<p><strong>Sunil Gavaskar Praises Emergence Of Young Allrounder Nitish Reddy: </strong>అఫ్గానిస్తాన్‌తో ఢిల్లీలోని అరుణ్ జైట్లీ స్టేడియంలో జరిగిన రెండో టీ20 మ్యాచ్‌లో టీమ్ ఇండియా యువ ఆల్‌రౌండర్ నితీష్ కుమార్ రెడ్డి అద్భుతమైన ప్రదర్శనతో ఆకట్టుకున్నాడు. మూడు ఓవర్లలో కేవలం 24 పరుగులు మాత్రమే ఇచ్చి మూడు కీలక వికెట్లు పడగొట్టి భారత విజయంలో ప్రధాన పాత్ర పోషించాడు. హార్దిక్ పాండ్యా తర్వాత భారత జట్టుకు అత్యుత్తమ పేస్ బౌలింగ్ ఆల్‌రౌండర్‌గా నితీష్ ఎదుగుతున్న తీరుపై బ్యాటింగ్ దిగ్గజం సునీల్ గవాస్కర్ ప్రశంసలు కురిపించాడు. "నితీష్ కుమార్ రెడ్డి చాలా అద్భుతమైన భవిష్యత్ ఉన్న ఆటగాడు. ఐపీఎల్ తొలి సీజన్ ఆరంభంలో అతడు కేవలం బ్యాటర్ మాత్రమే. ఆస్ట్రేలియా పర్యటనకు వెళ్లే ముందు అతడి బ్యాటింగ్ టెక్నిక్ చాలా బాగుండేది. అయితే ఆ సీజన్ చివరి మ్యాచ్‌ల్లో అతడు వేసిన కొన్ని ఓవర్లే అతడిలో ఒక నాణ్యమైన ఆల్‌రౌండర్ దాగి ఉన్నాడని నిరూపించాయి" అని తాజా చర్చలో గవాస్కర్ తెలిపాడు. </p>
<p>Read Also: <a title="BCCI Selector Race: అగార్కర్‌కు గుడ్‌బై చెప్పేందుకు బోర్డు రెడీ.. చీఫ్ సెలెక్టర్ పీఠంపై కన్నేసిన ఆ ఇద్ద‌రు.." href="https://telugu.abplive.com/sports/cricket/parthiv-patel-and-pragyan-ojha-emerge-frontrunners-for-chief-selector-post-259133" target="_self">BCCI Selector Race: అగార్కర్‌కు గుడ్‌బై చెప్పేందుకు బోర్డు రెడీ.. చీఫ్ సెలెక్టర్ పీఠంపై కన్నేసిన ఆ ఇద్ద‌రు..</a></p>
<p><strong>వెంకటేష్ అయ్యర్, సూర్యాంశ్ షెడ్గేలపై ఫోకస్..</strong><br />భారత జట్టు భవిష్యత్తు కోసం వెంకటేష్ అయ్యర్, సూర్యాంశ్ షెడ్గేలను కూడా ఆల్‌రౌండర్లుగా తీర్చిదిద్దాలని గవాస్కర్ సూచించాడు. "వీరిద్దరూ ఎంతో ప్రతిభావంతులు. వారిని హడావుడిగా జట్టులోకి తీసుకురాకుండా తగిన సమయం ఇచ్చి తీర్చిదిద్దాలి. విఫలమైనప్పుడు మద్దతుగా నిలవాలి. జట్టులో ప్రధానంగా బ్యాటర్లుగా ఉండే ఆటగాళ్లు బ్యాటర్ ఆలోచనా ధోరణిలోనే ఉంటారు. కానీ వారు బౌలింగ్‌ను కూడా సీరియస్‌గా తీసుకుని బౌలర్లలా ఆలోచించడం మొదలుపెడితే భారత జట్టుకు మరిన్ని ఆప్షన్లు అందుబాటులోకి వస్తాయి" అని పేర్కొన్నాడు.</p>
<p>Read Also: <a title="Dhoni CSK Stake: CSKలో 25 శాతం వాటా అడిగాడా..? ధోని షేర్ల వ్యవహారంపై మేనేజ్‌మెంట్ క్లారిటీ!!" href="https://telugu.abplive.com/sports/ipl/csk-dismisses-reports-on-ms-dhoni-seeking-ownership-stake-258775" target="_self">Dhoni CSK Stake: CSKలో 25 శాతం వాటా అడిగాడా..? ధోని షేర్ల వ్యవహారంపై మేనేజ్‌మెంట్ క్లారిటీ!!</a></p>
<p><strong>గాయాల నుంచి విజయతీరాలకు.. నితీష్ రెడ్డి ప్రయాణం</strong><br />సన్‌రైజర్స్ హైదరాబాద్ తరఫున ఐపీఎల్‌లో అద్భుత ప్రదర్శన కనబరిచిన తర్వాత నితీష్ తీవ్రమైన గాయాల బారిన పడ్డాడు. 2026 సీజన్‌లో 13 ఇన్నింగ్స్‌ల్లో 302 పరుగులు చేయడంతో పాటు గంటకు 140 కిలోమీటర్ల వేగంతో బంతులు విసిరి 8 వికెట్లు తీశాడు. అయితే క్వాడ్రిసెప్స్ గాయం కారణంగా బెంగళూరులోని సెంటర్ ఆఫ్ ఎక్సలెన్స్‌లో నెలల తరబడి పునరావాసం పొందాల్సి వచ్చింది. దీనివల్ల ఐర్లాండ్, ఇంగ్లాండ్, జింబాబ్వే టూర్లకు దూరమయ్యాడు. హార్దిక్ పాండ్యాకు సరైన ప్రత్యామ్నాయంగా ఎదుగుతున్న సమయంలో వచ్చిన ఈ గాయాలు అతడి ప్రాక్టీస్ సమయాన్ని దూరం చేశాయి.</p>
<p><strong>తొలి మ్యాచ్ వైఫల్యాన్ని దాటి అద్భుత స్పెల్.. దేవుడిపై నమ్మకం</strong><br />మొదటి టీ20లో రెండు ఓవర్లలో 30 పరుగులు ఇచ్చి నిరాశపరిచిన నితీష్, రెండో మ్యాచ్‌లో ఇబ్రహీం జద్రాన్, గుల్బదిన్ నైబ్, రషీద్ ఖాన్‌లను ఔట్ చేసి సత్తా చాటాడు. "గాయం నుంచి కోలుకుని వచ్చినప్పుడు ప్రతీ ఆటగాడికి ఆత్మ‌విశ్వాసం అవసరం. మొదటి మ్యాచ్ బాగా సాగకపోయినా మానసికంగా పాజిటివ్‌గా ఉండి కష్టపడితే సరైన సమయంలో దేవుడు ఫలితాన్ని ఇస్తాడు. ఈ ప్రదర్శన రాబోయే రోజులకు ఎంతో కాన్ఫిడెన్స్ ఇచ్చింది" అని బీసీసీఐ వీడియోలో నితీష్ పేర్కొన్నాడు.</p>
1 month ago
3 
