<p><strong>Nuvvu leka Neanu Lenu Serial Today Episode</strong>: స్టార్ మా ఛానెల్‌లో అత్యంత ప్రేక్షక ఆదరణతో నడుస్తున్న నువ్వులేక నేనులేను సీరియల్‌లో ఈరోజు ఎపిసోడ్ ఆసక్తిగా సాగుతుంది. విక్కీ రాధను మోసం చేసి పెళ్లిచేసుకున్నాడని తెలుసుకున్న రామచంద్రం మేనల్లుడిని ఇంటి నుంచి బయటకు గెంటేస్తాడు. రాధను ఇంట్లో నుంచి పంపించేస్తాడేమోన అనుకుంటే ఇలా జరిగిందేంటని దమయంతి బాధపడుతుంది. ఎలాగైనా రాధను బయటకు పంపించేలా అన్నతో కలిసి మళ్లీ కుట్రలు మొదలుపెడుతుంది.<br /><strong>తప్పు తనపైనే వేసుకున్న విక్కీ</strong><br /> రాధ,విక్కీల పెళ్లి నిజమైన పెళ్లికాదని తెలియడంతో ఇంట్లో అందరూ విక్కీని చీదరించుకుంటారు. సునంద కొడుకుపై చేయిచేసుకుంటుంది. అసలు నీ ముఖం చూడాలంటేనే సిగ్గుగా ఉందంటూ నందగోపాల్ కొడుకును తిడతాడు. అసలు ఇలాంటి నీచమైన ఆలోచన ఎందుకు వచ్చిందంటూ అందరూ విక్కీని నిలదీస్తారు. ఎందుకంటే మనం వీడికి ప్రియాకు పెళ్లి చేయాలనుకున్నాం కదా దాని నుంచి తప్పించుకోవడానికే వీడు ఇలాంటి నాటకం ఆడాడని రామచంద్రం చెబుతాడు.వీడు ప్రేమ పెళ్లిచేసుకుని వస్తే మనం ప్రియకు వేరే పెళ్లి చేసి పంపిస్తామని భావించాడని...ఆ తర్వాత కాంట్రాక్ట్‌ పేపర్లు చూపించి ఆ రాధను కూడా వదిలించుకోవాలన్న దుర్మార్గపు ఆలోచన చేశాడని రామచంద్రం చెబుతాడు.అమాయకురాలైన ఓ అమ్మాయిని మోసం చేసి పెళ్లిచేసుకుని తీసుకురావడమేగాక..ఆమెను బెదిరించి మన అందరిముందు సంతోషంగా ఉన్నట్లు నాటకం ఆడాడని చెబుతాడు. ఇదంతా నిజమేనా అని తండ్రి విక్కీని అడగ్గా...నిజమేనని చెబుతాడు.ఇందులో రాధ తప్పు ఏం లేదని నేనే ఆమెను ఒప్పించి ఈ పెళ్లి చేసుకున్నానని చెబుతాడు.అప్పటికీ తను వద్దని వారించిందని...కానీ ఆమె అవసరాన్ని ఆసరగా చేసుకుని నేనే ఈ పని చేశానని చెబుతాడు.<br /><strong>తన తప్పు కూడా ఉందన్న రాధ</strong><br /> ఇందులో విక్రమ్‌కృష్ణగారి తప్పు ఎంత ఉందో నా తప్పు కూడా అంతే ఉందని రాధ అంటుంది. నేను ఒప్పుకోకుంటే ఈపెళ్లి జరిగేది కాదని అంటుంది.కాబట్టి నేనే ఇందుకు బాధ్యురాలినని ఏడుస్తుంది. ఇంతలో గురూజీ కల్పించుకుని ఓ ఆడపిల్ల అవసరాన్ని అడ్డుపెట్టుకుని ఈ నీచుడు ఎంతకు దిగజారాడో నాకు తెలుసమ్మా అని అంటాడు. నీ తండ్రిని కాపాడుకుందామన్న స్వార్థం తప్ప..ఇందులో నీ తప్పు ఏమాత్రం లేదని నాకు తెలుసమ్మా అని అంటాడు. మీనాన్నను జైలు నుంచి బయటకు తీసుకొస్తానని చెప్పి నమ్మించి నీ మెడలో తాళి కట్టాడని నాకు తెలుసునని అంటాడు. ఓ తండ్రి కోసం ఏ ఆడపిల్ల చేయని త్యాగం నువ్వు చేశావని అంటాడు. దీంతో రాధ తల్లి పద్మ కల్పించుకుని ఇలాంటి పని చేస్తే రేపు నీకు పెళ్లి ఎలా అవుతుందనుకున్నావని నిలదీస్తుంది. మన ఇంటి పరువు ఏమైపోతుందో కూడా ఆలోచించలేదా అని మండిపడుతుంది.<br /><strong>విక్కీని ఇంటి నుంచి గెంటేసిన రామచంద్రం</strong><br /> నేను తప్పు చేశానని క్షమించమని విక్కీ వాళ్ల మేనమామను వేడుకుంటాడు. నువ్వు చేసిన పనికి నీ కన్న తల్లిదండ్రులే సిగ్గుతో తలదించుకున్నారని...ఇక నేను ఎలా క్షమిస్తానని అనుకుంటున్నావని రామచంద్రం అంటాడు. తప్పు చేసిన వాడు తనవాడు అయినా ఈ రామచంద్రం క్షమించడని నీకు తెలియదా అని అంటాడు. నీ ముఖం చూడాలంటేనే అసహ్యంగా ఉందని మర్యాదగా బయటకు వెళ్లిపొమ్మని అంటాడు.ఆ మాటలకు అందరూ షాక్ తింటారు. బయట నుంచి వచ్చిన దాన్ని నేనని...వెళ్లిపోవాల్సింది నేనని రాధ అంటుంది.ఆయన ఈ ఇంటి బిడ్డని...కాబట్టి నేనే వెళ్లిపోతానని రాధ అంటుంది. నేను ఓ నిర్ణయం తీసుకున్న తర్వాత దేవుడు దిగివచ్చి చెప్పినా వినని రామచంద్రం అంటాడు.ఇందులో నీ తప్పు లేదని రాధను ఓదార్చి మేనల్లుడిని చొక్కాపట్టుకుని బయటకు గెంటేస్తాడు.<br /><strong>బెడిసికొట్టిన దమయంతి వ్యూహం</strong><br /> విక్కీ,రాధల దొంగ పెళ్లి గురించి తెలిసి రామచంద్రం రాధను గెంటేస్తాడని భావిస్తే అనూహ్యంగా విక్కీని ఇంట్లో నుంచి వెళ్లగొట్టడంతో దమయంతి,ప్రియకు మింగుడుపడదు. ఎలాగైనా రాధను ఇంట్లో నుంచి బయటకు వెళ్లగొట్టి అటునుంచే పైకి పంపించాలని మళ్లీ భవానీ శంకర్‌తో కలిసి ప్లాన్‌ వేస్తుంది.ఆ రాధ ఇంట్లోనే ఉంటే ఏదో మాయ చేసి మళ్లీ విక్కీని కూడా ఇంట్లోకి తీసుకొస్తుందని దమయంతి భయపడుతుంది. పైగా తండ్రీకూతుళ్లు కలిసిపోతారామోనని ఆందోళన చెందుతుంది.</p>
1 month ago
3 
