<p>భారత్, పాకిస్థాన్ మ్యాచ్‌ మరికొన్ని గంటల్లో ప్రారంభం కానుంది. ముఖ్యంగా పాక్ స్పిన్నర్ ఉస్మాన్ తారిక్‌పైనే అందరి దృష్టి నెలకొంది. ఈ టీ20 వరల్డ్ కప్‌లో పాక్ జట్టు విజయాల హ్యాట్రిక్ సాధిస్తుందా.. తొలి హ్యాట్రిక్ కొట్టేది టీమిండియానా అని నేడు తేలిపోతుంది. అనారోగ్యం కారణంగా గత మ్యాచ్‌కు దూరమైన అభిషేక్ శర్మ నేడు జట్టులోకి వచ్చాడు. ఇక హార్దిక్ పాండ్యా, సూర్య పాక్ స్పిన్నర్ ఉస్మాన్ బౌలింగ్‌లో భారీగా పరుగులు సాధిస్తారని ఫ్యాన్స్ ఆశిస్తున్నారు. ఈరోజు మ్యాచ్‌లో కీలకంగా మారనున్న ఏడుగురు ఆటగాళ్లు వీరే. </p>
<p><strong>1. అభిషేక్ శర్మ</strong><br />టీ20 వరల్డ్ కప్ తొలి మ్యాచ్‌లో అమెరికా (USA)పై అభిషేక్ శర్మ గోల్డెన్ డక్ అయ్యాడు. నమీబియాతో మ్యాచ్‌కు ముందు కడుపులో ఇన్ఫెక్షన్‌తో బాధపడటంతో రెండో మ్యాచ్ ఆడలేదు. అయితే, నేడు పాకిస్థాన్‌తో జరిగే మ్యాచ్‌లో అభిషేక్ ఆడతాడని కెప్టెన్ సూర్యకుమార్ యాదవ్ ప్రెస్ కాన్ఫరెన్స్‌లో తెలిపాడు. తొలి బంతి నుండే విరుచుకుపడే అలవాటున్న ఓపెనర్ ప్రదర్శనపై అందరిలోనూ ఆసక్తి నెలకొంది.</p>
<p><strong>2. ఉస్మాన్ తారిక్</strong><br />ఈ మ్యాచ్‌లో ప్రస్తుతం ఉస్మాన్ తారిక్ గురించే అత్యధికంగా చర్చ జరుగుతోంది. దీనికి కారణం అతడి విలక్షణమైన బౌలింగ్ యాక్షన్, బంతిని విడిచే ముందు కొంచెం సేపు ఆగడం. మ్యాచ్‌కు ముందు భారత్ కూడా ఉస్మాన్ బౌలింగ్‌ను అనుకరిస్తూ ప్రాక్టీస్ చేసింది. కెప్టెన్ సూర్య సైతం ఉస్మాన్ తారిక్ తరహాలో భారత బ్యాటర్లకు బౌలింగ్ చేసిన వీడియోలు వైరల్ అయ్యాయి. తారిక్‌కు కూడా నేడు అసలైన పరీక్ష ఎదురుకానుంది. పాక్ జట్టు అతడిపైనే ఎక్కువగా ఆధారపడటంతో తారిక్ పై తీవ్ర ఒత్తిడి ఉంటుంది.</p>
<p><strong>3. హార్దిక్ పాండ్యా</strong><br />ఆర్. ప్రేమదాస స్టేడియం పిచ్‌ను బట్టి చూస్తే, నేడు రెండో ఫాస్ట్ బౌలర్ గా హార్దిక్ పాండ్యా పూర్తి కోటా వేస్తాడు. ఢిల్లీలో జరిగిన మ్యాచ్‌లో ఇన్నింగ్స్ మొదటి ఓవర్ పాండ్యానే వేశాడు. కేవలం బంతితోనే కాకుండా బ్యాటింగ్‌లో కూడా అతడిపై భారీ అంచనాలు ఉన్నాయి. హార్దిక్ ఆడే శైలి ఉస్మాన్ తారిక్ బౌలింగ్‌ను ఎదుర్కోవడానికి సరిపోతుంది. తారిక్ బంతి వేసే ముందు ఆగుతాడు, హార్దిక్ బంతిని కొంచెం ఆలస్యంగా ఆడతాడు. తక్కువగా ముందుకు వచ్చి ఆడుతుంటాడు.</p>
<p><strong>4. బాబర్ ఆజం</strong><br />పాకిస్థాన్ జట్టులో అత్యంత అనుభవజ్ఞుడైన బ్యాటర్ బాబర్ ఆజం గత కొంతకాలంగా ఫామ్‌లో లేడు. అమెరికాపై 32 బంతుల్లో 46 పరుగులు చేసినా అంతకుముందు అంతగా పరుగులు చేయలేదు. పరుగులు చేసినా స్ట్రైక్ రేట్ చాలా తక్కువగా ఉండేది. మిడిల్ ఆర్డర్‌లో ఇన్నింగ్స్‌ను చక్కదిద్దే బాధ్యత బాబర్‌పై ఉన్నా, భారత స్పిన్నర్లు వరుణ్ చక్రవర్తి, అక్షర్ పటేల్ లను ఆడటం అంత ఈజీ కాదు. </p>
<p><strong>5. వరుణ్ చక్రవర్తి</strong><br />ఐసీసీ టీ20 ర్యాంకింగ్స్‌లో నంబర్ 1 బౌలర్ వరుణ్ చక్రవర్తి గత మ్యాచ్‌లో కేవలం 2 ఓవర్లలోనే 3 వికెట్లు సాధించాడు. వరుణ్ బౌలింగ్ అర్థం చేసుకోవడం ఏ బ్యాటర్‌కైనా సులభం కాదు. పైగా నేటి పిచ్ స్పిన్నర్లకు అనుకూలం. అటువంటి పరిస్థితిలో వరుణ్ నేటి మ్యాచులో జట్టు తరఫున అత్యుత్తమ ప్రదర్శన చేసే అవకాశం ఉంది.</p>
<p><strong>6. సాహిబ్జాదా ఫర్హాన్</strong><br />పాకిస్థాన్ ఓపెనర్ సాహిబ్జాదా ఫర్హాన్ గత మ్యాచ్‌లో అమెరికాపై 41 బంతుల్లో 73 పరుగులతో అద్భుతమైన ఇన్నింగ్స్ ఆడాడు. మంచి ఫామ్‌లో ఉన్నాడు. తొలి మ్యాచ్‌లో కూడా 47 పరుగులతో రాణించాడు. గతంలో భారత్-పాక్ తలపడినప్పుడు కూడా ఫర్హాన్ 57 పరుగులు చేశాడు. నేడు కూడా పాకిస్థాన్ జట్టుకు అతడు కీలకంగా మారనున్నాడు. </p>
<p><strong>7. అబ్రార్ అహ్మద్</strong><br />రైట్ ఆర్మ్ లెగ్ స్పిన్నర్ అబ్రార్ అహ్మద్‌ గతంలో వికెట్ సెలబ్రేషన్ తీరుపై వివాదం జరిగింది. అబ్రార్ ఐసీసీ టీ20 బౌలింగ్ ర్యాంకింగ్స్‌లో రెండో స్థానంలో ఉన్నాడు. రేటింగ్స్‌లో వరుణ్ చక్రవర్తి కంటే అంతగా వెనుకబడి లేడు. నెదర్లాండ్స్‌పై 2, అమెరికాపై 1 వికెట్ తీసిన అబ్రార్ ప్రేమదాస స్టేడియంలో స్పిన్ పిచ్ మీద కచ్చితంగా ప్రభావం చూపే అవకాశాలున్నాయి. </p>
2 months ago
7 
