<p>Prisoner Wins Gold Medal: నేరస్థులుగా మారిన వారందరికీ జీవితం ముగిసిపోదు, సరైన దిశానిర్దేశం, పట్టుదల ఉంటే జైలు గోడల వెనుక కూడా అద్భుతాలు సృష్టించవచ్చు అని నిరూపించారు రాజమహేంద్రవరం కేంద్ర కారాగారానికి చెందిన ఖైదీ ఎన్. సురేష్. జైలు జీవితాన్ని అనుభవిస్తూనే, చదువుపై ఉన్న మక్కువతో ఆయన చేసిన కృషి నేడు దేశవ్యాప్తంగా ప్రశంసలు అందుకుంటోంది. డా. బి.ఆర్. అంబేడ్కర్ ఓపెన్ యూనివర్సిటీ నిర్వహించిన బీఏ (BA) పరీక్షల్లో తెలుగు రాష్ట్రాల పరిధిలోనే అత్యధిక మార్కులు సాధించి ప్రతిష్టాత్మక గోల్డ్ మెడల్‌ను సొంతం చేసుకున్నారు.</p>
<h3>గవర్నర్ చేతుల మీదుగా పురస్కారం </h3>
<p>హైదరాబాద్‌ జూబ్లీహిల్స్‌లోని అంబేడ్కర్ ఓపెన్ యూనివర్సిటీ క్యాంపస్ ఆడిటోరియంలో బుధవారం ఘనంగా జరిగిన స్నాతకోత్సవ కార్యక్రమంలో ఈ పురస్కారాన్ని అందజేశారు. తెలంగాణ గవర్నర్ శివ్ ప్రతాప్ శుక్లా చేతుల మీదుగా ఎన్. సురేష్ గోల్డ్ మెడల్, బుక్ ప్రైజ్‌ను అందుకున్నారు. ఒక ఖైదీ యూనివర్సిటీ స్థాయిలో టాపర్‌గా నిలిచి గవర్నర్ చేతుల మీదుగా పురస్కారం అందుకోవడం నిజంగా అరుదైన ఘనత.</p>
<h3>విద్యతోనే మార్పు </h3>
<p>రాజమహేంద్రవరం కేంద్ర కారాగారం సూపరింటెండెంట్ డా. వి. సన్యాసిరావు మాట్లాడుతూ.. జైలులో శిక్ష అనుభవిస్తున్న ఖైదీలలో విద్య, నైపుణ్యాభివృద్ధి, వ్యక్తిత్వ వికాసాన్ని పెంపొందించడం ద్వారా వారిని సమాజంలో మంచి పౌరులుగా తీర్చిదిద్దడమే కారాగార శాఖ ప్రధాన ఉద్దేశం అన్నారు. సురేష్ సాధించిన ఈ విజయం జైళ్ల శాఖ చేస్తున్న కృషికి చక్కటి నిదర్శనమన్నారు. </p>
<p>సురేష్ విజయం వెనుక ఉన్న అధికారుల కృష్టిని గుర్తుచేస్తూ.. డీజీ, ఐజీ, డీఐజీ అధికారులకు, అలాగే అప్పటి రాజమహేంద్రవరం కేంద్ర కారాగారం సూపరింటెండెంట్ ఎస్. రాహుల్ అందించిన మార్గదర్శకత్వం, ప్రోత్సాహం, సహకారానికి సన్యాసిరావు కృతజ్ఞతలు తెలిపారు.</p>
<h3>ఇతర ఖైదీలకు ఆదర్శం </h3>
<p>జైలు అనగానే కేవలం శిక్ష అనే భావనను మార్చి, ఆ సమయాన్ని సద్వినియోగం చేసుకుని ఉన్నత విద్యను అభ్యసించవచ్చని సురేష్ నిరూపించారు. ఆయన పట్టుదల తోటి ఖైదీలలో స్ఫూర్తిని నింపింది. ఈ ఘనత రాజమహేంద్రవరం కేంద్ర కారాగార సిబ్బందికి కూడా ఎంతో గర్వకారణంగా నిలిచింది. </p>
3 weeks ago
2 
