<p>Petrol Diesel Price Hike | పశ్చిమ ఆసియాలో ఇరాన్, అమెరికా మధ్య కొనసాగుతున్న ఉద్రిక్తతలు పలు దేశాల్లో ఆర్థిక పరిస్థితిని దెబ్బతిస్తున్నాయి. ఆ యుద్ధ ప్రభావం భారతదేశంపై సైతం కనిపిస్తోంది. మే నెలలో పెట్రోల్, డీజిల్ ధరలను 4 సార్లు పెంచారు. ఒక్క నెలలోనే పెట్రోల్, డీజిల్ ధర దాదాపు 10 వరకు పెరిగి సామాన్యుడికి మరింత భారంగా మారింది. మిడిల్ ఈస్ట్‌లో నెలకొన్న ఉద్రిక్తతల కారణంగా గత నాలుగేళ్ల సుదీర్ఘ విరామం తర్వాత ఆయిల్ కంపెనీలు ఇంధన ధరలు పెంచేశాయి. </p>
<p>అయితే, భారత్‌లో గత నెల పెట్రోల్, డీజిల్ పెంచినప్పటికీ ప్రభుత్వ చమురు కంపెనీలకు నష్టాలు పూర్తిగా తగ్గలేదు. ఇప్పటికీ పెట్రోల్‌పై లీటరుకు సుమారు 5.5 రూపాయలు, డీజిల్‌పై సుమారు 4.5 రూపాయాలు నష్టం వస్తోంది. కంపెనీలకు ప్రతిరోజూ మొత్తంగా 550 నుంచి 600 కోట్ల కంటే ఎక్కువ నష్టం ఇంకా జరుగుతోంది. ఇది లాంగ్ టర్మ్‌లో పరిస్థితిని మరింత దెబ్బతీస్తుంది. </p>
<p><strong>మరో రూ.5 పెరుగుతుందా?</strong><br />చమురు కంపెనీలు ‘నో ప్రాఫిట్, నో లాస్’ స్టేజ్‌కు చేరుకోవాలంటే, రిటైల్ ధరలలో లీటరుకు మరో రూ. 5 పెంపు చేయాల్సిన అవసరం ఉందని ICRA,ఆర్థిక విశ్లేషకులు భావిస్తున్నారు. ఈ పెంపును అవసరమని చెప్తున్నప్పటికీ, రిటైల్ స్థాయిలో ద్రవ్యోల్బణాన్ని అదుపులో ఉంచడానికి కేంద్ర ప్రభుత్వం చమురు కంపెనీలకు వెంటనే పూర్తి పెంపుదలకు పర్మిషన్ ఇవ్వకుండా సాధ్యమైనంత వరకు ప్రయత్నిస్తోంది. దీనికి ప్రత్యామ్నాయంగా కేంద్రం ఇటీవల ఎక్సైజ్ సుంకాన్ని (Excise Duty) కొంత తగ్గించి, ఆ భారాన్ని తానే భరించడానికి చర్యలు తీసుకుంది. </p>
<p><strong>క్రూడ్ ఆయిల్ ధరలు</strong><br />భారత్ తన అవసరాలకు దాదాపు 85 శాతం ముడి చమురును విదేశాల నుండి దిగుమతి చేసుకుంటుందని తెలిసిందే. ప్రస్తుతం బ్రెంట్ క్రూడ్ ధర బారెల్‌కు 92-95 డాలర్లుగా ఉంది. ఇరాన్, అమెరికా యుద్ధ వాతావరణంతో ఈ ధరలో స్వల్ప వ్యత్యాసం ఉంటుంది. భారత చమురు కంపెనీలకు ఈ ధరల స్థాయి సాధారణమైనదే, వారికి రిటైల్ ధరలను వెంటనే పెంచాల్సిన అవసరం రాదు. ముడి చమురు ధర బారెల్‌కు 100 డాలర్లు దాటి, కొన్ని రోజులు అదే స్థాయిలో కొనసాగితే మాత్రమే చమురు కంపెనీలపై ధరలు పెంచాలనే ఒత్తిడి వస్తుంది. బ్రెంట్ క్రూడ్ బారెల్ 100 డాలర్లకు తక్కువగా కొనసాగితే మాత్రమే ధరల పెంపు ఉండదని భావిస్తున్నారు. </p>
1 hour ago
1 
