<p>Ali Hosseini Khamenei | అమెరికా, ఇజ్రాయెల్ జరిపిన దాడుల్లో ఇరాన్ సుప్రీం లీడర్ అయతుల్లా అలీ ఖమేనీ చనిపోయారని తెలిసిందే. అయితే 1989 నుండి ఇరాన్ అత్యున్నత నాయకుడిగా ఉన్న ఖమేనీ దాదాపు 36-37 సంవత్సరాల పాటు దేశంలోని అత్యంత శక్తివంతమైన పదవిలో కొనసాగారు. తాను నిరాడంబరంగా జీవించే మత పెద్దగా తన గురించి చెప్పుకునేవారు. కానీ అంతర్జాతీయ దర్యాప్తు నివేదికలు ఆయన గురించి భిన్నాభిప్రాయాలు వ్యక్తం చేశాయి. ఆయన ఆర్థికంగా లక్షల కోట్లకు అధిపతి అని సైతం ప్రచారం జరుగుతోంది.</p>
<p><strong>ఖమేనీ వద్ద ఎంత ఆస్తి ఉంది?</strong><br />2013లో అంతర్జాతీయ వార్తా సంస్థ 'రాయిటర్స్' నిర్వహించిన ఒక దర్యాప్తు నివేదికలో ఖమేనీ సుమారు 95 బిలియన్ డాలర్ల ఆస్తులకు యజమాని అని పేర్కొన్నారు. భారత కరెన్సీలో ఈ మొత్తం దాదాపు రూ. 8.5 లక్షల కోట్ల వరకు ఉంటుంది (అయితే ఇది మారకపు రేటుపై ఆధారపడి ఉంటుంది). ఈ ఆస్తి నేరుగా ఆయన వ్యక్తిగత బ్యాంకు ఖాతాలో లేదని, ఒక పెద్ద సంస్థ ద్వారా మెయింటైన్ చేస్తారని ఆ నివేదిక తెలిపింది.</p>
<p><strong>ఖమేనీకి ఆదాయం ఎక్కడి నుండి వచ్చేది?</strong><br />ఖమేనీ ఆస్తికి ప్రధాన వనరు సేతాద్ (Setad) లేదా ‘సెతాద్ ఎజ్రాయే ఎమామ్’ అని చెబుతారు. ఈ సంస్థ 1979 ఇరాన్ విప్లవం తర్వాత ఏర్పడింది. ఆ సమయంలో చాలా మంది, కొన్ని కుటుంబాల ఆస్తులు జప్తు చేశారు. ఈ జప్తు చేసిన ఆస్తులను ఒకే చోటికి చేర్చి నిర్వహించడానికి ఈ సంస్థను ఏర్పాటు చేశారు. సేతాద్ సంస్థకు రియల్ ఎస్టేట్, కంపెనీల షేర్లు, చమురు, ఇంధన రంగాల్లో పెట్టుబడులు, బ్యాంకింగ్, ఇతర వ్యాపారాల్లో వాటాలు ఉన్నట్లు సమాచారం. నివేదికల ప్రకారం, ఈ సంస్థ ఇరాన్ పార్లమెంటుకు లేదా బహిరంగ పర్యవేక్షణ సంస్థలకు ఎలాంటి జవాబుదారీగా ఉండదు. దీని కార్యకలాపాలు నేరుగా సుప్రీం లీడర్ ఖమేనీ ఆఫీసు కింద నడిచేవి.</p>
<p><strong>ఇటీవలి నివేదికల్లో ఆస్తి గురించి ఏం చెప్పారు?</strong><br />కొన్ని ఇటీవలి నివేదికల (2025-2026) ప్రకారం, ఖమేనీ నియంత్రణలో ఉన్న ఆస్తి 95 బిలియన్ డాలర్ల నుండి 200 బిలియన్ డాలర్ల వరకు పెరిగి ఉండవచ్చని సమాచారం. అయితే, ఈ వాదనలకు సంబంధించి ఎలాంటి ధృవీకరణ అందుబాటులో లేదు. ఈ అంచనా ఏ ఆస్తులు, పెట్టుబడులను కలిపి లెక్కించారో కూడా స్పష్టంగా లేదు. ముఖ్యంగా ఈ మొత్తం నగదు రూపంలో ఉండదని.. కేవలం కంపెనీలు, భూములు, షేర్లు, లపు రంగాల్లోని వాటాల రూపంలో ఉంటుందని నివేదికలు తెలిపాయి. </p>
<p><strong>ఏయే రంగాల్లో వాటాలు ఉన్నాయి?</strong><br />నివేదికల ప్రకారం, ఇరాన్‌లోని అనేక కీలక రంగాల్లో సేతాద్ సంస్థ వాటాలను కలిగి ఉంది. ఇందులో చమురు, ఇంధనం, టెలికమ్యూనికేషన్స్, బ్యాంకింగ్, వ్యవసాయం, పరిశ్రమలు, రియల్ ఎస్టేట్ ఉన్నాయి. చమురు, గ్యాస్ ఇరాన్ ఆర్థిక వ్యవస్థకు వెన్నెముక వంటివి. ఒకవేళ ఈ రంగాల్లో ఏదైనా సంస్థకు పెద్ద ఎత్తున వాటాలు ఉంటే, దాని ప్రభావం దేశ ఆర్థిక వ్యవస్థపై సైతం పడుతోంది. అందుకే ఇరాన్ సుప్రీం లీడర్ ఖమేనీ నియంత్రణలోని ఆర్థిక వ్యవస్థ అత్యంత ప్రభావవంతమైనదిగా భావిస్తారు.</p>
<p><strong>ఖమేనీ విలాసవంతమైన జీవితాన్ని గడిపేవారా?</strong><br />ఖమేనీ వ్యక్తిగతంగా చాలా నిరాడంబర జీవితాన్ని గడిపేవారని విదేశీ విశ్లేషకులు చెబుతుంటారు. వ్యక్తిగత జీవితంలో ఆయన సాధారణ ఇల్లు, పరిమిత వ్యక్తిగత ఆస్తుల గురించే మాట్లాడేవారు. ఆయన అనుచరులు కూడా ఆయనకు వ్యక్తిగత ఆస్తులు ఏమీ లేవని చెబుతారు. కానీ విమర్శకుల వాదన ప్రకారం, ఆస్తి ఆయన పేరు మీద లేకపోయినా, దానిపై నియంత్రణ మాత్రం ఆయన ఆఫీసు, ఆయన ఆదేశాల మేరకే జరిగేది. నియంత్రణ, వ్యక్తిగత యాజమాన్యం అనేవి 2 వేర్వేరు విషయాలు అవుతాయి. </p>
<p><strong>ఈ ఆస్తి పూర్తిగా వ్యక్తిగతమైనదేనా?</strong><br />సేతాద్ సంస్థను ఒక పాక్షిక ప్రభుత్వ సంస్థగా పరిగణిస్తారు. ఇది నేరుగా ఇరాన్ సుప్రీం లీడర్‌ ఖమేనీకి రిపోర్ట్ చేసేది. కానీ దీని కార్యకలాపాలలో పారదర్శకత చాలా తక్కువగా ఉంటుంది. ఇరాన్ వ్యవస్థలో సుప్రీం లీడర్ కార్యాలయానికి సంబంధించిన ఆర్థిక సమాచారాన్ని బహిరంగంగా ఎక్కడా షేర్ చేయరు. అందుకే ఖమేనీ మొత్తం ఆస్తికి సంబంధించి సరైన లెక్కలు చెప్పడం కష్టమే, కానీ ఆయన లక్షల కోట్ల ఆస్తులను నియంత్రించేవారు.</p>
1 month ago
5 
