<p>అమరావతి: బంగాళాఖాతంలో తీవ్ర వాయుగుండం అల్పపీడనంగా బలహీనపడింది. పశ్చిమ విదర్భ, దానిని ఆనుకుని ఉన్న దక్షిణ మధ్యప్రదేశ్‌పై ఉన్న వాయుగుండం పశ్చిమ- వాయువ్య దిశగా పయనించి ఆగ్నేయ రాజస్థాన్, దాని పరిసర ప్రాంతాలలో అల్పపీడనంగా బలహీనపడినట్లు వాతావరణ శాఖ పేర్కొంది. ద్రోణి సగటు సముద్రమట్టం వద్ద ప్రస్తుతం జైసల్మేర్, ఆగ్నేయ రాజస్థాన్, దాని పరిసర ప్రాంతాలలో అల్పపీడన కేంద్రం, సిద్ధి, మాల్దా మీదుగా తూర్పు దిశగా విస్తరించి ఉంది. </p>
<p>ఆదివారం (02-08-2026) నాడు ఏపీలోని విజయనగరం, పార్వతీపురం మన్యం, అల్లూరి సీతారామరాజు, పోలవరం, ఎన్టీఆర్, బాపట్ల, గుంటూరు, పల్నాడు, కర్నూలు జిల్లాల్లో పలుచోట్ల తేలికపాటి నుంచి మోస్తరు వర్షాలు కురిసే అవకాశం ఉందని వాతావరణశాఖ అధికారులు వెల్లడించారు.</p>
<p><strong>తెలంగాణలో రెండు రోజులపాటు వర్ష సూచన</strong></p>
<p>రెండు రోజులపాలు తెలంగాణ వ్యాప్తంగా పలు జిల్లాల్లో తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశముందని హైదరాబాద్ వాతావరణ కేంద్రం తెలిపింది. ఈ క్రమంలో వాతావరణ శాఖ (IMD) రాష్ట్రానికి ఎల్లో అలర్ట్ జారీ చేసింది. గంటకు 40 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది.</p>
<p>హైదరాబాద్‌తో పాటు రంగారెడ్డి, మేడ్చల్, మెదక్, సంగారెడ్డి, వికారాబాద్ సహా మొత్తం 18 జిల్లాలకు వర్ష సూచన ఉంది. అలాగే సిద్దిపేట, జనగాం, నాగర్‌కర్నూల్, మహబూబాబాద్ జిల్లాల ప్రజలు అప్రమత్తంగా ఉండాలని అధికారులు కోరారు. ఉరుములు, మెరుపులు వస్తున్న సమయంలో సురక్షిత ప్రాంతాల్లో ఉండాలని, చెట్ల కింద నిలబడవద్దని వాతావరణశాఖ హెచ్చరించింది. </p>
<p><strong>భద్రాచలం వద్ద తగ్గిన గోదావరి ఉధృతి</strong></p>
<p>వర్షాలు తగ్గడంతో నదులకు వరద ప్రవాహం తగ్గుతోంది. గోదావరి నది వరద ఉధృతి భద్రాచలం వద్ద స్వల్పంగా తగ్గుముఖం పట్టినట్లు ఏపీ విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. భద్రాచలం నుంచి వస్తున్న నీటి ప్రవాహం ధవళేశ్వరం బ్యారేజి వద్ద దాదాపు 15 లక్షల క్యూసెక్కుల వరకు చేరిన తర్వాత, ఆదివారం రాత్రి నుంచి వరద క్రమంగా తగ్గే అవకాశం ఉందని ఆయన వెల్లడించారు. శనివారం రాత్రి 9 గంటల సమయానికి భద్రాచలం వద్ద నీటిమట్టం 54.3 అడుగులకు చేరగా, కూనవరం వద్ద 21.4 మీటర్లు, పోలవరం వద్ద 13.19 మీటర్లుగా నమోదైంది.</p>
<p>ప్రస్తుతం ధవళేశ్వరం సార్ ఆర్థర్ కాటన్ బ్యారేజ్ వద్ద నీటిమట్టం 13.90 అడుగులకు చేరడంతో రెండో ప్రమాద హెచ్చరికను కొనసాగిస్తున్నారు. ఇక్కడ ఇన్ ఫ్లో, ఔట్ ఫ్లో దాదాపు 13,16,221 క్యూసెక్కులుగా ఉంది. వరద ముంపునకు గురైన ప్రాంతాల్లో తక్షణ సహాయక చర్యలు అందించేందుకు గాను 3 ఎన్డీఆర్ఎఫ్ (NDRF), 3 ఎస్డీఆర్ఎఫ్ (SDRF) బృందాలను రంగంలోకి దించినట్లు అధికారులు స్పష్టం చేశారు.</p>
<p>వరద తీవ్రత పూర్తి స్థాయిలో తగ్గే వరకు లంక గ్రామాలు, లోతట్టు ప్రాంతాల ప్రజలు అత్యంత అప్రమత్తంగా ఉండాలని విపత్తుల నిర్వహణ సంస్థ సూచించింది. ఉప్పొంగి ప్రవహిస్తున్న వాగులు, కల్వర్టులు, కాజ్‌వేలను దాటేందుకు ఎవరూ సాహసించవద్దని హెచ్చరించారు. అలాగే నదులు, కాలువల్లోకి స్నానాల కోసం గానీ, ఈతకు గానీ లేదా చేపల వేటకు గానీ వెళ్లకూడదని స్పష్టం చేశారు.</p>
2 months ago
6 
