<p><strong>MG Majestor India Launch on April 20:</strong> ఇండియ‌న్ ఎస్‌యూవీ (SUV) ప్రియులకు ఎంజీ మోటార్ ఇండియా ఒక తీపి కబురు చెప్పింది. వచ్చే వారం అంటే ఏప్రిల్ 20, 2026 రోజున‌ తన సరికొత్త ప్రీమియం మోడల్ 'మెజెస్టర్'ను లాంచ్ చేయడానికి సిద్ధమైంది. గతేడాది భారత్ మొబిలిటీ ఎక్స్‌పోలో మెరిసిన ఈ కారు, నిజానికి గ్లోస్టర్‌కు అప్‌డేటెడ్ వెర్షన్ అని చెప్పవచ్చు. అయితే, దీని డిజైన్, ఫీచర్లు చూస్తే గ్లోస్టర్ కంటే ఒక మెట్టు పైనే ఉంటుంది. ఫుల్-సైజ్ ఎస్‌యూవీ కోరుకునే వారు, ఆఫ్-రోడ్ ప్రయాణాలను ఇష్టపడే వారిని దృష్టిలో ఉంచుకుని కంపెనీ దీనిని రూపొందించింది.</p>
<p><strong>బుకింగ్స్ - ఆఫర్లు..</strong><br />మెజెస్టర్ ప్రీ-బుకింగ్స్ ఇప్పటికే ప్రారంభమయ్యాయి. ఆన్‌లైన్‌లో లేదా ఎంజీ డీలర్‌షిప్‌ల వద్ద రూ. 41,000 చెల్లించి ఈ కారును బుక్ చేసుకోవచ్చు. మే 2026 నుండి డెలివరీలు మొదలవుతాయి. మొదటి 3,000 మంది కస్టమర్లకు ఎంజీ ఒక బంపర్ ఆఫర్ ప్రకటించింది. వారికి ఐదేళ్ల అన్‌లిమిటెడ్ కిలోమీటర్ల వారంటీ, ఐదేళ్ల రోడ్ సైడ్ అసిస్టెన్స్, ఐదేళ్ల పాటు ఉచిత సర్వీస్ లేబర్ కాంట్రాక్ట్ లభిస్తాయి.</p>
<p><strong>డిజైన్ - ఇంటీరియర్ ఫీచ‌ర్లు..</strong><br />మెజెస్టర్ ముందు భాగంలో పెద్ద మ్యాట్రిక్స్ స్టైల్ గ్రిల్, ఫాల్కన్ డిజైన్ డీఆర్ఎల్స్ (DRLs) కారుకు రాజసాన్ని ఇస్తాయి. 19-అంగుళాల అలాయ్ వీల్స్, వెనుక వైపు కనెక్టెడ్ ఎల్ఈడీ టైల్ లైట్స్ కారు లుక్‌ను మార్చేశాయి. లోపల 6 లేదా 7 సీట్ల లేఅవుట్ ఆప్షన్లు ఉన్నాయి. 12.3-అంగుళాల టచ్‌స్క్రీన్, జేబీఎల్ (JBL) 12-స్పీకర్ సౌండ్ సిస్టమ్, పనోరమిక్ సన్‌రూఫ్, 64-కలర్ యాంబియంట్ లైటింగ్ వంటి ఫీచర్లు లగ్జరీ ఫీల్ ఇస్తాయి. ముందు సీట్లకు హీటింగ్, కూలింగ్ తో పాటు మసాజ్ ఫంక్షన్స్ ఉండటం గమనార్హం.</p>
<p><iframe class="vidfyVideo" style="border: 0px;" src="https://telugu.abplive.com/web-stories/auto/cng-bike-mileage-know-range-of-cng-vehicles-244024" width="631" height="381" scrolling="no"></iframe></p>
<p><strong>సేఫ్టీ - ఇంజిన్ పవర్..</strong><br />భద్రత కోసం లెవల్ 2 ఏడీఏఎస్ (ADAS) ఫీచర్లు ఇందులో ఉన్నాయి. అడాప్టివ్ క్రూయిజ్ కంట్రోల్, లేన్ డిపార్చర్ వార్నింగ్, ఆరు ఎయిర్‌బ్యాగ్‌లు ప్రయాణికులకు రక్షణ ఇస్తాయి. ఇంజిన్ విషయానికి వస్తే, 2.0-లీటర్ ట్విన్-టర్బో డీజిల్ ఇంజిన్ 215 హెచ్‌పి పవర్ ఉత్పత్తి చేస్తుంది. 8-స్పీడ్ ఆటోమేటిక్ గేర్‌బాక్స్ దీని సొంతమని నిపుణులు పేర్కొంటున్నారు. </p>
<p><strong>ఆఫ్-రోడ్ బాద్‌షా..</strong><br />మెజెస్టర్‌లో ఎం-హబ్ (M-Hub) అనే అత్యాధునిక సాఫ్ట్‌వేర్ ఉంది. ఇది 10 రకాల డ్రైవ్ మోడ్స్‌ను ఆఫర్ చేస్తుంది. ఎం-కాల్ (M-Crawl) ఫంక్షన్ సహాయంతో ఎటువంటి క్లిష్టమైన దారిలోనైనా సులభంగా ప్రయాణించవచ్చు. మూడు డిఫరెన్షియల్ లాక్స్ ఉండటం వల్ల ఆఫ్-రోడింగ్ మరింత సులభం అవుతుంది. ఈ ఎస్‌యూవీ 810 మిమీ లోతు ఉన్న నీటిలో కూడా అలవోకగా వెళ్లగలదు. షార్ప్ 4x2, సావీ 4x2, సావీ 4x4 అనే మూడు వేరియంట్లలో ఇది లభిస్తుంది. మార్కెట్లో టయోటా ఫార్చ్యూనర్ లెజెండర్ వంటి కార్లకు ఇది గట్టి పోటీనిస్తుంది. దీని ప్రారంభ ధర సుమారు రూ. 40 లక్షలు (ఎక్స్‌షోరూమ్) ఉండవచ్చని నిపుణులు అంచనా వేస్తున్నారు. ఏదేమైనా ఈనెల 20 తర్వాత భారత ఎస్ యూవీ మార్కెట్ హాట్ హాట్ పోటీకి వేదిక కానుందని విశ్లేషకులు పేర్కొంటున్నారు. కొత్త మెజెస్టర్ రాకతో సమీకరణలు మారనున్నాయని పేర్కొంటున్నారు. </p>
2 days ago
1 
