<p>May 9 Telangana Modi tour: తెలంగాణ ప్రజల దశాబ్దాల కల అయిన వరంగల్ ఎయిర్‌పోర్ట్ పునరుద్ధరణకు మే 9న ముహూర్తం ఖరారైంది. ప్రధానమంత్రి <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a> స్వయంగా ఈ ప్రాజెక్టుకు శంకుస్థాపన చేయనున్నారు. సుమారు 950 ఎకరాల భూసేకరణ పూర్తికావడంతో, దాదాపు 850 కోట్ల అంచనా వ్యయంతో నిర్మించనున్న ఈ విమానాశ్రయం ఉత్తర తెలంగాణ ముఖచిత్రాన్ని మార్చేయనుంది. 2027 నాటికి ఇక్కడి నుండి విమాన సర్వీసులు ప్రారంభించాలని లక్ష్యంగా పెట్టుకున్నారు. మోదీ చేతుల మీదుగా జరిగే ఈ భూమిపూజ ఓరుగల్లు అభివృద్ధిలో కీలక ఘట్టంగా నిలవనుంది.</p>
<p>ప్రధాని పర్యటన కేవలం వరంగల్‌కే పరిమితం కాకుండా పలు భారీ ప్రాజెక్టుల ప్రారంభోత్సవాలతో ముడిపడి ఉంది. ఎంతో కాలంగా నిరీక్షిస్తున్న MMTS ఫేజ్-2 ని ప్రధాని జాతికి అంకితం చేయనున్నారు. దీనితో పాటు వరంగల్‌లో సిద్ధమైన రైల్వే కోచ్ ఫ్యాక్టరీ ని ప్రారంభించడంతో పాటు, పలు రైల్వే కారిడార్లకు మోదీ పచ్చజెండా ఊపనున్నారు. ఈ పర్యటన ద్వారా అటు రవాణా, ఇటు పారిశ్రామిక రంగాల్లో తెలంగాణకు కేంద్రం పెద్దపీట వేస్తోందనే సంకేతాన్ని పంపనున్నారు.</p>
<p>రాజకీయంగా కూడా ఈ పర్యటన అత్యంత ప్రాధాన్యతను సంతరించుకుంది. హైదరాబాద్‌లోని సికింద్రాబాద్ పరేడ్ గ్రౌండ్స్ లేదా వరంగల్ వేదికగా బీజేపీ భారీ బహిరంగ సభకు ప్లాన్ చేస్తోంది. ఐదు రాష్ట్రాల ఎన్నికల ఫలితాల అనంతరం ప్రధాని వస్తుండటంతో, రాష్ట్రంలోని ప్రస్తుత రాజకీయ పరిణామాలపై ఆయన ఎలాంటి వ్యాఖ్యలు చేస్తారన్నది ఉత్కంఠగా మారింది. ముఖ్యంగా రాష్ట్ర <a title="బీజేపీ" href="https://telugu.abplive.com/topic/BJP" data-type="interlinkingkeywords">బీజేపీ</a>లోని అంతర్గత విభేదాలను చక్కదిద్ది, రానున్న ఎన్నికల కోసం పార్టీ శ్రేణుల్లో నూతనోత్సాహం నింపేలా మోదీ దిశానిర్దేశం చేయనున్నారు.</p>
<p>భద్రతా పరంగా కేంద్ర బలగాలు ఇప్పటికే రంగంలోకి దిగాయి. రాష్ట్ర ప్రభుత్వం కూడా భూసేకరణ పూర్తి చేసి ఏఏఐ కి భూములను అప్పగించిన తరుణంలో, ప్రధాని పర్యటనకు పూర్తి స్థాయిలో సహకరించేలా అధికార యంత్రాంగం ఏర్పాట్లు చేస్తోంది. మొత్తానికి మే 9న మోదీ పర్యటన తెలంగాణ అభివృద్ధికి సరికొత్త బాటలు వేస్తుందని విశ్లేషకులు భావిస్తున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/laptop/do-not-make-these-mistakes-when-buying-a-laptop-245204" width="631" height="381" scrolling="no"></iframe></p>
1 month ago
6 
