<p><strong>Kakoli Ghosh Dastidar NDA Support:</strong> పశ్చిమ బెంగాల్ మాజీ ముఖ్యమంత్రి, తృణమూల్ కాంగ్రెస్ అధినేత్రి మమతా బెనర్జీకి జాతీయ రాజకీయాల్లో ఊహించని కోలుకోలేని దెబ్బ తగిలింది. బెంగాల్ ఎమ్మెల్యేలు తిరుగుబాటు చేసిన కొద్ది రోజుల వ్యవధిలోనే, ఇప్పుడు ఆ పార్టీ పార్లమెంటరీ వింగ్‌లోనూ భారీ చీలిక స్పష్టమైంది. టీఎంసీకి చెందిన దాదాపు 20 మంది లోక్‌సభ సభ్యులు తాము కేంద్రంలోని బీజేపీ నేతృత్వంలోని ఎన్డీయే కూటమికి మద్దతు ఇవ్వాలని నిర్ణయించుకున్నట్లు లోక్‌సభ స్పీకర్ ఓం బిర్లాకు అధికారికంగా లేఖ రాశారు. </p>
<p><strong>మూడింట రెండు వంతుల మంది ఎంపీలచీలిక </strong></p>
<p>ఈ తిరుగుబాటుకు నేతృత్వం వహించిన సీనియర్ టీఎంసీ ఎంపీ, బారాసత్ నియోజకవర్గ ప్రతినిధి కాకోలి ఘోష్ దస్తీదార్ ఢిల్లీలో మీడియాకు ఈ సంచలన వివరాలను వెల్లడించారు. 20 మంది లోక్‌సభ ఎంపీలం ఎన్డీయే కూటమికి మద్దతు ఇవ్వాలని నిర్ణయించుకున్నాం. ఈ మేరకు మా నిర్ణయాన్ని స్పీకర్ ఓం బిర్లాకు లేఖ ద్వారా తెలియజేసాం అని ఆమె ప్రకటించారు. బెంగాల్ ఎన్నికల ఫలితాల తర్వాత దేశంలో మారుతున్న రాజకీయ పరిణామాలను తాము అంగీకరిస్తున్నామని, తమ భవిష్యత్తు రాజకీయ పంథా ఎన్డీయేతోనే సాగాలని ఈ నిర్ణయం తీసుకున్నట్లు ఆమె స్పష్టం చేశారు. ప్రస్తుతం లోక్‌సభలో తృణమూల్ కాంగ్రెస్‌కు 28 మంది ఎంపీల బలం ఉంది. పార్టీ ఫిరాయింపుల నిరోధక చట్టం ప్రకారం అనర్హత వేటు పడకుండా లోక్‌సభలో అధికారికంగా చీలిక తెచ్చి ప్రత్యేక గ్రూపుగా ఏర్పడాలంటే కనీసం మూడింట రెండొంతుల మంది అంటే.. 19 మంది ఎంపీల మద్దతు అవసరం. ఇప్పుడు కాకోలి ఘోష్ దస్తీదార్ నేతృత్వంలోని అసంతృప్త గ్రూపులో సరిగ్గా 20 మంది ఎంపీలు ఉండటంతో చట్టపరమైన ఇబ్బందులు లేకుండా వీరంతా ఎన్డీయే వైపు మొగ్గు చూపినట్లు స్పష్టమవుతోంది. ఈ ఎంపీలంతా కలిసి అభిషేక్ బెనర్జీని తమ పార్లమెంటరీ పార్టీ నేత పదవి నుండి తొలగించి, విడిగా కూర్చోవడానికి అనుమతించాలని స్పీకర్‌ను కోరనున్నారు.</p>
<p><strong>ఢిల్లీలోనే ఇండీ కూటమి సమావేశంలో మమతా బెనర్జీ </strong></p>
<p>ఒకవైపు తృణమూల్ అధినేత్రి మమతా బెనర్జీ ఢిల్లీలో జరుగుతున్న ఇండియా కూటమి సమావేశానికి హాజరైన సమయంలోనే, ఆమెకు తెలియకుండా ఈ 20 మంది ఎంపీలు ఢిల్లీలోని ఒక రహస్య ప్రదేశంలో సమావేశమై ఈ ఆపరేషన్‌ను పూర్తి చేశారు. పార్టీలో అంతర్గత ప్రజాస్వామ్యం లోపించిందని, కేవలం జూనియర్ నేతలకు, కొద్దిమందికే ప్రాధాన్యత ఇస్తూ సీనియర్లను అవమానిస్తున్నారని తిరుగుబాటు నేతలు ఆరోపిస్తున్నారు. ఇప్పటికే రాజ్యసభ ఎంపీ సుఖేందు శేఖర్ రాయ్ తన పదవికి, పార్టీకి రాజీనామా చేయగా, ఆ మంటలు ఇప్పుడు లోక్‌సభ ఎంపీల దాకా పాకాయి. </p>
<p><strong>ఇప్పటికే ఎమ్మెల్యేలు సొంత కుంపటి </strong></p>
<p>ఈ పరిణామాలపై తృణమూల్ <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> సీనియర్ నేత సౌగతా రాయ్ స్పందిస్తూ, కొందరు ఎంపీలు విడిగా సమావేశమైన మాట వాస్తవమేనని, అయితే వారు ఏం చర్చించారనేది వారికే తెలియాలని వ్యాఖ్యానించారు. <a title="బీజేపీ" href="https://telugu.abplive.com/topic/BJP" data-type="interlinkingkeywords">బీజేపీ</a> నేతలు తమను కూడా సంప్రదించారని, కానీ ఈ వయసులో తాను పార్టీ మారే ప్రసక్తే లేదని ఆయన స్పష్టం చేశారు. కాగా, కాకోలి ఘోష్ దస్తీదార్ గత కొద్దిరోజులుగా పార్టీలోని కొందరు నేతల ప్రవర్తనపై, ముఖ్యంగా ఎంపీ కల్యాణ్ బెనర్జీ దురుసుతనంపై స్పీకర్‌కు ఫిర్యాదు చేస్తూ పార్టీ అంతర్గత పదవులకు రాజీనామా చేశారు. బెంగాల్ అసెంబ్లీలో ఇప్పటికే 58 మంది ఎమ్మెల్యేలు చీలిపోయి రిటబ్రత బెనర్జీ నేతృత్వంలో విడిగా ప్రతిపక్ష హోదాను క్లెయిమ్ చేస్తుండగా, ఇప్పుడు పార్లమెంట్‌లోనూ 20 మంది లోక్‌సభ సభ్యులు చేజారిపోవడం మమతా బెనర్జీ రాజకీయ జీవితంలోనే అతిపెద్ద సంక్షోభంగా మారింది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/ayurvedam/do-you-have-a-cough-treat-it-with-ayurveda-249696" width="631" height="381" scrolling="no"></iframe></p>
4 months ago
12 
