<p><strong>Senior Citizen Dating India:</strong>ఒకప్పుడు అరవై ఏళ్లు వచ్చాయంటే... ఆధ్యాత్మిక చింతన, మనవలు, మనవరాళ్లతో కాలక్షేపం, విశ్రాంతి జీవితం మాత్రమే గుర్తుకు వచ్చేది. కానీ ఆధునిక భారత వృద్ధతరం మాత్రం నాకొక గాల్‌ ఫ్రెండ్‌ కావాలిరా అంటూ పాడుకుంటున్నారు. యూత్‌తో పోటీ పడి మరీ డేటింగ్ యాప్‌ల్లో ఖాతాలు తెరుస్తున్నారు. ప్రేమ, తోడు కోసం సెకండ్ ఇన్నింగ్స్‌ కోసం అడుగులు వేస్తున్నారు. విదేశాల్లో సాధారణమైన ఆటమ్నల్‌ రొమాన్స్‌ అంటే మలి వయసు ప్రేమ ఇప్పుడు భారత్‌లో కూడా చాలా వేగంగా విస్తరిస్తోంది. </p>
<h3>సింగిల్ మిక్చర్ కల్చర్</h3>
<p>ముంబై, ఢిల్లీ, కోల్‌కతా వంటి మెట్రో నగరాల్లో వృద్ధుల కోసం ప్రత్యేకంగా సింగిల్ మిక్చర్స్ నిర్వహిస్తున్నారు. ఇక్కడ వారు రిటైర్‌మెంట్‌ ప్లాన్లు, ఆరోగ్య విశేషాలు చర్చించుకుంటూనే తమకు నచ్చిన తోడును ఎంచుకుంటున్నారు. </p>
<h3>మానసిక, ఆరోగ్య సమస్యల నుంచి దూరంగా ఉండేందుకు...</h3>
<p>భారత్‌లో సగటు ఆయుర్ధాయం 50 నుంచి 71 ఏళ్లకు పెరిగింది. అంటే రిటైర్‌మెంట్‌ తర్వాత కూడా సుమారు రెండు దశాబ్దాల జీవితం మిగిలే ఉంటోంది. పిల్లలు విదేశాల్లో లేదా ఇతర నగరాల్లో స్థిరపడటం వల్ల సుమారు 15 శాతం మంది వృద్ధులు నగరాల్లో ఒంటరిగా ఉంటున్నారు. ముఖ్యంగా కోవిడ్ తర్వాత ఒంటరిగా ఉండటం మానసిక ఆందోళనలు, డిప్రెషన్ వంటి సమస్యలు పెరుగుతున్నాయి. వీటిపై అవగాహన పెరిగింది. </p>
<p><iframe title="LPG Crisis Hyderabad Oldage Home | వృద్దాశ్రమాల్లో గ్యాస్ లేక తీవ్ర ఇబ్బందులు ఎదుర్కొంటున్న బాధితులు" src="https://www.youtube.com/embed/NloBzFF5ZRY" width="919" height="517" frameborder="0" allowfullscreen="allowfullscreen"></iframe></p>
<p>కేవలం శారీరక ఆకర్షణ కంటే, మనసు విప్పి మాట్లాడే ఒక తోడు ఉండాలనే కోరిక వారిని ఈ దిశగా నడిపిస్తోంది. " మేం కూడా సంతోషంగా ఉండటానికి అర్హులమే" అనే భావన ఇప్పుడు బలపడుతోంది. </p>
<h3>లేట్ వయసులో పెళ్లి చేసుకున్న సెలబ్రిటీలు</h3>
<p>ప్రముఖ నటుడు ఆశిష్ విద్యార్థి 57 ఏళ్ల వయసులో రూపాలి బరువాను వివాహం చేసుకున్నారు. జీవితంలో ఏ దశలోనైనా తోడు అవసరమని, సంతోషంగా ఉండే హక్కు ప్రతి ఒక్కరికీ ఉందని ఆయన చెప్పుకొచ్చారు. వారిద్దరూ కలిసి ఫిఫ్టీ ప్లస్ జిందగీ అనే యూట్యూబ్ ఛానెల్‌ ద్వారా తమ ప్రయాణాన్ని పంచుకుంటున్నారు. బాలీవుడ్ నటి సుహాసిని ములే 60 ఏళ్ల వయసులో వివాహం చేసుకున్నారు. ఫేస్‌బుక్ ద్వారా పరిచయం అయిన ఒక శాస్త్రవేత్తను పెళ్లి చేసుకున్నారు. సమాజం ఒత్తిడి వల్ల కాకుండా, తనకు తోడు కావాలని అనిపించినప్పుడు మాత్రమే ఆమె ఈ నిర్ణయం తీసుకున్నారు. </p>
<h3>సామాన్యులు సైతం అదే బాటలో...</h3>
<p>సెలబ్రిటీలే కాకుండా సామాన్యులు కూడా ఈ బాటలో ఉన్నారు. కేరళకు చెందిన గోకుల్ శ్రీధర్ అనే వ్యక్తి తన తల్లి పడుతున్న కష్టాలు చూసి పునర్వివాహం చేశాడు. ఇది 2013లో సంచలనంగా మారింది. కునాల్ అశోక అనే ఇద్దరు బాల్య స్నేహితులు సుమారు 35 ఏళ్ల తర్వాత కలుసుకున్నారు. అప్పటికే వారి భాగస్వాములను కోల్పోయారు. చివరకు 2023లో వాళ్ల 60వ ఏట వివాహ బంధంలోకి అడుగు పెట్టారు. </p>
<h3>వృద్ధుల కోసం డేటింగ్ యాప్‌లు </h3>
<p>టెక్నాలజీ కేవలం యువతకే కాదు, వృద్ధులకు కూడా వరంగా మారింది. నేడు భారతీయ వృద్ధులు ఉపయోగిస్తున్న టాప్ యాప్‌లు ఒకసారి పరిశీలిస్తే ఆసక్తికరంగా ఉంటుంది. 50 ప్లస్ క్లబ్‌ను కేవలం వీళ్ల కోసమే రూపొందించారు. ట్రూలీ మాడ్లీ ఏ యాప్ కూడా 50 ప్లస్ వాళ్లకు క్రియేట్ చేశారు. ఇందులో సబ్‌స్క్రిప్షన్‌లు కోవిడ్ తర్వాత భారీగా పెరిగింది. క్వాక్‌క్వాక్‌ అండ్ బాంబుల్‌ అనే యాప్‌ ప్రాంతీయ భాషల్లో సపోర్ట్ చేస్తుంది. అందుకే ఇందులో ఉండే వారి సంఖ్య చాలా ఎక్కువగా ఉంది. అయితే డేటింగ్ యాప్‌లలో పురుషులు ఎక్కువగా యూజ్ చేస్తున్నారు. మహిళలు నేరుగా మిక్చర్స్, సిర్ఫ్‌ కాఫీ వంటి వెరిఫైడ్ సర్వీస్‌లను ఇష్టపడుతున్నారు. </p>
<h3>మోసాలు ఉంటాయి జాగ్రత్త!</h3>
<p>ఇందులో కూడా మోసాలు జరుగుతున్నాయి. సామాజికంగా వారిపై దాడి జరుగుతోంది. కుటుంబ సభ్యులు కూడా వారి పరిస్థితిని అర్థం చేసుకోకుండా ప్రవర్తిస్తున్నారు. లేట్ వయసులో ఈ పిచ్చి పనులు ఏంటి అని ప్రశ్నిస్తున్నారు. మరోవైపు డబ్బులు ఉన్న వ్యక్తులను చూసి షుగర్ డాడీ పేరుతో కొందరు మోసం చేస్తున్నారు. వారి వద్ద ఉన్న సంపద లాగేసుకొని జంప్ అవుతున్నారు. </p>
<p>ఇలాంటి ఆలోచన ఉన్న వాళ్లు ఎప్పుడు కూడా మొదటి పరిచయంలోనే మొత్తం సమాచారం పంచుకోకూడదని నిపుణులు హెచ్చరిస్తున్నారు. తమ అవసరాలను, తమ ఇబ్బందులను ముందుగా కుటుంబ సభ్యులతో పంచుకోవాలని చెబుతున్నారు. వారి సలహా మేరకు నిర్ణయాలు తీసుకోవాలని సూచిస్తున్నారు. ఎవరైనా కలిసేందుకు ఒత్తిడి తీసుకొస్తే పబ్లిక్‌ ప్రదేశాల్లో కలవాలని చెబుతున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/meena-to-jayasuda-bhanupriya-disco-shanthi-famous-heroines-who-lost-their-husbands-61547" width="631" height="381" scrolling="no"></iframe></p>
1 month ago
6 
