<p><strong>Prateek Yadav death mystery:</strong> సమాజవాదీ పార్టీ వ్యవస్థాపకుడు ములాయం సింగ్ యాదవ్ చిన్న కుమారుడు ప్రతీక్ యాదవ్ మరణంపై పోస్టుమార్టం నివేదికలో కొన్ని కీలకమైన , అనుమానాస్పద అంశాలు వెలుగులోకి వచ్చాయి. ప్రాథమిక నివేదిక ప్రకారం, ఆయన ఊపిరితిత్తులలోని రక్తనాళాల్లో పెద్ద ఎత్తున రక్తం గడ్డకట్టడం వల్ల గుండె, శ్వాస వ్యవస్థలు ఆగిపోయి మరణించినట్లు వైద్యులు నిర్ధారించారు. అయితే, ఆయన శరీరంతో పాటు ఊపిరితిత్తుల్లో లభించిన గడ్డకట్టిన రక్తాన్ని మరింత లోతుగా విశ్లేషించేందుకు హిస్టోపాథాలజికల్ పరీక్షల కోసం భద్రపరిచారు. అత్యంత అనుమానాస్పదమైన విషయం ఏమిటంటే, ప్రతీక్ యాదవ్ శరీరంపై 6 అంతర్గత గాయాలు ఉన్నట్లు పోస్టుమార్టం నివేదికలో తేలింది. వీటిలో మూడు గాయాలు మరణానికి సుమారు 5 నుండి 7 రోజుల ముందు తగిలినవి కాగా, మిగిలిన మూడు గాయాలు మరణానికి ఒక రోజు ముందు తగిలినవిగా గుర్తించారు. ఛాతి, భుజం కింద ,మణికట్టు భాగాల్లో ఉన్న ఈ గాయాలు ఎలా తగిలాయనే దానిపై స్పష్టత లేకపోవడంతో సస్పెన్స్ నెలకొంది. ఈ గాయాల వెనుక ఉన్న కారణాలను తెలుసుకోవడానికి ఫోరెన్సిక్, కెమికల్ అనాలిసిస్ రిపోర్టుల కోసం అధికారులు ఎదురుచూస్తున్నారు.<br /> <br />2003లో ములాయం సింగ్ మొదటి భార్య మాలతీ దేవి మరణించిన తర్వాతే, సాధనా గుప్తా, ప్రతీక్ యాదవ్‌ల ఉనికి ప్రపంచానికి తెలిసింది. అంతకుముందు దశాబ్దకాలం పాటు ఈ బంధం ఒక రహస్యంగానే సాగింది. ప్రతీక్ పేరు బయటకు రావడంతో ఎస్పీలో రెండు వర్గాలు ఏర్పడ్డాయి. ఒక వర్గం అఖిలేష్‌కు మద్దతుగా నిలిస్తే, మరో వర్గం సాధనా గుప్తా ప్రభావంతో ప్రతీక్‌ను రాజకీయాల్లోకి తీసుకురావాలని ప్రయత్నించింది. ముఖ్యంగా ములాయం తమ్ముడు శివపాల్ యాదవ్ , అఖిలేష్ మధ్య జరిగిన ఆధిపత్య పోరాటంలో ప్రతీక్ పేరు తరచుగా వినిపించేది.</p>
<p>తల్లి సాధనా గుప్తా , బాబాయ్ శివపాల్ యాదవ్ ఒత్తిడి చేసినప్పటికీ, ప్రతీక్ యాదవ్ రాజకీయాల్లోకి రావడానికి ఎప్పుడూ ఆసక్తి చూపలేదు. ఆయన తన జీవితాన్ని ఫిట్‌నెస్, రియల్ ఎస్టేట్ వ్యాపారానికే అంకితం చేశారు. లక్నోలో జిమ్ నెట్‌వర్క్ నడుపుతూ, బాడీ బిల్డింగ్‌లో తనదైన గుర్తింపు తెచ్చుకున్నారు. 2012లో అజంగఢ్ నుంచి పోటీ చేయాలని పార్టీ కార్యకర్తలు డిమాండ్ చేసినా ఆయన సున్నితంగా తిరస్కరించారు. రాజకీయ గొడవలకు దూరంగా ఉండాలని కోరుకున్నా, కుటుంబ రాజకీయాలు ఆయనను వదల్లేదు. </p>
<blockquote class="twitter-tweet">
<p dir="ltr" lang="en">Big revelation in Prateek Yadav’s postmortem report 😞<br /><br />The postmortem report of Prateek Yadav, son of Mulayam Singh Yadav, has revealed the reason behind his sudden death.<br /><br />According to the report, a blood clot had formed in the lower part of his body. Over time, the clot moved… <a href="https://t.co/irlmttQNGm">pic.twitter.com/irlmttQNGm</a></p>
— Ajay Kumar (@AjayKumaarJi) <a href="https://twitter.com/AjayKumaarJi/status/2054559208557920574?ref_src=twsrc%5Etfw">May 13, 2026</a></blockquote>
<p>
<script src="https://platform.twitter.com/widgets.js" async="" charset="utf-8"></script>
<br />ప్రతీక్ యాదవ్ వ్యక్తిగత జీవితం కూడా ఎన్నో ఒడిదుడుకులతో సాగింది. 2011లో అపర్ణా బిష్త్‌ను వివాహం చేసుకున్న ప్రతీక్, ఆమె 2022లో ఎస్పీని వీడి <a title="బీజేపీ" href="https://telugu.abplive.com/topic/BJP" data-type="interlinkingkeywords">బీజేపీ</a>లో చేరడంతో ఇబ్బందికర పరిస్థితులను ఎదుర్కొన్నారు. అపర్ణ నిర్ణయం కుటుంబంలో చీలిక తెచ్చిందని ప్రతీక్ భావించేవారు. ఈ ఏడాది జనవరిలో ఆమెపై ఇన్‌స్టాగ్రామ్ వేదికగా తీవ్ర విమర్శలు చేస్తూ.. నా కుటుంబ సంబంధాలను నాశనం చేసిన స్వార్థపరురాలు, త్వరలోనే విడాకులు ఇస్తాను అని సంచలన పోస్ట్ చేశారు. అయితే, ఆ తర్వాత కొద్దిరోజులకే మళ్ళీ రాజీ పడ్డారు.<br /> <br />ముప్పై ఎనిమిదేళ్ల చిన్న వయసులోనే ప్రతీక్ యాదవ్ మరణించడం యాదవ్ కుటుంబంలో తీరని లోటును మిగిల్చింది. ములాయం వారసుడిగా రాజకీయాల్లో చక్రం తిప్పే అవకాశం ఉన్నా, తనకంటూ ఒక ప్రత్యేక ప్రపంచాన్ని నిర్మించుకున్న ప్రతీక్ ప్రస్థానం విషాదాంతమైంది. ఆయన మరణం చుట్టూ ఉన్న రహస్యాలు , కుటుంబ కలహాలు మరోసారి యూపీ రాజకీయాల్లో చర్చకు దారితీస్తున్నాయి. </p>
<p> </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/why-is-salt-added-to-toothpaste-247179" width="631" height="381" scrolling="no"></iframe></p>
3 weeks ago
4 
