<p><strong>Hypersonic Travel:</strong>మీరు ఢిల్లీలో కాఫీ కప్పు పట్టుకుని కూర్చుంటే, అది పూర్తి చేసేలోపే మీరు దుబాయ్‌లో ల్యాండ్ అయితే ఎలా ఉంటుంది. వినడానికి సైన్స్ ఫిక్షన్ సినిమా కబురులా ఉన్నా, ప్రపంచవ్యాప్తంగా శాస్త్రవేత్తలు దీనిని నిజం చేసే పనిలో ఉన్నారు. సాధారణ విమానాల వేగానికి, కాలానికి ఇక చెల్లుచీటీ పాడే రోజులు దగ్గర్లోనే ఉన్నాయి. గంటల కొద్దీ సాగే విమాన ప్రయాణాలను నిమిషాల్లోకి కుదించే హైపర్‌ సోనిక్‌ టెక్నాలజీ ఇప్పుడు గ్లోబల్ ట్రాన్స్‌పోర్ట్ ముఖ చిత్రాన్ని మార్చబోతోంది.</p>
<h3>హైపర్ సోనిక్ అంటే ఏంటీ?</h3>
<p>సాధారణంగా మనం శబ్ద వేగాన్ని ప్రామాణికంగా తీసుకుంటాం. శబ్ద వేగం గాలిలో గంటకు సుమారు 1225 కిలోమీటర్లు ఉంటుంది. శబ్ద వేగం కంటే ఎక్కువ ఉంటుంది సూపర్ సోనిక్. శబ్ద వేగం కంటే కనీసం ఐదు రెట్లు లేదా అంత కంటే ఎక్కువ వేగంతో ప్రయాణించే టెక్నాలజీయే హైపర్ సోనిక్ అంటారు. అంటే గంటకు 6000కిలోమీటర్ల కంటే ఎక్కువ వేగం అన్నమాట. ఈ వేగంతో ప్రయాణిస్తే, న్యూయార్క్ నుంచి లాస్ ఏంజెల్‌ మధ్య ఉన్న 4400 కిలోమీటర్ల దూరాన్ని కేవలం 15నిమిషాల్లో దాటేయవచ్చు. </p>
<h3>జపాన్ సాధించిన అద్భుత విజయం </h3>
<p>హైపర్ సోనిక్ ప్రయాణం వైపు ప్రపంచ దేశాలు పోటీ పడుతుండగా జపాన్ ఇటీవల ఒక కీలక మైలురాయిని అధిగమించింది. జపాన్ ఏరోస్పేస్‌ ఎక్స్‌ప్లోరేషన్ ఏజెన్సీ, టోక్యో యూనివర్శిటీ, ఇతర ప్రముఖ సంస్థలతో కలిసి ఒక రామ్‌జెట్‌ ఇంజిన్ విజయవంతంగా పరీక్షించింది. </p>
<p>Also Read: <a title="వేడి నీళ్లు కూల్ వాటర్ కంటే వేగంగా గడ్డకడతాయా? దీని వెనుక ఉన్న సైన్స్ మిస్టరీ ఏంటీ?" href="https://telugu.abplive.com/education/science-behind-mpemba-effect-hot-water-freezes-faster-than-cool-water-248758" target="_self">వేడి నీళ్లు కూల్ వాటర్ కంటే వేగంగా గడ్డకడతాయా? దీని వెనుక ఉన్న సైన్స్ మిస్టరీ ఏంటీ?</a></p>
<p>మియాగీ ప్రీఫెక్చర్‌లోని కకుడా స్పేస్‌ సెంటర్‌లో ఈ ప్రయోగాన్ని నిర్వహించారు. ఒక రెండు మీటర్ల ప్రయోగాత్మక వాహనాన్ని Mach5 వేగం వద్ద ఉండే కృత్రిమ వాతావరణంలో ఉంచి పరీక్షించారు. ఆ వాహనం నిజంగా ఎగరకపోయినప్పటికీ, హైపర్‌ సోనిక్ వేగం వద్ద ఏర్పడే విపరీతమైన వేడిని, ఒత్తిడిని తట్టుకుని నిలబడటంలో విజయం సాధించింది </p>
<h3>రామ్‌జెట్‌ ఇంజిన్ ఎలా పని చేస్తుంది?</h3>
<p>సాధారణ జెట్ ఇంజిన్లలో గాలిని లోపలికి పంపడానికి పెద్ద పెద్ద ఫ్యాన్ రెక్కలు ఉంటాయి, కానీ రామ్‌జెట్‌ ఇంజిన్లలో కదలే భాగాలు ఏవీ ఉండవు. విమానంలో అత్యంత వేగంతో దూసుకుపోతున్నప్పుడు ఎదురుగా వచ్చే గాలి నేరుగా ఇంజిన్‌లోకి వెళ్తుంది. ఈ వేగం వల్ల గాలి తనంతట తానుగా కంప్రెస్‌ అవుతుంది. </p>
<p>Also Read: <a title="భోజనం తర్వాత ఎంత సమయానికి నీళ్లు తాగాలి? మధ్య మధ్యలో వాటర్ తాగడం మంచిదా కాదా?" href="https://telugu.abplive.com/education/drinking-water-after-meals-science-of-hydration-digestion-timing-ayurveda-vs-modern-medicine-247079" target="_self">భోజనం తర్వాత ఎంత సమయానికి నీళ్లు తాగాలి? మధ్య మధ్యలో వాటర్ తాగడం మంచిదా కాదా?</a></p>
<p>ఇలా కంప్రెస్ అయిన గాలికి ఇంధనాన్ని కలిపి మండిస్తారు. హైడ్రోజన్ అత్యధిక ఉష్ణోగ్రతల వద్ద కూడా వేగంగా మండుతుంది కాబట్టి Mach5 వేగాన్ని స్థిరంగా కొనసాగించడానికి ఇది తోడ్పడుతుంది. ఈ ప్రక్రియలో విడుదలయ్యే శక్తి విమానాన్ని ముందుకు నెడుతుంది. </p>
<h3>ప్రయోగం నిప్పుతో చెలగాటమే!</h3>
<p>హైపర్ సోనిక్ ప్రయాణం అనేది కేవలం వేగానికి సంబంధించినది మాత్రమే కాదు. ప్రాణాలకు భద్రత కల్పించడం అతి పెద్ద సవాలు. విమానం Mach5 వేగంతో గాలిని చీల్చుకుంటూ వెళ్తున్నప్పుడు, ఘర్షణ వల్ల దాని చుట్టూ ఉష్ణోగ్రత దాదాపు 1000 నుంచి 1900 డిగ్రీల సెల్సియస్ వరకు పెరుగుతుంది. ఇంత వేడికి సామాన్యమైన లోహాలు కరిగిపోతాయి. </p>
<p><strong>Also Read: <a title="నాన్నా పందులే కాదు సింహం కూడా గుంపుగానే వస్తుంది! ఎలివేషన్స్‌ ఇచ్చే ముందు వాస్తవం తెలుసుకో!" href="https://telugu.abplive.com/education/lions-do-not-roam-singly-they-roam-in-groups-social-structure-of-lions-african-forest-pride-dynamics-246533" target="_self">నాన్నా పందులే కాదు సింహం కూడా గుంపుగానే వస్తుంది! ఎలివేషన్స్‌ ఇచ్చే ముందు వాస్తవం తెలుసుకో!</a></strong></p>
<p>అంతా వేగంలో గాలి ప్రవాహం అస్థిరంగా మారుతుంది. దీని వల్ల విమానాన్ని కంట్రోల్ చేయడం కష్టమవుతుంది. విమానం బరువు తక్కువగా ఉండాలి. అదే సమయంలో అత్యంత బలంగా ఉండాలి. బరువైన పదార్థాలు వాడితే వేగం తగ్గుతుంది. తేలికపాటి పదార్థాలు వాడితే వేడిని తట్టుకోలేవు. </p>
<h3>భవిష్యత్‌లో ఎలా ఉండబోతోంది?</h3>
<p>జపాన్ చేసిన ఈ పరీక్షలో ఒక ముఖ్యమైన విషయం వెలుగులోకి వచ్చింది. వారి వాహనం లోపల ఎలక్ట్రానిక్ సిస్టమ్స్‌, కంట్రోల్‌ డివైజ్‌లు స్థిరంగా పని చేయగలిగాయి. దీని అర్థం మనం సరైన థర్మల్ ప్రొటెక్షన్ షీల్డ్స్‌ అభివృద్ధి చేస్తే మానవ ప్రయాణం సాధ్యమే. </p>
<p>హైపర్ సోనిక్ విమానాలు అందుబాటులోకి వస్తే ఒక ఖండం నుంచి మరో ఖండానికి ప్రయాణం కేవలం గంటలోపే ముగుస్తుంది. మెడికల్‌ ఎమర్జెన్సీ లేదా విపత్తు సమయాల్లో సహాయ సామాగ్రిని నిమిషాల్లోనే ప్రపంచంలో ఎక్కడికైనా చేరవేయవచ్చు. వ్యాపార లావాదేవీలు, డెలివరీలు శరవేగంగా జరుగుతాయి. </p>
<p>హైపర్ సోనిక్ ప్రయాణం ఇంకా పరిశోధన దశలోనే ఉంది. ప్రయాణికుల కోసం ఇది అందుబాటులోకి రావడానికి మరికొన్ని ఏళ్లు పట్టవచ్చు. ఇంజిన్ల సామర్థ్యం, పర్యావరణ ప్రభావం, భద్రతా ప్రమాణాలను శాస్త్రవేత్తలు ఇంకా క్షుణ్ణంగా అధ్యయనం చేస్తున్నారు.</p>
<p><iframe class="vidfyVideo" style="border: 0px;" src="https://telugu.abplive.com/web-stories/auto/honda-active-dlx-on-road-price-emi-calculator-andhra-pradesh-248746" width="631" height="381" scrolling="no"></iframe></p>
1 week ago
2 
