<p>హైదరాబాద్: రాజమహేంద్రవరంలో జరిగిన రోడ్డు ప్రమాదంలో తీవ్రంగా గాయపడిన పీజీ మెడికల్ స్టూడెంట్ ప్రియాంక ఆరోగ్య పరిస్థితి అత్యంత విషమంగా ఉంది. మొదట రాజమహేంద్రవరంలో చికిత్స అనంతరం మెరుగైన చికిత్స కోసం హైదరాబాద్‌కు తరలించారు. సికింద్రాబాద్‌లోని కిమ్స్ (KIMS) ఆసుపత్రిలో చికిత్స పొందుతున్న ప్రియాంక బ్రెయిన్ డెడ్ అయిందని శుక్రవారం రాత్రి ప్రచారం జరిగింది. అయితే బ్రెయిన్ డెడ్ పరిస్థితిని నిర్ధారించేందుకు ఆప్నియా టెస్ట్ చేసేందుకు డాక్టర్లు ప్రయత్నించినప్పటికీ, సోడియం లెవెల్స్ 160కి పైగా ఉండటం, మరోవైపు శరీరం సహకరించకపోవడంతో ఆ ప్రక్రియను ప్రస్తుతం వాయిదా వేసినట్లు కుటుంబసభ్యులు తెలిపారు. </p>
<p><strong>కూతుర్ని అలా చూస్తే కలచివేస్తోంది: ప్రియాంక తండ్రి</strong></p>
<p>కిమ్స్ ఆసుపత్రిలో ఐసీయూలో చికిత్స పొందుతున్న తన కుమార్తె పరిస్థితిపై ప్రియాంక తండ్రి వెంకటేష్ తీవ్ర ఆవేదన వ్యక్తం చేశారు. కొద్ది రోజుల్లో డాక్టర్‌గా సేవలు అందిస్తుందని, ఎన్నో ఆశలు పెట్టుకున్న మాకు ఇది నిజంగా జీర్ణించుకోలేక విషయం. ప్రస్తుతం నా కుమార్తె ఐసీయూలో మృత్యువుతో పోరాడుతుండటం కుటుంబాన్ని తీవ్రంగా కలచివేస్తోందన్నారు. తమ కుటుంబానికి పెద్ద దిక్కుగా ఉండాల్సిన బిడ్డకు ఈ గతి పట్టిందంటూ కన్నీళ్లు పెట్టుకున్నారు. స్థానిక రాజమండ్రి ఎమ్మెల్యే ఫోన్ చేసి ప్రభుత్వం అండగా ఉంటుందని, చికిత్స విషయంలో ధైర్యంగా ఉండాలన్నారు. తన కుమార్తెను ఈ స్థితికి తెచ్చిన నిందితులను నడిరోడ్డుపై ఉరితీయాలని ఆయన డిమాండ్ చేశారు.</p>
<p><strong>అసలేం జరిగిందంటే.. </strong><br />కర్నూలుకు చెందిన పీజీ స్టూడెంట్ ప్రియాంక రాజానగరంలోని జీఎస్ఎల్ (GSL) మెడికల్ కాలేజీలో కళాశాలలో డెర్మటాలజీ విభాగాంలో పీజీ మొదటి సంవత్సరం చదువుతోంది. ఈ నెల 3న రాత్రి రాజమహేంద్రవరంలోని ఒక మాల్‌లో సినిమా చూసి సహచర విద్యార్థితో కలిసి ద్విచక్రవాహనంపై తిరిగి వెళ్తుండగా, నామవరానికి చెందిన సురవరపు దుష్యంత్, లాలాచెరువుకు చెందిన ఆండ్రూ విలియం జోసెఫ్‌లు మద్యం మత్తులో వేగంగా కారు నడుపుతూ వచ్చి వీరి బైక్‌ను బలంగా ఢీకొట్టారు. అంతటితో ఆగకుండా మళ్లీ రెండోసారి కారును ఆమెపై నుంచి పోనివ్వడంతో ప్రియాంక తలకు తీవ్ర గాయాలయ్యాయి. మొదట స్థానిక ప్రైవేటు ఆసుపత్రిలో చేర్పించినప్పటికీ, పరిస్థితి విషమించడంతో మెరుగైన వైద్యం కోసం సికింద్రాబాద్ కిమ్స్‌కు తరలించి అత్యవసర చికిత్స అందిస్తున్నారు.</p>
<p> </p>
2 months ago
5 
