<p><strong>MS Dhoni Returns: </strong>చెన్నై సూపర్ కింగ్స్ (CSK) అభిమానుల్లో ఇప్పుడు కొత్త ఉత్సాహం నెలకొంది. ఐపీఎల్ 2026 సీజన్ ఆరంభంలో పంజాబ్ కింగ్స్‌తో జరగబోయే కీలక మ్యాచ్‌కు ముందు లెజెండరీ క్రికెటర్ ఎంఎస్ ధోనీ నెట్స్‌లో ప్రాక్టీస్ చేస్తూ కనిపించాడు. కాలు కండరాల గాయం (Calf Strain) కారణంగా రాజస్థాన్ రాయల్స్‌తో జరిగిన తొలి మ్యాచ్‌కు ఆయన దూరమయ్యాడు. కనీసం రెండు వారాల పాటు ధోనీ ఆటకు దూరంగా ఉంటారని భావించినప్పటికీ, సోషల్ మీడియాలో వైరల్ అవుతున్న వీడియోలో ఆయన కిట్‌బ్యాగ్ పట్టుకుని బ్యాటింగ్ ప్రాక్టీస్ చేస్తూ కనిపించడం విశేషం. ధోనీ ఫిట్‌నెస్‌పై అధికారిక ప్రకటన రాకపోయినా, ఆయన ప్రాక్టీస్ సెషన్‌లో పాల్గొనడం సీఎస్‌కే క్యాంప్‌లో పాజిటివ్ వైబ్స్ తెచ్చింది.</p>
<h3>హోమ్ గ్రౌండ్‌లో సత్తా చాటాల్సిందే..</h3>
<p>శుక్రవారం చెన్నై వేదికగా పంజాబ్ కింగ్స్‌తో జరిగే మ్యాచ్ సీఎస్‌కేకు చాలా కీలకం. రాజస్థాన్ రాయల్స్‌తో గౌహతిలో జరిగిన తొలి మ్యాచ్‌లో చెన్నై దారుణంగా ఓడిపోయింది. యువ ఆటగాళ్లతో నిండిన రుతురాజ్ సేన ఆ మ్యాచ్‌లో అన్ని విభాగాల్లోనూ విఫలమైంది. ఇప్పుడు స్వంత గడ్డపై ఆ పరాజయాన్ని మర్చిపోయి భారీ విజయంతో పుంజుకోవాలని చూస్తోంది. రీసెంట్ టీ20 వరల్డ్ కప్ అనుభవాల ప్రకారం చెన్నై పిచ్ బ్యాటింగ్‌కు అనుకూలంగా ఉండే అవకాశం ఉంది. ధోనీ నేరుగా మ్యాచ్ ఆడకపోయినా, డగౌట్‌లో ఉండి కెప్టెన్ రుతురాజ్ గైక్వాడ్‌కు సలహాలు ఇవ్వడం జట్టుకు పెద్ద బలంగా మారుతుంది.</p>
<h3>కీలక ఆటగాళ్ల పెర్ఫార్మెన్స్</h3>
<p>ఈ సీజన్ బిగ్గెస్ట్ సైనింగ్ సంజూ శాంసన్ తన డెబ్యూ మ్యాచ్‌లో నిరాశపరిచాడు. హోమ్ ఫ్యాన్స్ ముందు ఆయన భారీ ఇన్నింగ్స్ ఆడాలని పట్టుదలతో ఉన్నాడు. అటు డెవాల్డ్ బ్రెవిస్ సైడ్ స్ట్రెయిన్ గాయం నుండి ఇంకా కోలుకోలేదు, అత‌డు ఆడ‌టంపై స్పష్టత లేదు. ఇంపాక్ట్ ప్లేయర్‌గా వచ్చిన సర్ఫరాజ్ ఖాన్ కొన్ని మంచి షాట్లు ఆడి ఆకట్టుకున్నాడు. బౌలింగ్ విభాగంలో మ్యాట్ హెన్రీ, నూర్ అహ్మద్ తమ గ‌త వైభవాన్ని చాటుకోవాల్సి ఉంది. వైభవ్ సూర్యవంశీ వంటి యువ హిట్టర్లను కట్టడి చేయడం వీరికి పెద్ద సవాలుగా మారనుంది.</p>
<h3>ఫామ్‌లో ఉన్న పంజాబ్ కింగ్స్</h3>
<p>మరోవైపు శ్రేయస్ అయ్యర్, రికీ పాంటింగ్ ద్వయం పర్యవేక్షణలో పంజాబ్ కింగ్స్ అత్యంత పటిష్టంగా తయారైంది. గత మ్యాచ్‌లో గుజరాత్ టైటాన్స్‌ను ఓడించిన ఉత్సాహంలో ఉన్నారు. కూపర్ కాన్లీ నంబర్ త్రీ పొజిషన్‌లో అద్భుతంగా రాణిస్తున్నాడు. స్పిన్ విభాగంలో యుజ్వేంద్ర చాహల్ తన వైవిధ్యమైన బౌలింగ్‌తో ప్రత్యర్థులను కంగుతినిపిస్తున్నాడు. హర్‌ప్రీత్ బ్రార్‌ను తుది జట్టులోకి తీసుకోవడంపై పంజాబ్ ఆలోచిస్తోంది. ఇరు జట్ల మధ్య జరగబోయే ఈ పోరు క్రికెట్ అభిమానులకు అసలైన మజాను పంచడం ఖాయమ‌ని విశ్లేష‌కులు భావిస్తున్నారు.</p>
1 week ago
2 
