<p><strong>Vizag News:</strong> మారికవలస బాయ్స్ గిరిజన గురుకుల పాఠశాలను పూర్తిగా ఎత్తివేసి, ఆ ప్రాంగణంలో సెంటర్ ఆఫ్ ఎక్సలెన్స్ ఏర్పాటు చేయాలనే ప్రభుత్వ నిర్ణయాన్ని స్థానికులు వ్యతిరేకిస్తున్నారు. వైఎస్సార్ <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> పార్టీ ఎమ్మెల్సీ డా.కుంభా రవిబాబుతో కలిసి వారంతా నిరసన తెలియజేశారు. సెంటర్ ఆఫ్ ఎక్సలెన్స్ ఏర్పాటుకు తాము వ్యతిరేకం కాదని, అయితే ఇప్పటికే వందలాది మంది గిరిజన విద్యార్థులకు అత్యుత్తమ విద్యను అందిస్తున్న మారికవలస గురుకులాన్ని తొలగించి ఆ స్థానంలో కొత్త సంస్థ ఏర్పాటు చేయడం సరైన నిర్ణయం కాదని నినాదాలు చేశారు. </p>
<p>ఎమ్మెల్సీ డా.కుంభా రవిబాబు మాట్లాడుతూ మారికవలస గురుకులంలో సుమారు 480 మంది గిరిజన విద్యార్థులు చదువుతున్నారని, ఏజెన్సీ ప్రాంతాల నుంచి వచ్చిన ఆదివాసీ విద్యార్థులకు ఈ విద్యాసంస్థ ఒక ఆశాకిరణంగా నిలిచిందని తెలిపారు. గతంలో ఈ గురుకులంలో చదువుకున్న అనేక మంది విద్యార్థులు డాక్టర్లు, ఇంజనీర్లు, అధికారులు తదితర ఉన్నత స్థాయిలకు ఎదిగారని పేర్కొన్నారు.</p>
<p>“సెంటర్ ఆఫ్ ఎక్సలెన్స్‌కు మేం స్వాగతం పలుకుతున్నాం. కానీ అందుకోసం 480 మంది గిరిజన విద్యార్థులను ఇతర ప్రాంతాలకు తరలించడం మాత్రం అంగీకరించేది లేదు. ప్రభుత్వం సెంటర్ ఆఫ్ ఎక్సలెన్స్ ఏర్పాటు చేయాలనుకుంటే ప్రత్యేక భవనం నిర్మించాలి లేదా విశాఖపట్నంలో అందుబాటులో ఉన్న భవనాలు ఉపయోగించుకోవాలి. మారికవలస గురుకులాన్ని మాత్రం యథాతథంగా కొనసాగించాలి” అని ఆయన అన్నారు.</p>
<p>విద్యార్థులు, తల్లిదండ్రులతో నిర్వహించిన సమావేశంలో వారి అభిప్రాయాలను తెలుసుకున్నామని, గురుకులాన్ని మూసివేయకుండా ఇక్కడే కొనసాగించాలని విద్యార్థులు, తల్లిదండ్రులు ఏకాభిప్రాయంతో కోరారని ఎమ్మెల్సీ తెలిపారు. ఈ మేరకు ప్రభుత్వానికి ప్రతిపాదన సమర్పించినప్పటికీ, అనంతరం అర్థరాత్రి సమయంలో తల్లిదండ్రులకు ఫోన్లు చేసి తమ పిల్లలను ఇతర ప్రాంతాలకు తరలించేందుకు ఆప్షన్లు ఇవ్వాలని ఒత్తిడి తెచ్చారని ఆయన ఆరోపించారు.</p>
<p>అంతేకాకుండా, పోలీసు బందోబస్తు మధ్య విద్యార్థుల గదుల్లోకి వెళ్లి వారి సామాన్లను సర్దించి, చిన్నారులను ఇతర పాఠశాలలకు తరలించేందుకు బస్సుల్లోకి బలవంతంగా ఎక్కించారని డా.కుంభా రవిబాబు ఆవేదన వ్యక్తం చేశారు. విద్యార్థులు, తల్లిదండ్రులను భయభ్రాంతులకు గురిచేసి ఇలాంటి చర్యలకు పాల్పడటం తీవ్రంగా ఖండించాల్సిన విషయమన్నారు.</p>
<p>“ఈ చిన్నారులు ఏ తప్పు చేశారు? వారిని దోషుల్లా, దొంగల్లా ఎందుకు చూస్తున్నారు? వారి విద్యా హక్కును, తల్లిదండ్రుల అభిప్రాయాన్ని గౌరవించాలి. పోలీసు బలగాలను ఉపయోగించి విద్యార్థులను బలవంతంగా తరలించడం ఏమాత్రం సమర్థనీయం కాదు” అని ఎమ్మెల్సీ ప్రశ్నించారు.</p>
<p>విద్యార్థులకు ఎలాంటి ఇబ్బందులు కలిగించినా, వారిని భయభ్రాంతులకు గురిచేసినా చట్టపరమైన చర్యలు తీసుకుంటామని, అవసరమైతే అట్రాసిటీ చట్టం కింద కేసులు నమోదు చేయించేందుకు చర్యలు చేపడతామని డా.కుంభా రవిబాబు హెచ్చరించారు. పాడేరు ఐటీడీఏ పీవో, పాఠశాల ప్రిన్సిపాల్‌తోపాటు సంబంధిత జిల్లా అధికారుల తీరుపై ఆయన తీవ్ర ఆగ్రహం వ్యక్తం చేశారు.</p>
<p>మారికవలస గురుకులం కేవలం ఒక పాఠశాల కాదని, ఏజెన్సీ ప్రాంతాల నుంచి వచ్చిన గిరిజన విద్యార్థుల భవిష్యత్తుకు బలమైన పునాది వేసే విద్యాలయమని ఆయన పేర్కొన్నారు. అత్యుత్తమ అకడమిక్ వాతావరణం ఉన్న ఈ ప్రతిష్ఠాత్మక విద్యాసంస్థను ఎట్టి పరిస్థితుల్లోనూ నిర్వీర్యం చేయడానికి వీల్లేదన్నారు.</p>
<p>“మారికవలస గిరిజన గురుకులం ఇక్కడే కొనసాగాలి. గిరిజన విద్యార్థుల భవిష్యత్తుతో ప్రభుత్వం చెలగాటం ఆడకూడదు. సెంటర్ ఆఫ్ ఎక్సలెన్స్‌ను ఏర్పాటు చేయండి.. కానీ మారికవలస గురుకులాన్ని తొలగించి కాదు. ప్రత్యామ్నాయ భవనం ఏర్పాటు చేసి సెంటర్ ఆఫ్ ఎక్సలెన్స్‌ను ప్రారంభించాలి” అని ఎమ్మెల్సీ డా.కుంభా రవిబాబు డిమాండ్ చేశారు.</p>
<p>గిరిజన విద్యార్థులు, తల్లిదండ్రుల అభిప్రాయాలను గౌరవించి, మారికవలస గురుకులాన్ని యథాతథంగా కొనసాగించే వరకు తమ పోరాటం కొనసాగుతుందని స్పష్టం చేశారు.</p>
2 months ago
3 
