<p>సంధ్య థియేటర్ తొక్కిసలాట, అల్లు అర్జున్ అరెస్టు ఓ వైపు... ఏపీకి తెలుగు చలన చిత్ర పరిశ్రమ తరలి వెళ్లిపోయే అవకాశాలు ఉన్నాయని వదంతులు మరో వైపు... గత కొన్ని రోజులుగా‌ టాలీవుడ్ ఇండస్ట్రీలో ఏం జరుగుతుందో తెలియని పరిస్థితి నెలకొంది. ఈ సమయంలో నటీనటులు గాని దర్శక నిర్మాతలు గాని ఏ చిన్నమాట మాట్లాడినా సరే ఎవరు ఏ విధంగా తీసుకుంటారో తెలియని పరిస్థితి. ఈ తరుణంలో మూవీ ఆర్టిస్ట్స్ అసోసియేషన్ (మా) సభ్యులకు అధ్యక్షుడు విష్ణు మంచు కీలక సూచనలు చేసినట్టు తెలుస్తోంది.</p>
<p><strong>మా సభ్యులంతా సహనంతో వ్యవహరించండి...</strong><br /><strong>బహిరంగంగా ఎవరూ ఎటువంటి కామెంట్స్ చేయవద్దు!</strong><br />సంధ్య థియేటర్ తొక్కిసలాటలో రేవతి మరణం విషాదకరం అయితే, ఆ ఘటన నేపథ్యంలో జరిగిన అల్లు అర్జున్ అరెస్టు వ్యక్తిగతం. అల్లు ఇంటికి కళాకారులు కొందరు వెళ్లి వచ్చారు. ఆ తీరును రాజకీయ నాయకులతో పాటు ప్రేక్షకులు కొంతమంది తప్పు పట్టారు. ఈ నేపథ్యంలో విష్ణు మంచు కీలక సూచన చేసినట్టు తెలుస్తోంది.</p>
<p>''ఇటీవల జరిగిన పరిణామాలను దృష్టిలో ఉంచుకుని, మన సభ్యులు అందరూ సున్నితమైన విషయాలపై తమ తమ వ్యక్తిగత అభిప్రాయాలను బహిరంగంగా ప్రకటించడం గానీ, వివాదాస్పద అంశాలలో ఎవరో ఒకరి పక్షం తీసుకోవడాన్ని గానీ చేయవద్దు. ఆ కార్యక్రమాలకు దూరంగా ఉండండి. కొన్ని సమస్యలు వ్యక్తిగతమైనవి అయితే మరికొన్ని విషాదకరమైనవి.‌ ఇటువంటి అంశాలపై మాట్లాడడం వల్ల సమస్యలు పరిష్కారం కావడానికి బదులు సంబంధిత వర్గాలకు మరింత నష్టం చేకూరుతుంది. ఈ తరుణంలో మనమంతా సహనంతో సానుభూతితో ఉండడంతో పాటు ఐకమత్యంగా మెలగడం అవసరం'' అని విష్ణు మంచు చెప్పినట్లు తెలిసింది.</p>
<p><strong>ప్రభుత్వంతో సత్సంబంధాలు అవసరం...</strong><br /><strong>ఏపీకి తరలి వెళ్తుందని వార్తల నేపథ్యంలోనేనా?</strong><br />తెలంగాణలోని అధికార కాంగ్రెస్ ప్రభుత్వ వైఖరి పట్ల తెలుగు చిత్ర పరిశ్రమలో కొంతమంది సంతృప్తికరంగా లేరని, మరోవైపు ఏపీకి పరిశ్రమ రావాలని అక్కడి ఉపముఖ్యమంత్రి ప్రముఖ కథానాయకుడు పవన్ కళ్యాణ్ పిలుపు ఇవ్వడంతో ఇండస్ట్రీ అటువైపు వెళ్తుందా? అనే చర్చ మొదలైంది. ఈ తరుణంలో 'మా' సభ్యులకు విష్ణు మంచు మరో కీలక సూచన చేసినట్లు సమాచారం అందుతుంది.</p>
<p>Also Read<strong>: <a title="సీఎంను కలిశా... అల్లు అర్జున్‌ కలుస్తా... రేవతి ఫ్యామిలీని ఆదుకునే బాధ్యత నాదే: దిల్‌ రాజు" href="https://telugu.abplive.com/telangana/hyderabad/telangana-film-development-corporation-chairman-dil-raju-reaction-on-allu-arjun-case-and-sandha-theater-incident-191689" target="_blank" rel="noopener">సీఎంను కలిశా... అల్లు అర్జున్‌ కలుస్తా... రేవతి ఫ్యామిలీని ఆదుకునే బాధ్యత నాదే: దిల్‌ రాజు</a></strong></p>
<p>ప్రభుత్వాలు అన్నిటితోను ప్రజాప్రతినిధులు అందరితోనూ కళాకారులకు సన్నిహిత సంబంధాలు కలిగి ఉంటాయని, వివిధ ప్రభుత్వాలు మద్దతు ఇవ్వడం వల్లే తెలుగు చిత్రసీమ ఈ స్థాయికి చేరుకుందని, మద్రాసు నుంచి హైదరాబాద్ నగరానికి టాలీవుడ్ తరలి రావడంలో - స్థిరపడడంలో అప్పటి ముఖ్యమంత్రి చెన్నారెడ్డి నేతృత్వంలోని <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> ప్రభుత్వం అందించిన ప్రోత్సాహం అతి ముఖ్యమైనదని, ప్రతి ప్రభుత్వంతోనూ పరిశ్రమకు ఎల్లప్పుడూ సత్సంబంధాలు కొనసాగుతూ వస్తున్నాయని మా సభ్యులకు విష్ణు మంచు గుర్తు చేసినట్లు విశ్వసినీయ వర్గాల ద్వారా తెలిసింది. పరోక్షంగా ఏ ప్రభుత్వం పట్ల వ్యతిరేక వ్యాఖ్యలు చేయవద్దని సూచన చేసినట్లు సమాచారం. సమస్యలు వచ్చినప్పుడు అందరం కలిసి ఎదుర్కొందామని మా సభ్యుల్లో స్ఫూర్తి నింపేలా ఆయన ఒక లేఖ రాశారని తెలిసింది.</p>
<p>Also Read<strong>: <a title="పుష్ప 2'లో బన్నీ... 'మార్కో'లో ఉన్ని... ఇద్దరూ ఫైట్స్‌లో అలా చేశారేంటి భయ్యా!" href="https://telugu.abplive.com/entertainment/cinema/unni-mukundan-marco-interval-fight-draws-comparisons-to-allu-arjun-pushpa-2-climax-fight-for-this-reason-191622" target="_blank" rel="noopener">'పుష్ప 2'లో బన్నీ... 'మార్కో'లో ఉన్ని... ఇద్దరూ ఫైట్స్‌లో అలా చేశారేంటి భయ్యా!</a></strong></p>
11 months ago
8 
