<p>Rahul Gandhi 16 riddle in Loksabha: లోక్‌సభలో ప్రతిపక్ష నేత రాహుల్ గాంధీ 16 అనే సంఖ్యను ప్రస్తావిస్తూ ప్రధానమంత్రి <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a>పై చేసిన విమర్శలు సభలో ఆసక్తికర చర్చకు దారితీశాయి. నిన్నటి సభలో ప్రధాని ప్రసంగాన్ని తాను గమనించానని, ఆయనలో ఉత్సాహం లోపించిందని, మాటల్లో స్పష్టత లేదని రాహుల్ వ్యాఖ్యానించారు. ప్రధాని ఎందుకు అలా నీరసంగా ఉన్నారో అర్థం కాక ఆలోచిస్తుండగా, తన ఫోన్‌లో తేదీ చూడగా అది ఏప్రిల్ 16 అని కనిపించిందని, ఆ 16 సంఖ్యలోనే అన్ని సమాధానాలు ఉన్నాయని ఆయన పేర్కొన్నారు.</p>
<p>మహిళా రిజర్వేషన్లు, డీలిమిటేషన్ బిల్లును ప్రస్తుత తరుణంలో తీసుకురావడం ప్రభుత్వానికి ఒక పెద్ద తప్పిదమని, ఆ విషయం ప్రభుత్వానికి కూడా అర్థమైందని రాహుల్ గాంధీ విమర్శించారు. అందుకే ప్రధాని ముఖంలో ఆందోళన కనిపిస్తోందని, ఈ బిల్లు వల్ల తలెత్తబోయే పరిణామాలను చూసి ప్రభుత్వం భయపడుతోందని ఎద్దేవా చేశారు. ఈ మొత్తం చిక్కుముడికి 16వ తేదీనే సమాధానమని ఆయన నిగూఢంగా వ్యాఖ్యానించారు.<br /> <br />రాహుల్ గాంధీ 16 సంఖ్యను ఒక చిక్కుముడిలా ప్రస్తావించడం వెనుక లోతైన రాజకీయ వ్యూహం ఉందని విశ్లేషకులు భావిస్తున్నారు. ప్రధానంగా ఏప్రిల్ 16వ తేదీన మహిళా రిజర్వేషన్ చట్టం 2023ను ప్రభుత్వం హడావిడిగా నోటిఫై చేయడంపై ఆయన వ్యంగ్యాస్త్రాలు సంధించారు. పార్లమెంటులో బిల్లుపై చర్చ జరుగుతుండగానే, నోటిఫికేషన్ విడుదల చేయడం ద్వారా ప్రభుత్వం సభను తక్కువ చేసి చూపిస్తోందని, ఈ 16వ తేదీనే ప్రభుత్వ పతనానికి, వారి తప్పుడు నిర్ణయాలకు సంకేతమని ఆయన పరోక్షంగా హెచ్చరించారు.</p>
<p>మరో ఆసక్తికరమైన కోణం ఏమిటంటే.. ప్రస్తుత సంకీర్ణ ప్రభుత్వంలో కీలక భాగస్వామిగా ఉన్న తెలుగుదేశం పార్టీ బలాన్ని <a title="రాహుల్ గాంధీ" href="https://telugu.abplive.com/topic/Rahul-Gandhi" data-type="interlinkingkeywords">రాహుల్ గాంధీ</a> ఈ సంఖ్య ద్వారా గుర్తుచేశారనే చర్చ నడుస్తోంది. లోక్‌సభలో టీడీపీకి ఉన్న 16 మంది ఎంపీల మద్దతుపైనే కేంద్ర ప్రభుత్వం నిలబడి ఉందని, ఆ 16 మంది సభ్యులు తలచుకుంటే ఏ క్షణమైనా పరిస్థితి మారిపోవచ్చనే అర్థం వచ్చేలా ఆయన వ్యాఖ్యలు ఉన్నాయని రాజకీయ వర్గాల్లో ప్రచారం జరుగుతోంది. <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a> నాయుడు నేతృత్వంలోని <a title="టీడీపీ" href="https://telugu.abplive.com/topic/tdp" data-type="interlinkingkeywords">టీడీపీ</a> ఎంపీల సంఖ్యే ప్రభుత్వానికి లైఫ్ లైన్ అని ఆయన పరోక్షంగా గుర్తుచేశారు. </p>
<blockquote class="twitter-tweet">
<p dir="ltr" lang="en">VIDEO | In Lok Sabha, LoP Rahul Gandhi says, "Yesterday I was watching the Prime Minister speak. Low energy, broken, nothing transmitting, and I suddenly noticed that yesterday was the 16th of April... He was not able to engage because clearly trying to pass this bill was a… <a href="https://t.co/UKbggr71H0">pic.twitter.com/UKbggr71H0</a></p>
— Press Trust of India (@PTI_News) <a href="https://twitter.com/PTI_News/status/2045081676125261941?ref_src=twsrc%5Etfw">April 17, 2026</a></blockquote>
<p>అంతేకాకుండా, ఈ 16వ తేదీనే దక్షిణాది రాష్ట్రాల భవిష్యత్తును తేల్చే నియోజకవర్గాల పునర్విభజన చర్చలు ఊపందుకోవడం కూడా ఒక కారణం కావచ్చని విశ్లేషణలు వస్తున్నాయి. దక్షిణాది రాష్ట్రాల ఉనికిని దెబ్బతీసేలా ప్రభుత్వం అడుగులు వేస్తోందని, దానికి ఏప్రిల్ 16వ తేదీ ఒక సాక్ష్యమని రాహుల్ అభిప్రాయపడ్డారు. మొత్తం మీద, రాహుల్ ప్రస్తావించిన ఆ 16 సంఖ్య అటు ప్రభుత్వానికి ఉన్న మెజారిటీని, ఇటు దక్షిణాది రాష్ట్రాల ప్రయోజనాలను ఒకేసారి గుర్తు చేస్తూ అధికార పక్షంలో గుబులు రేపిందని భావిస్తున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/news/this-is-how-you-order-food-on-the-train-244510" width="631" height="381" scrolling="no"></iframe></p>
1 month ago
6 
