<p><strong>NHAI , FASTag Updates :</strong> భారతదేశంలోని జాతీయ రహదారులపై ప్రయాణించే వాహనదారులకు నేషనల్ హైవేస్ అథారిటీ ఆఫ్ ఇండియా (NHAI) కీలక ఆదేశాలు జారీ చేసింది. ఎలక్ట్రానిక్ టోల్ వసూలు వ్యవస్థను మరింత పటిష్టం చేసే దిశగా అడుగులు వేస్తోంది. ఇందులో భాగంగా ఫాస్టాగ్ (FASTag) జారీ చేసే అన్ని బ్యాంకులకు ఒక ముఖ్యమైన నోటీసు పంపింది. ఫాస్టాగ్ అకౌంట్లకు అనుసంధానమైన వాహన రిజిస్ట్రేషన్ నంబర్లను (VRNs) వెంటనే వెరిఫై చేయాలని ఆదేశించింది. టోల్ ప్లాజాల వద్ద ఫాస్టాగ్ స్కానర్లు రీడ్ చేస్తున్న నంబర్, వాహనం నంబర్ ప్లేట్ పై ఉన్న నంబర్ వేరువేరుగా ఉన్నట్లు అనేక ఫిర్యాదులు రావడమే దీనికి ప్రధాన కారణం.</p>
<p><strong>ఎందుకు ఈ నిర్ణయం?</strong><br />టోల్ వసూళ్లలో జరుగుతున్న అవకతవకలను అరికట్టడానికి ఎన్‌హెచ్‌ఏఐ ఈ నిర్ణయం తీసుకుంది. రిజిస్ట్రేషన్ నంబర్లలో తేడాల వల్ల టోల్ ఆదాయానికి గండి పడటమే కాకుండా, మోటార్ వాహనాల చట్టం 1988 ప్రకారం జరిమానాలు పడే అవకాశం కూడా ఉందని అధికారులు పేర్కొంటున్నారు. ముఖ్యంగా వాహన్ (VAHAN) డేటాబేస్‌తో అనుసంధానం కాకముందు జారీ చేసిన పాత ఫాస్టాగ్ లలో ఈ సమస్య ఎక్కువగా కనిపిస్తోంది. ఆ సమయంలో వెరిఫికేషన్ ప్రక్రియ అంతా మాన్యువల్‌గా జరగడం వల్ల వాహన డేటాలో తప్పులు దొర్లాయి. ఇప్పుడు ఆ తప్పులను సరిదిద్దడంపై ప్రభుత్వం సీరియస్‌గా దృష్టి సారించింది.</p>
<p><strong>రాబోయే టెక్నాలజీ కోసం సన్నద్ధం..</strong><br />త్వరలో అందుబాటులోకి రానున్న ‘మల్టీ-లేన్ ఫ్రీ ఫ్లో’ (MLFF) టోలింగ్ విధానం కోసం పక్కా వెహికల్ ఐడెంటిఫికేషన్ చాలా ముఖ్యం. ఈ కొత్త సిస్టమ్‌లో వాహనాలు ఆపకుండానే టోల్ వసూలు జరుగుతుంది. నిబంధనలు ఉల్లంఘించే వారికి ఎలక్ట్రానిక్ నోటీసులు పంపాలన్నా వాహనం వివరాలు ఖచ్చితంగా ఉండాలి. అందుకే ఫాస్టాగ్ నంబర్ మ్యాపింగ్ సరిగ్గా ఉండాలని ఎన్‌హెచ్‌ఏఐ నొక్కి చెప్పింది. వాహనదారుల రిజిస్ట్రేషన్ వివరాల్లో ఏవైనా లోపాలు ఉంటే వెంటనే సరిచేసుకోవడం మంచిది.</p>
<p><strong>బ్లాక్ లిస్ట్ ప్రమాదం..</strong><br />బ్యాంకులు తమ దగ్గర ఉన్న డేటాను క్షుణ్ణంగా పరిశీలించి తప్పుడు లేదా చెల్లని రిజిస్ట్రేషన్ నంబర్లతో ఉన్న ఫాస్టాగ్‌లను గుర్తించనున్నాయి. ప్రభుత్వ మార్గదర్శకాల ప్రకారం అటువంటి ఫాస్టాగ్‌లను వెంటనే బ్లాక్ లిస్ట్ చేయాలని ఎన్‌హెచ్‌ఏఐ స్పష్టం చేసింది. మీ ఫాస్టాగ్ వివరాలు సరిగ్గా లేకపోతే హైవేలపై ప్రయాణించేటప్పుడు ఇబ్బందులు ఎదురవుతాయి. టోల్ ప్లాజాల వద్ద ఇబ్బంది పడకుండా ఉండాలంటే మీ బ్యాంక్ యాప్ లేదా వెబ్‌సైట్ ద్వారా వివరాలను ఒకసారి చెక్ చేసుకోవడం ఉత్తమం. ఈ కఠిన నిర్ణయం వల్ల టోల్ వసూళ్లలో పారదర్శకత పెరుగుతుందని అధికారులు ఆశిస్తున్నారు.</p>
1 month ago
6 
