<p>UPI Charges New Rules: నగదు రహిత చెల్లింపుల్లో ఎంతో కీలకంగా మారిన యూనిఫైడ్‌ పేమెంట్స్‌ ఇంటర్‌ఫేస్‌ (UPI) లావాదేవీలపై కేంద్రం కొత్త మార్గదర్శకాలను విడుదల చేసింది. యూపీఐ వ్యక్తిగత లావాదేవీలు పూర్తిగా ఉచితంగా కొనసాగుతాయని స్పష్టం చేసింది. పెద్ద వ్యాపార సంస్థలు రూ.2,000 కంటే ఎక్కువ విలువైన లావాదేవీలపై మర్చంట్‌ డిస్కౌంట్ రేట్ (MDR) ఛార్జీలు ఖరారు చేసింది.</p>
<h3>1. వ్యక్తిగత (P2P) లావాదేవీలు ఉచితం</h3>
<p>ఒక వ్యక్తి నుంచి మరొక వ్యక్తికి (P2P) జరిగే బదిలీలపై ఒక్క పైసా కూడా ఛార్జీ పడదు. స్నేహితులు, బంధువులతో ఒక నెలలో ఎన్ని లావాదేవీలు చేసినా పూర్తిగా ఉచితం. దీనిపై ఎలాంటి పరిమితులు ఉండవు.</p>
<p>‘చెల్లింపులు, పరిష్కార వ్యవస్థల చట్టం-2007లోని సెక్షన్ 10ఏ’ కింద కేంద్ర ప్రభుత్వం దీనిపై అధికారిక గెజిట్ నోటిఫికేషన్ విడుదల చేసింది. రూపే డెబిట్ కార్డులతో పాటు, రూ.2,000 లోపు జరిపే వ్యాపార లావాదేవీలను (P2M) ఉచిత ఎలక్ట్రానిక్ పేమెంట్స్‌గా తెలిపింది. వినియోగదారులు, వ్యాపారుల నుంచి బ్యాంకులు లేదా పేమెంట్ సిస్టమ్ ప్రొవైడర్లు వీటిపై ఎలాంటి ఛార్జీలు వసూలు చేయకూడదని స్పష్టం చేసింది. </p>
<h3>2. పెద్ద వ్యాపారస్థులకు రూ.2,000 దాటితే </h3>
<p>పెద్ద వ్యాపార సంస్థలు, ఇ-కామర్స్ సంస్థలతో (P2M) చేసే లావాదేవీల విలువ రూ.2,000 కంటే ఎక్కువుంటే మర్చంట్ డిస్కౌంట్ రేట్ వర్తిస్తుంది. అక్టోబరు 15 నుంచి అమల్లోకి రానున్న మార్గదర్శకాల ప్రకారం ఈ ఛార్జీలు ఉంటాయి. అయితే, ఈ ఛార్జీలు నేరుగా వ్యాపార సంస్థలకే వర్తిస్తాయి తప్ప సాధారణ ఖాతాదారులకు డెబిట్ కావు.</p>
<h3>3. చిరు వ్యాపారులకు పూర్తి భరోసా</h3>
<ul>
<li>చిన్న వ్యాపారులను ప్రోత్సహించేందుకు ప్రభుత్వం కొన్ని సడలింపులను ఇచ్చింది. </li>
<li>యూపీఐ క్యూఆర్ కోడ్ ద్వారా నెలకు రూ.1 లక్ష లోపు చెల్లింపులు స్వీకరించే చిరు వ్యాపారులకు ఎలాంటి ఎండీఆర్ వర్తించదు.</li>
<li>చిరు వ్యాపారులకు రూ.2,000 కంటే ఎక్కువ విలువైన లావాదేవీ వచ్చినా, ఆ వర్తకుడి అకౌంట్ పరిధిలో ఉంటే ఎలాంటి ఛార్జీలు ఉండవు.</li>
<li>ఎండీఆర్ మినహాయింపు పొందేందుకు చిన్న వ్యాపారస్థులకు ఎలాంటి జీఎస్‌టీ రిజిస్ట్రేషన్ అవసరం లేదు. తమ క్యూఆర్ కోడ్‌లను లేదా సౌండ్‌బాక్స్‌లను మార్చాల్సిన అవసరం లేదు.</li>
<li>వరుసగా 3 నెలల పాటు నెలకు రూ.1లక్ష కంటే ఎక్కువ జమ అయితేనే ఆ అకౌంట్ P2M గా మారుస్తారు.</li>
</ul>
<h3>4. కొన్ని సేవలకు కేవలం రూ.5 మాత్రమే </h3>
<p>కొన్ని నిర్దిష్ట రంగాల్లో లావాదేవీలు రూ.2,000 దాటినప్పటికీ, వాటికి రూ.5 ఎండీఆర్ మాత్రమే వర్తిస్తుంది. అవి ఇన్సూరెన్స్ ప్రీమియం చెల్లింపులు, పెట్రోల్, డీజిల్ కొనుగోలు, విద్యుత్ బిల్లులు, వాటర్, పైప్‌డ్ గ్యాస్ బిల్లులు, స్కూల్, కాలేజీ ట్యూషన్ ఫీజు, ప్రవేశ పరీక్షల ఫీజు, టెలికాలమ్ బిల్లులు, రైలు టిక్కెట్లు. </p>
<p>వినియోగదారుల బిల్లులు, రికరింగ్ డిపాజిట్లు, ఓటీటీ చెల్లింపులకు 'ఆటోపే' సదుపాయాన్ని ఉపయోగిస్తుంటే ఎలాంటి ప్రత్యేక ఎండీఆర్ లావాదేవీ ఛార్జీలు ఉండవు. </p>
<p>Also read: <a title="Apple మాజీ సీఈవో టిమ్ కుక్ నికర ఆస్తి విలువ ఎంత? సంస్థలో ఇక నుంచి కొత్త ఇన్నింగ్స్" href="https://telugu.abplive.com/tech/apple-ceo-tim-cook-net-worth-details-amid-his-resignation-and-what-is-his-next-plan-257745" target="_self">Apple మాజీ సీఈవో టిమ్ కుక్ నికర ఆస్తి విలువ ఎంత? సంస్థలో ఇక నుంచి కొత్త ఇన్నింగ్స్</a></p>
<h3>5. క్యాపిటల్ మార్కెట్ లావాదేవీలకు 0.02%</h3>
<p>క్యాపిటల్ మార్కెట్ లావాదేవీలు అంటే మ్యూచువల్ ఫండ్లు, స్టాక్ బ్రోకర్లు, షేర్ల కొనుగోళ్లు, బ్రోకర్ వాలెట్ టాప్-అప్‌లకు చేసే యూపీఐ బదిలీలపై ఎన్‌పీసీఐ (NPCI) ప్రత్యేక రాయితీ రేటును నిర్ణయించింది. ఈ లావాదేవీలపై 0.02% మాత్రమే ఛార్జీ పడుతుంది. ఎంత పెద్ద లావాదేవీ అయినా, ఒక్కో చెల్లింపుపై గరిష్ఠంగా రూ.300 వరకు మాత్రమే ఎండీఆర్ పరిమితం చేసింది.<br /><br />Also read: <a title=" బ్యాంక్ అకౌంట్ లేకున్నా క్రెడిట్ కార్డు తీసుకోవచ్చా ? ఎవరికి జారీ చేస్తారు" href="https://telugu.abplive.com/business/how-to-get-credit-card-without-bank-account-know-details-257577" target="_self"> బ్యాంక్ అకౌంట్ లేకున్నా క్రెడిట్ కార్డు తీసుకోవచ్చా ? ఎవరికి జారీ చేస్తారు</a></p>
<h3>ఛార్జీలు - కారణాలు</h3>
<p>2025-26లో వ్యాపారులకు యూపీఐ ద్వారా రూ.198 లక్షల కోట్ల విలువైన చెల్లింపులు జరగ్గా, అందులో రూ.2,000 కంటే ఎక్కువ విలువైన లావాదేవీల సంఖ్య కేవలం 4 శాతమే. అంటే 96% లావాదేవీలు రూ.2,000 లోపే జరుగుతున్నాయి. అయితే, ఈ 4% లావాదేవీల ఆర్థిక వాటా మొత్తం సొమ్ములో 66% (రూ.131 లక్షల కోట్లు) కావడం గమనార్హం. యూపీఐ వ్యవస్థను సురక్షితంగా నిర్వహించేందుకు, సర్వర్లకు, సైబర్ మోసాల కట్టడికి ఏటా రూ.20,700 కోట్లు ఖర్చవుతున్నట్లు పార్లమెంటరీ కమిటీ అంచనా వేసింది. కేంద్ర ప్రభుత్వం 2021-22 నుంచి 2024-25 వరకు రూ.8,276 కోట్లు యూపీఐ కోసం వెచ్చించింది. ఈ నేపథ్యంలో డిజిటల్ చెల్లింపుల వ్యవస్థ నిరంతర నిర్వహణ కోసం పెద్ద వ్యాపారస్థుల వద్ద ఛార్జీలు వసూలు తప్పనిసరి అని నిర్ణయించింది. <br /><br />Also read: <a title="ఆన్‌లైన్ షాపింగ్ ప్రియులకు బిగ్‌షాక్! సెప్టెంబర్ 1 డెలివరీ ఛార్జీలు పెంపు!" href="https://telugu.abplive.com/business/delhivery-d2c-brands-shipping-fees-increase-online-shopping-september-1-257484" target="_self">ఆన్‌లైన్ షాపింగ్ ప్రియులకు బిగ్‌షాక్! సెప్టెంబర్ 1 డెలివరీ ఛార్జీలు పెంపు!</a></p>
1 month ago
3 
