<p><strong>No TVK banners posters in public places: </strong>తమిళనాడు రాజకీయాల్లో సరికొత్త సంస్కృతికి ముఖ్యమంత్రి సి. జోసెఫ్ విజయ్ నాంది పలికారు. అధికారంలోకి వచ్చిన ఆనందంలో ప్రజలకు, ట్రాఫిక్‌కు అంతరాయం కలిగించేలా ఎక్కడా బ్యానర్లు, పోస్టర్లు, కటౌట్లు ఏర్పాటు చేయకూడదని తన పార్టీ తమిళగ వెట్రి కళగం శ్రేణులకు కఠిన ఆదేశాలు జారీ చేశారు. ప్రభుత్వ కార్యక్రమాలైనా, పార్టీ వేడుకలైనా బహిరంగ ప్రదేశాల్లో ఫ్లెక్సీల సంస్కృతికి స్వస్తి పలకాలని ఆయన స్పష్టం చేశారు. ఈ మేరకు పార్టీ ప్రధాన కార్యాలయం నుండి అధికారిక ప్రకటన వెలువడింది.</p>
<p><strong> సామాన్యుల భద్రతే ముఖ్యం </strong></p>
<p>గతంలో తమిళనాడులో అక్రమ బ్యానర్లు, ఫ్లెక్సీలు, కటౌట్లు కూలి పలువురు ప్రాణాలు కోల్పోయిన విషాద ఘటనలను దృష్టిలో ఉంచుకుని విజయ్ ఈ నిర్ణయం తీసుకున్నారు. రోడ్ల పక్కన, జంక్షన్లలో భారీ కటౌట్లు పెట్టడం వల్ల వాహనదారుల ఏకాగ్రత దెబ్బతింటుందని, ఇది ప్రమాదాలకు దారితీస్తుందని ఆయన ఆవేదన వ్యక్తం చేశారు. ప్రజల ప్రాణాల కంటే పార్టీ ప్రచారం ముఖ్యం కాదు అని విజయ్ తన కేడర్‌కు గట్టి సందేశాన్ని పంపారు.</p>
<p><strong> నిబంధనలు అతిక్రమిస్తే బహిష్కరణే! </strong></p>
<p>పార్టీ క్రమశిక్షణ విషయంలో విజయ్ చాలా కఠినంగా వ్యవహరిస్తున్నారు. ఎవరైనా కార్యకర్తలు, నాయకులు తమను మెప్పించేందుకు బహిరంగ ప్రదేశాల్లో బ్యానర్లు కడితే, వారిపై తక్షణమే క్రమశిక్షణా చర్యలు తీసుకుంటామని హెచ్చరించారు. అవసరమైతే అటువంటి వారిని పార్టీ ప్రాథమిక సభ్యత్వం నుండి కూడా తొలగించేందుకు వెనుకాడబోమని టీవీకే ప్రధాన కార్యదర్శి ఎన్. ఆనంద్ ప్రకటించారు. ఈ నిర్ణయంపై తమిళనాడు ప్రజల నుండి, ముఖ్యంగా యువత నుండి ప్రశంసలు వెల్లువెత్తుతున్నాయి. </p>
<blockquote class="twitter-tweet">
<p dir="ltr" lang="ta">தலைமை நிலையச் செயலக அறிவிப்பு<br /><br />கழகத் தோழர்கள் அனைவருக்கும் வணக்கம். <br /><br />தமிழ்நாட்டு மக்களின் நலன் ஒன்றையே குறிக்கோளாகக் கொண்டு தொடங்கப்பட்டதுதான் தமிழக வெற்றிக் கழகம். தமிழ்நாட்டு மக்களின் ஏகோபித்த நம்பிக்கையைப் பெற்ற, தமிழ்ச் சொந்தங்களின் குடும்பத்தில் ஒருவராக இருக்கக்கூடிய…</p>
— TVK Party HQ (@TVKPartyHQ) <a href="https://twitter.com/TVKPartyHQ/status/2054119270452510736?ref_src=twsrc%5Etfw">May 12, 2026</a></blockquote>
<p><strong> డిజిటల్ ప్రచారానికే ప్రాధాన్యత </strong></p>
<p>బహిరంగ ప్రదేశాల్లో చెత్తను పెంచే పోస్టర్ల కంటే, ఆధునిక సాంకేతికతను వాడుకుని సోషల్ మీడియా ద్వారా ప్రభుత్వ పథకాలను ప్రజల్లోకి తీసుకెళ్లాలని విజయ్ సూచించారు. పర్యావరణ హితమైన రాజకీయాలను ప్రోత్సహించడమే తన లక్ష్యమని ఆయన పేర్కొన్నారు. కేవలం పార్టీ ప్రచారానికే కాకుండా, విజయ్ పాల్గొనే ప్రభుత్వ పర్యటనల్లో కూడా అధికారులు ఎటువంటి స్వాగత తోరణాలు, ఫ్లెక్సీలు ఏర్పాటు చేయవద్దని ఇప్పటికే జిల్లా కలెక్టర్లకు మౌఖిక ఆదేశాలు అందాయి. </p>
<p><strong> రాజకీయాల్లో పెను మార్పులకు నాంది </strong></p>
<p>తమిళనాడులో దశాబ్దాలుగా కొనసాగుతున్న కటౌట్ సంస్కృతి కి ఒక ముఖ్యమంత్రి స్వయంగా స్వస్తి పలకడం ఇది మొదటిసారి. కేవలం సినీ గ్లామర్‌తోనే కాకుండా, బాధ్యతాయుతమైన నిర్ణయాలతో విజయ్ తన పరిపాలనను కొనసాగిస్తున్న తీరు ఆయన అభిమానుల్లో ఉత్సాహాన్ని నింపుతోంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/these-are-the-mistakes-you-should-not-make-when-trying-to-lose-weight-246955" width="631" height="381" scrolling="no"></iframe></p>
3 weeks ago
5 
