఎత్తు తేల్చండి</h3>
<p>పోలవరం ప్రాజెక్టు విషయంలో 2014–19 మధ్య చంద్రబాబు చేసిన డ్రామాలు, చెప్పిన అబద్ధాలు, అవినీతి, దోపిడీ రాష్ట్రానికి శాపంలా మారాయన్నది ప్రత్యేకంగా చెప్పాల్సిన పనిలేదని జగన్ విమర్శించారు. ముందుచూపు, సరైన ప్రణాళిక లేకుండా తప్పులు చేస్తే, ఆ చేసిన తప్పులను సరిదిద్దడానికి వైసీపీ ప్రభుత్వం ఐదేళ్ల పాలనలో అష్టకష్టాలు పడాల్సి వచ్చిందన్నారు. స్పిల్‌వే, కాఫర్‌ డ్యాం పనులను అరకొరగా చేసి ప్రాజెక్టును చెల్లాచెదురు చేశారన్నారు. చివరకు స్పిల్‌వేకు పనులు పూర్తికాకుండానే, నదీ ప్రవాహాన్ని డైవర్ట్‌ చేయకుండానే, మెయిన్‌డ్యాం పునాది పనుల్లో భాగమైన డయాఫ్రంవాల్‌ చేపట్టారన్నారు. చంద్రబాబు ప్రభుత్వం చేసిన తప్పుల వల్ల, ప్రాజెక్టు ఆలస్యం కావడం ఒక్కటే కాకుండా, వరదల వల్ల వచ్చిన నీరు, అప్పటికి పాక్షికంగా చేసిన స్పిల్‌వే ద్వారా డైవర్ట్‌ కాక, ఎగున అరకొరగా చేసిన కాఫర్‌ డ్యాం, ఆ గ్యాప్‌ల ద్వారా నీరు వచ్చి, మెయిన్ డ్యాం కింద పునాదులు, అంటే డయాఫ్రంవాల్‌ కొట్టుకుపోయి నష్టంకూడా జరిగిందన్నారు. సీఎం చంద్రబాబు పోలవరం విషయంలో డ్రామాలు మాని, పనులపై దృష్టిపెట్టాలన్నారు. 41.15 మీటర్లు కాకుండా, 45.72 మీటర్ల ఎత్తులో పోలవరాన్ని పూర్తిచేయాలన్నారు. దీనివల్ల పూర్తిస్థాయి స్టోరేజీ సాధ్యపడుతుందన్నారు. <br /> <br />"పోలవరం ఎత్తు సంగతి తేల్చండి చంద్రబాబు. పోలవరం FRL 45.72 మీటర్లు అయితే, నీటినిల్వను 41.15 మీటర్లకే పరిమితం చేస్తున్నారు. తాము 41.15 మీటర్ల వరకే నిధులిస్తామని కేంద్రం చెబుతోంది. మరి పూర్తి స్థాయి ప్రాజెక్టు ఎలా పూర్తవుతుంది? పూర్తి సామర్థ్యంతో నీటిని ఎలా నిల్వ చేస్తారు? నిర్వాసితులకు ప్యాకేజీ ఎప్పుడు చెల్లిస్తారు? ఈ ప్రశ్నలకు మీ సమాధానం ఏమిటి చంద్రబాబు?" అని వైఎస్ జగన్ ప్రశ్నించారు. <br /><br />Also Read: <a title="కదిరిలో పొత్తు చిచ్చు - బీజేపీ ఫ్లెక్సీల చించివేత.. ఎమ్మెల్యే కందికుంట వర్గీయులపై అనుమానాలు!" href="https://telugu.abplive.com/andhra-pradesh/kadiri-bjp-flexies-torn-tdp-kandikunta-prasad-vishnuvardhan-reddy-controversy-257941" target="_self">కదిరిలో పొత్తు చిచ్చు - బీజేపీ ఫ్లెక్సీల చించివేత.. ఎమ్మెల్యే కందికుంట వర్గీయులపై అనుమానాలు!</a></p>
<h3>ఉత్తరాంధ్ర సుజల స్రవంతి ఏమైంది? </h3>
<p>ఉత్తరాంధ్రకు గొప్ప మేలు చేసినట్టుగా మాట్లాడుతున్నారని, పురుషోత్తపట్నం పంపుల నుంచి వచ్చే నీళ్లతోనే ఉత్తరాంధ్రకు మేలు జరిగిపోతుందా? ఉత్తరాంధ్ర సుజల స్రవంతి సంగతేంటి? అని వైఎస్ <a title="జగన్" href="https://telugu.abplive.com/topic/cm-jagan" data-type="interlinkingkeywords">జగన్</a> కూటమి ప్రభుత్వాన్ని ప్రశ్నించారు. ఈ స్కీంకు వైయస్సార్‌ 2009లోనే రూ.7,214.10 కోట్ల పాలనా అనుమతి ఇస్తే, వైసీపీ ప్రభుత్వంలో మారిన ధరలు, భూసేకరణ, నిర్మాణ వ్యయాలను పరిగణనలోకి తీసుకుని 2022లో రూ.17,050.20 కోట్లకు అంచనాలను సవరించి అనుమతి ఇచ్చామన్నారు. కీలకమైన Package-1, Package-2 పనులను టెండర్లు, అగ్రిమెంట్ల దశ వరకు తీసుకెళ్లామన్నారు. భూసేకరణకు ప్రత్యేక యూనిట్లు కూడా ఏర్పాటు చేశామని గుర్తుచేశారు. కూటమి ప్రభుత్వం వచ్చాక ఉత్తరాంధ్ర సుజల స్రవంతిని ఎందుకు పట్టించుకోవడం లేదని ప్రశ్నించారు. </p>
<p>Also Read: <a title=" జనసేన ఎమ్మెల్యేకు చంద్రబాబు క్లాస్ - కూటమిలో మైక్రో మేనేజ్‌మెంట్ - ప్రమాద ఘంటికలా?" href="https://telugu.abplive.com/politics/chandrababu-class-to-janasena-mla-bommidi-nayakar-alliance-conflict-257907" target="_self"> జనసేన ఎమ్మెల్యేకు చంద్రబాబు క్లాస్ - కూటమిలో మైక్రో మేనేజ్‌మెంట్ - ప్రమాద ఘంటికలా?</a></p>
1 month ago
3 
