<p><strong>Maharashtra Viral Love Story: </strong>మహారాష్ట్రలో సినిమా స్టోరీని తలపించేలా అత్యంత విచిత్రమైన, విస్తుపోయే క్రైమ్ ఘటన వెలుగులోకి వచ్చింది. తన మొదటి భార్య కుమారుడు తన రెండవ భార్యతో కలిసి పారిపోయాడంటూ ఒక వ్యక్తి పోలీసులకు ఫిర్యాదు చేశారు. ఆ కుమారుడు కనీసం మేజర్ కూడా కాదు. ఇంకా పద్దెనిమిదేళ్లు నిండలేదు. ఈ వ్యవహారంపై బాధితుడు కైజ్ పోలీస్ స్టేషన్‌లో ఫిర్యాదు చేయడంతో దర్యాప్తులో అసలు విషయాలు బయటపడ్డాయి. </p>
<p><strong>ట్రాఫిక్ చలాన్‌తో బయటపడ్డ గుట్టు </strong></p>
<p>బీడ్ జిల్లాకు చెందిన బాధితుడికి మొదటి భార్య ద్వారా ఇద్దరు కుమారులు, ఇద్దరు కుమార్తెలు ఉన్నారు. నాలుగేళ్ల క్రితం ఆయన రెండో వివాహం చేసుకున్నాడు. ఇటీవల ఆయన ముంబైలో ఒక ధార్మిక కార్యక్రమానికి వెళ్లిన సమయంలో, ఇంట్లో ఉన్న మైనర్ కుమారుడు, రెండో భార్య కనిపించకుండా పోయారు. అయితే, వారు ఎక్కడికి వెళ్లారో తెలియక కుటుంబ సభ్యులు తలలు పట్టుకుంటున్న తరుణంలో.. బాధితుడి అల్లుడి ఫోన్‌కు హైదరాబాద్ ట్రాఫిక్ పోలీస్ నుండి ఒక ఈ-చలాన్ మెసేజ్ వచ్చింది. ట్రాఫిక్ నిబంధనలు ఉల్లంఘించినందుకు వచ్చిన ఆ చలాన్ ఆధారంగా.. అల్లుడి బైక్ వేసుకుని ఆ ఇద్దరూ హైదరాబాద్‌కు పారిపోయినట్లు కుటుంబ సభ్యులు నిర్ధారించుకున్నారు. ఈ విచిత్ర ఉదంతంపై బాధితుడు స్థానిక పోలీస్ స్టేషన్‌లో ఫిర్యాదు చేశాడు. </p>
<p><strong>మహిళ కోసం హైదరాబాద్‌లో వెదుకులాట </strong></p>
<p>తన మైనర్ కుమారుడిని తన భార్య ప్రలోభపెట్టి కిడ్నాప్ చేసిందని, ఇంటి నుండి వెళ్లేటప్పుడు కొంత నగదు, నగలు కూడా తీసుకువెళ్లారని ఫిర్యాదులో పేర్కొన్నాడు. ప్రస్తుతం పోలీసులు మైనర్ బాలుడి కిడ్నాప్ మరియు మిస్సింగ్ కేసుగా నమోదు చేసి దర్యాప్తు ప్రారంభించారు. కుమారుడు మైనర్ కావడంతో పోలీసులు ఈ కేసును మరింత సీరియస్‌గా తీసుకున్నారు. బాలుడిని ప్రలోభపెట్టి తీసుకువెళ్లినందుకు సదరు మహిళపై చర్యలు తీసుకునే దిశగా దర్యాప్తు చేస్తున్నారు. అటు హైదరాబాద్ పోలీసులు, ఇటు మహారాష్ట్ర పోలీసులు సమన్వయంతో ఆ ఇద్దరి కోసం గాలిస్తున్నారు. <br /><strong> </strong><br /><strong> హర్యానాలోనూ ఇలాంటిదే మరో ఉదంతం </strong></p>
<p>ఇదే తరహా విస్తుపోయే ఘటన హర్యానాలోని నుహ్ జిల్లాలోనూ చోటుచేసుకుంది. అక్కడ మొదటి భార్య మరణించడంతో సదరు వ్యక్తి రెండో పెళ్లి చేసుకున్నాడు. అయితే, తండ్రి రెండో భార్యను తల్లిగా గౌరవించాల్సిన కొడుకు, ఆమెతోనే ప్రేమలో పడి ఏకంగా వివాహం చేసుకున్నాడు. పెళ్లి అనంతరం ఆ జంట అక్కడి నుండి మాయమవడంతో బాధితుడు పోలీసులను ఆశ్రయించాడు. ఈ రెండు ఘటనల్లోనూ కుమారులు తమ సవతి తల్లులతోనే ప్రేమలో పడి పారిపోవడం సామాజిక సంబంధాల పతనాన్ని సూచిస్తోంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/news/if-you-make-these-mistakes-your-fastag-will-be-blocked-244716" width="631" height="381" scrolling="no"></iframe></p>
<p> </p>
1 hour ago
1 
