<p>Strait of Hormuz: పశ్చిమాసియాలో పెరిగిన ఉద్రిక్తతలను ఇరాన్ క్యాష్ చేసుకుంటోంది. సముద్ర మార్గాలలో అత్యంత కీలకమైన హోర్ముజ్ జలసంధి ద్వారా వెళ్లే కొన్ని నౌకల నుండి 2 మిలియన్లు డాలర్లు (సుమారు 18.8 కోట్ల రూపాయలు) వసూలు చేయాలని నిర్ణయించింది. ప్రపంచ షిప్పింగ్‌కు కీలకమైన ఈ మార్గంలో తమ ఆధిపత్యాన్ని, నియంత్రణను ప్రదర్శించేందుకు ఇరాన్ ప్రభుత్వం ఈ చర్యలు చేపట్టింది. </p>
<p><strong>ఇరాన్ పార్లమెంటేరియన్ ప్రకటన</strong></p>
<p>ఇరాన్ పార్లమెంటు జాతీయ భద్రతా కమిటీ సభ్యుడు <a title="అలౌద్దీన్ బొరూజెర్డి" href="https://www.abplive.com/news/world/us-treasury-secretary-scott-bessent-warns-iran-fortifications-will-be-demolished-3105108" target="_self">అలౌద్దీన్ బొరూజెర్డి</a> ఈ అంశంపై మాట్లాడారు. హర్మూజ్ జలసంధి నుంచి వెళ్లే కొన్ని నౌకలపై కొత్తగా విధించిన 2 మిలియన్ డాలర్ల టోల్ ఇప్పటికే అమలులోకి వచ్చిందని తెలిపారు. దశాబ్దాల తర్వాత ఈ జలసంధిపై ఇరాన్ తన పూర్తి హక్కులను వినియోగించుకుంటుందని పేర్కొన్నారు. </p>
<p>‘కొన్ని నౌకల నుండి 2 మిలియన్ డాలర్ల టోల్ వసూలు చేయడం ఇరాన్ బలాన్ని నిరూపిస్తుంది. యుద్ధ ఖర్చులు పెరగడం, దేశంలో సంక్షోభంతో మేం హర్మూజ్ లో టోల్ వసూలు చేయడం అవసరం అని భావించాం. హర్మూజ్ ద్వారా వెళ్ళే నౌకల నుండి ట్రాన్స్‌పోర్ట్ ఛార్జీ వసూలు చేయడం ఇస్లామిక్ రిపబ్లిక్ శక్తిని, అధికారాన్ని చూపుతుంది’ అని బొరూజెర్డి అన్నారు.</p>
<p><strong>ట్రంప్ వార్నింగ్</strong></p>
<p>అమెరికా అధ్యక్షుడు ట్రంప్ హెచ్చరికల తర్వాత బొరూజెర్డి నుంచి ఈ ప్రకటన వచ్చింది. ఇరాన్ 48 గంటల్లో హర్మూజ్ జలసంధిని తెరవకపోతే, అమెరికా ఇరాన్ న్యూక్లియర్ పవర్ ప్లాంట్లపై దాడి చేస్తుందని, అతిపెద్ద విద్యుత్ ప్లాంట్ నుండి ప్రారంభిస్తుందని డొనాల్డ్ ట్రంప్ ఆదివారం ఉదయం హెచ్చరించారు. ఇరాన్ పార్లమెంటేరియన్ ట్రంప్ బెదిరింపును కూడా ప్రస్తావిస్తూ, ఇజ్రాయెల్ ఇంధన కేంద్రాలు కూడా ఇరాన్ దాడుల రేంజ్‌లోనే ఉన్నాయని, ఒక రోజులో నాశనం చేయవచ్చని కౌంటర్ స్టేట్‌మెంట్ ఇచ్చారు.</p>
<p> </p>
3 weeks ago
4 
