<p><strong>Mexico Drug Lord El Mencho Killed:</strong> మెక్సికోలో అత్యంత శక్తివంతమైన డ్రగ్ లార్డ్, జాలిస్కో న్యూ జనరేషన్ కార్టెల్ అధినేత నెమేసియో రూబెన్ ఒసెగ్వెరా సెర్వంటెస్ అలియాస్ ఎల్ మెంచో హతమవడంతో ఆ దేశంలో యుద్ధ వాతావరణం నెలకొంది. ఆదివారం జాలిస్కో రాష్ట్రంలోని తపాల్పాలో మెక్సికన్ సైన్యం నిర్వహించిన భారీ ఆపరేషన్‌లో ఎల్ మెంచో మరణించాడు. ప్రపంచంలోనే అత్యంత ప్రమాదకరమైన డ్రగ్ స్మగ్లర్‌గా పేరుగాంచిన ఇతడిని పట్టుకునేందుకు అమెరికా గతంలో 15 మిలియన్ డాలర్ల రివార్డును కూడా ప్రకటించింది.</p>
<p><strong>దేశవ్యాప్తంగా చెలరేగిన హింస - భీతిల్లుతున్న ప్రజలు </strong></p>
<p>ఎల్ మెంచో మరణ వార్త తెలియగానే అతని అనుచరులు మెక్సికో వ్యాప్తంగా విధ్వంసానికి దిగారు. జాలిస్కోతో పాటు మిచోకాన్, గ్వానాజువాటో వంటి సుమారు ఎనిమిది రాష్ట్రాల్లో కార్టెల్ సభ్యులు రోడ్లను దిగ్బంధించారు. వందలాది వాహనాలకు, పెట్రోల్ బంకులకు నిప్పు పెట్టారు. ప్రధాన నగరాల్లో భారీగా కాల్పులు, పేలుళ్లు సంభవించడంతో ప్రజలు ఇళ్లకే పరిమితమయ్యారు. అనేక రాష్ట్రాల్లో విద్యా సంస్థలకు సెలవు ప్రకటించగా, గ్వాడలజారా వంటి నగరాల్లో ప్రజా రవాణా పూర్తిగా నిలిచిపోయింది.</p>
<p><strong>ప్రభుత్వ విజయం - అమెరికా మద్దతు </strong></p>
<p>మెక్సికో అధ్యక్షురాలు క్లాడియా షైన్‌బామ్ నేతృత్వంలోని ప్రభుత్వం ఈ ఆపరేషన్‌ను ఒక చారిత్రాత్మక విజయంగా అభివర్ణించింది. అమెరికా నిఘా సంస్థల సహకారంతో జరిగిన ఈ దాడుల్లో ఎల్ మెంచోతో పాటు మరో ఆరుగురు కార్టెల్ సభ్యులు మరణించారు. అమెరికా డిప్యూటీ సెక్రటరీ ఆఫ్ స్టేట్ క్రిస్టోఫర్ లాండౌ స్పందిస్తూ, ఎల్ మెంచో అంతం మెక్సికోకే కాకుండా మొత్తం ప్రపంచానికి ఒక గొప్ప పరిణామం అని పేర్కొన్నారు. డ్రగ్స్ అక్రమ రవాణాపై రాజీలేని పోరాటం చేస్తామని ప్రభుత్వం స్పష్టం చేసింది. </p>
<blockquote class="twitter-tweet">
<p dir="ltr" lang="en">Mexico just killed the man with a $15 million bounty on his head and his cartel set 5 states on fire within hours<br /><br />- be El Mencho<br />- real name Nemesio Oseguera Cervantes<br />- born July 17 1966 in Aguililla Michoacan Mexico<br />- grew up in poverty<br />- crossed into the US illegally as a… <a href="https://t.co/ZH6W95OA3W">pic.twitter.com/ZH6W95OA3W</a></p>
— Farea (@FareaNFts) <a href="https://twitter.com/FareaNFts/status/2025721355493376019?ref_src=twsrc%5Etfw">February 22, 2026</a></blockquote>
<p><strong>శరణాలయాలుగా మారిన పర్యాటక కేంద్రాలు </strong></p>
<p> హింసాత్మక ఘటనలతో అమెరికా, కెనడా వంటి దేశాలు తమ పౌరులకు ట్రావెల్ అడ్వైజరీ జారీ చేశాయి. పర్యాటక ప్రాంతాలైన ప్యూర్టో వల్లార్టా, గ్వాడలజారా వంటి నగరాల్లో ఉన్న విదేశీయులు సురక్షిత ప్రాంతాలకు వెళ్లాలని సూచించాయి. గ్వాడలజారా విమానాశ్రయంలో ప్రయాణికులు కాల్పుల భయంతో టికెట్ కౌంటర్ల వెనుక దాక్కున్న దృశ్యాలు సోషల్ మీడియాలో వైరల్ అయ్యాయి. డజన్ల కొద్దీ విమాన సర్వీసులు రద్దు కావడంతో పర్యాటకులు తీవ్ర ఇబ్బందులు పడుతున్నారు. </p>
<blockquote class="twitter-tweet">
<p dir="ltr" lang="en">🇲🇽 CJNG gunmen were filmed openly attacking Mexico’s National Guard after El Mencho was killed, as authorities declared a red alert.<br /><br />From blockades to armored clashes, this is retaliation in real time. And with no sign at all this gonna end soon.<a href="https://t.co/YsppkBQnjh">pic.twitter.com/YsppkBQnjh</a> <a href="https://t.co/yadnNfrGed">https://t.co/yadnNfrGed</a></p>
— Mario Nawfal (@MarioNawfal) <a href="https://twitter.com/MarioNawfal/status/2025878299361038640?ref_src=twsrc%5Etfw">February 23, 2026</a></blockquote>
<p><strong>భవిష్యత్తుపై ఆందోళన </strong></p>
<p>ఎల్ మెంచో మరణం డ్రగ్ కార్టెల్ వ్యవస్థకు పెద్ద దెబ్బ అయినప్పటికీ, ఆ సంస్థ పూర్తిగా అంతమైపోలేదని విశ్లేషకులు భావిస్తున్నారు. అతని వారసుల కోసం జరిగే అంతర్గత పోరు వల్ల మెక్సికోలో హింస మరింత పెరిగే అవకాశం ఉందని భద్రతా నిపుణులు హెచ్చరిస్తున్నారు. రాబోయే 2026 ఫిఫా వరల్డ్ కప్ వేదికల్లో గ్వాడలజారా కూడా ఒకటి కావడంతో, అక్కడ శాంతిభద్రతలను కాపాడటం ఇప్పుడు మెక్సికో ప్రభుత్వానికి పెద్ద సవాలుగా మారింది.<br /> </p>
<p><iframe class="vidfyVideo" style="border: 0px;" src="https://telugu.abplive.com/web-stories/world/burj-khalifa-is-more-iconic-than-the-eiffel-tower-here-are-the-features-238743" width="631" height="381" scrolling="no"></iframe></p>
1 month ago
7 
