<p><strong>Konda Surekha: </strong><a title="తెలంగాణ కాంగ్రెస్" href="https://telugu.abplive.com/topic/Telangana-Congress" data-type="interlinkingkeywords">తెలంగాణ కాంగ్రెస్</a>‌లో అంతర్గత ప్రజాస్వామ్యం పేరుతో సాగుతున్న వివాదాన్ని కంట్రోల్ చేసేందుకు అధిష్ఠానం రంగంలోకి దిగింది. ముఖ్యంగా మంత్రి కొండా సురేఖ కుమార్తె సుస్మిత పదే పదే చేస్తున్న కామెంట్స్‌తో జరుగుతున్న డ్యామేజీని కంట్రోల్ చేసే పనిలో పడింది. ముఖ్యమంత్రి రేవంత్ రెడ్డిని టార్గెట్ చేస్తూ విమర్శలు చేస్తున్నారు. ఆమె కుటుంబ సభ్యులతోపాటు పలువురు కాంగ్రెస్ సీనియర్ నేతలు కూడా రేవంత్ రెడ్డిని టార్గెట్ చేస్తున్నారు. ఇప్పటి వరకు లైట్ తీసుకున్న అధిష్ఠానం ఇకపై ఉపేక్షించకూడదని భావిస్తోంది. అందుకే సురేఖ నుంచే ప్రక్షాళన మొదలు పెట్టాలని భావిస్తోంది. అందుకు తగ్గ సూటబుల్ నాయకులను అన్వేషిస్తుంది. </p>
<h2>రోజగోపాల్ రెడ్డిని మించి పోయిన కొండా కుటుంబం </h2>
<p>కాంగ్రెస్ పార్టీలో తెలంగాణలో అధికారం చేపట్టి రేవంత్ రెడ్డి ముఖ్యమంత్రిగా పదవీ బాధ్యతలు చేపట్టినప్పటి నుంచి చాలా మంది సీనియర్లు అసంతృప్తితో రగిలిపోతున్నారు. వివిధ కారణాలతో కొందరు సైలెంట్‌గా ఉన్నా ఇంకొందరు అసలు ఆగడం లేదు. అలాంటి వారిలో ముందు వరుసలో ఉంటారు కోమటిరెడ్డి రాజగోపాల్ రెడ్డి. తిరుగుబాటు నాయకులు ఎవరూ అంటే ఆయన పేరు మొదట వినిపించేది, కానీ మంత్రి కొండా సురేఖ కుమార్తె సుస్మిత చేసిన కామెంట్స్ మాత్రం సంచలనంగా మారాయి. అందుకే అధిష్ఠానం ఫోకస్ ఇప్పుడు కొండా సురేఖపై పడింది. </p>
<h2>సరైన లీడర్‌ను వెతికే పనిలో పార్టీ </h2>
<p>ముఖ్యమంత్రి రేవంత్ రెడ్డి, ఆయన కుటుంబ సభ్యులను టార్గెట్ చేస్తూ కొండా సుస్మిత చేసిన కామెంట్స్‌పై అధిష్ఠానం, ముఖ్యమంత్రి, ఇతర ఆయన సన్నిహత నేతలందా సీరియస్ అయ్యారు. అందుకే తొలిసారిగా కొందరు కాంగ్రెస్ ప్రజాప్రతినిధులు సీఎల్పీలో సమావేశమై కొండా సురేఖపై తిరుగుబాటు జెండా ఎగరేశారు. ప్రస్తుతానికి విదేశాల్లో ఉన్న ముఖ్యమంత్రి రేవంత్ రెడ్డి వచ్చిన తర్వాత ఆమెపై వేటు ఖాయమని తెలుస్తోంది. ఇంతలో అదే సామాజిక వర్గానికి చెందిన నేతను వెతికే పనిలో ఉన్నారు.</p>
<h2>మున్నూరు కాపు? బీసీ?</h2>
<p>కొండా సురేఖ బీసీ మహిళ, మున్నూరు కాపు సామాజిక వర్గానికి చెందిన నాయకురాలు. అందుకే ఆమెను తప్పిస్తే, అదే సామాజిక వర్గానికి చెందిన నేతకు పదవి ఇవ్వాలా లేకుంటే బీసీ సామాజిక వర్గానికి చెందిన నేతకు మంత్రి పదవి ఇవ్వాలా అనే చర్చ సాగుతోంది. అదే సామాజిక వర్గానికి పదవి ఇవ్వాలని భావిస్తే మాత్రం ప్రస్తుత విప్ ఆది శ్రీనివాస్ ముందు వరుసలో ఉంటారు. అలా కాకుండా బీసీ సామాజిక వర్గానికి ప్రాధాన్యత ఇవ్వదలచుకుంటే మాత్రం లెక్కలు మారిపోతాయి. ఇప్పటి వరకు ప్రయార్టీ లేని వర్గాన్ని తెరపైకి తీసుకు వచ్చే ఛాన్స్ ఉంది. </p>
<p>తెలంగాణలో బీసీ సామాజిక వర్గాలు ఎక్కువ. అందుకే అన్ని లెక్కలు వేసుకున్న తర్వాత ఏ వర్గానికి ఇస్తే రాజకీయ ప్రయోజనం ఉంటుంది, ఇప్పుడు జరుగుతున్న వివాదంపై రచ్చ లేకుండా ఉంటుందనే లెక్కలు కాంగ్రెస్ అధిష్ఠానం వేస్తోంది. బీసీలోని కొన్ని సామాజిక వర్గాలకు కాంగ్రెస్‌లో ప్రాధాన్యత తగ్గిందనే ప్రచారం చేస్తున్నారు. అందుకే వారిలో ఒకర్ని ఎమ్మెల్సీగా చేసి మంత్రిని చేసినా ఆశ్చర్యపోనవసరం లేదనే టాక్ గట్టిగా వినిపిస్తోంది. </p>
<h2>రాజగోపాల్ రెడ్డి సంగతేంటని కొందరి ప్రశ్న</h2>
<p>ఎవరికి ఇస్తారు, ఎలాంటి లెక్కలు చూసుకొని మంత్రి పదవి ఇస్తారు అనే విషయాన్ని పక్కన పెడితే, కొండ సురేఖను మాత్రం తప్పిస్తారనేది కాంగ్రెస్ నేతలు గట్టిగా చెబుతున్నారు. ఆమె పదవి చేపట్టి నాటి నుంచి కాంగ్రెస్ పార్టీకీ, ముఖ్యమంత్రి <a title="రేవంత్ రెడ్డి" href="https://telugu.abplive.com/topic/Revanth-Reddy" data-type="interlinkingkeywords">రేవంత్ రెడ్డి</a>కి చిక్కులు తప్పడం లేదని ప్రజాప్రతినిధులే మీడియా ముఖంగా చెప్పారు. ఆమె కుమార్తె ఇష్టం వచ్చినట్టు కామెంట్స్ చేస్తుంది, మంత్రి వివరణ ఇవ్వడం అలవాటుగా మారిందని నేతలు మండిపడుతున్నారు. అందుకే ఆమెను తప్పిస్తే మిగతా అసంతృప్తులకి కూడా వార్నింగ్ ఇచ్చినట్టు ఉంటుందని అంటున్నారు. </p>
<p>ఒక్క కొండా సురేఖపై చర్యలు తీసుకుంటే బీసీ, మహిళ కార్డును ప్రత్యర్థులు వాడుకుంటారని, ఎప్పటి నుంచే ముఖ్యమంత్రిపై నేరుగా కామెంట్స్ చేస్తున్న రాజగోపాల్ రెడ్డిపై కూడా చర్యలు తీసుకోవాలని కొందరు నేతలు డిమాండ్ చేస్తున్నారు. ఆయనతోపాటు మరికొందరు జిల్లా స్థాయి నాయకులపై చర్యలు తీసుకుంటే తప్ప ప్రక్షాళన పూర్తి కాదని అభిప్రాయపడుతున్నారు. కాంగ్రెస్ క్రమశిక్షణ సంఘం ఏం చెప్పనుంది? <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> అధినాయకత్వం ఎలాంటి చర్యలు తీసుకోనుందనే చర్చ తెలంగాణ రాజకీయాల్లో ఆసక్తిగా మారింది. </p>
2 months ago
3 
