<p>Hyderabad Crime News | మేడ్చల్: దుండిగల్ పోలీస్ స్టేషన్ పరిధిలోని బౌరంపేటలో సోమవారం ఉదయం దారుణం చోటుచేసుకుంది. ఓపెన్ ఏరియాలో నిలిపి ఉంచిన కారులో ప్రమాదవశాత్తు లేదా అనుమానాస్పద స్థితిలో మంటలు చెలరేగడంతో, అందులోని వ్యక్తి కారులోనే సజీవంగా కాలిపోయి మృతిచెందారు. స్థానికుల సమాచారం మేరకు సెప్టెంబర్ 7వ తేదీ ఉదయం 7 గంటల ప్రాంతంలో రుద్ర కన్స్ట్రక్షన్స్ సమీపంలో కారు కాలుతున్నట్లు గమనించారు. సమాచారం అందుకున్న దుండిగల్ పోలీసులు వెంటనే ఘటనా స్థలానికి చేరుకుని పరిశీలించారు.</p>
<p><br /><img src="https://feeds.abplive.com/onecms/images/uploaded-images/2026/09/07/0018be93e1b662b370e1df208ad82b2e1788774374550233_original.jpg" /></p>
<p>మృతుడిని బౌరంపేట ప్రణీత్ ప్రణవ్ విలాస్‌కు చెందిన కార్తీక్ (40)గా పోలీసులు గుర్తించారు. ఆయన తండ్రి పేరు రాధాకృష్ణ అని, కార్తీక్ లాండ్రీ వ్యాపారం నిర్వహిస్తూ జీవనం సాగిస్తున్నట్లు పోలీసుల ప్రాథమిక విచారణలో తేలింది. కార్తీక్ భార్య గత రెండున్నర సంవత్సరాలుగా ఆయనకు దూరంగా ఉంటోందని, దీనికి తోడు కొంతకాలంగా ఆయన తీవ్ర అనారోగ్యంతో పాటు ఆర్థిక ఇబ్బందులతో బాధపడుతున్నట్లు పోలీసులు ప్రాథమికంగా గుర్తించారు. </p>
<p><br /><img src="https://feeds.abplive.com/onecms/images/uploaded-images/2026/09/07/953fb5d9a1c45c0cf199754ae6d237161788774558088233_original.jpg" /></p>
<p>ఈ మానసిక కుంగుబాటు, ఆర్థిక ఇబ్బందుల నేపథ్యంలోనన కార్తీక్ ఆత్మహత్యకు పాల్పడి ఉండవచ్చనే కోణంలో పోలీసులు విచారణను ముమ్మరం చేశారు. అయితే మృతికి గల ఖచ్చితమైన వివరాలు, కారణాలు దర్యాప్తులో బహిర్గం అవుతాయని పోలీసులు స్పష్టం చేశారు. ఈ ఘటనపై కేసు నమోదు చేసిన దుండిగల్ పోలీసులు అన్ని కోణాల్లో లోతుగా దర్యాప్తు చేపట్టారు. </p>
<p> </p>
1 month ago
3 
