<p><strong>Hyderabad Mango Pickle Season: </strong>పచ్చళ్ల సీజన్ మాంచి జోరుమీదున్న ఈ టైమ్‌లో హైదరాబాద్ ఆవకాయ ట్రెండ్ సెట్ చేస్తోంది. ఇన్నాళ్లు పళ్లెటూళ్ల నుంచి హైదరాబాద్ నగరానికి ఆవకాయ పచ్చళ్ల జాడీలు పార్సిల్ వచ్చేవి. తెలుగు రాష్ట్రాల్లోని వివిధ జిల్లాల నుంచి హైదరాబాద్ మహానగరానికి ఉపాధి, ఉద్యోగాల కోసం వలస వచ్చిన లక్షలాది కుటుంబాలకు, సొంత ఊళ్ల నుంచే ఆవకాయ పచ్చడి తెచ్చుకునే వాళ్లు. కొన్ని దశాబ్దాలుగా ఇదే ట్రెండ్ కొనసాగుతోంది. అయితే తాజాగా హైదరాబాద్ నగరంలో సైతం ఆవకాయ పచ్చడి అద్భుతంగా పెట్టడమే కాదు, ఇన్నాళ్లు తమకు పంపిన పచ్చళ్ల జాడీలను ఇప్పుడు అదే మారుమూల గ్రామాలకు హైదరాబాద్ నుంచి పంపుతున్నారు. అమెరికాలో ఉండే బంధువులు సైతం హైదరాబాద్ ఆవకాయ కావాల్సిందే అంటున్నారంటే భాగ్యనగరం పచ్చడి క్రేజ్ ఏ రేంజ్‌లో ఉందో అర్దం చేసుకోవచ్చు.</p>
<h3>ఆవకాయకు కావాల్సిన సరకులన్నీ ఒకే చోట</h3>
<p>హైదరాబాద్ నగరంలో వివిధ రకాల పచ్చడి మామిడి నోరూరిస్తోంది. ఇవి హైదరాబాద్‌లోని దాదాపు అన్ని రైతుల రైతు బజార్‌లకు సమీపంలో లభిస్తాయి. నగరంలోని వివిధ ప్రాంతాల నుంచి ప్రతీ ఏటా వేలాది మంది ఆవకాయ ప్రియులు రైతు బజారుతోపాటు ప్రక్కనే ఉన్న ఈ స్టాల్స్‌లో పచ్చడి కాయలు కొంటుంటారు. నోరూరించే మాగాయ, అందరూ మెచ్చే ఆవకాయ పచ్చళ్లకు చిన్న రసాలు మొదలు ఏ రకం మామిడి కాయ కావాలన్నా కేపీహెచ్‌బీ సహా చాలా రైతుల బజార్లలో ఒకేచోట దొరికేస్తాయి. పచ్చడి కాయలు కొన్న వెంటనే ఆ పక్కనే, ముక్కలు కొట్టేవాళ్లు అందుబాటులో ఉంటారు. అలా కొని, ఇలా ఇస్తే చాలు.. కడిగి, తుడిచి ముక్కలు కొట్టి మరీ ఇచ్చేస్తారు. అంతేకాదండోయ్ ఆవకాయ పచ్చడికి అవసరమైన ఆవపిండి మొదలు నూనె, వెల్లుల్లి.. ఇలా ఒకటేమిటి,ఆవకాయ పచ్చడికి అవసరమైన ఏ టూ జెడ్ ఒకే చోట దొరికేస్తాయి. </p>
<p><iframe title="Natural vs Carbide Mangoes: కార్బైడ్ వాడిన మామిడిని గుర్తించడం ఎలా..? | Calcium Carbide| ABP Desam" src="https://www.youtube.com/embed/pvKq-FkVmPg" width="919" height="517" frameborder="0" allowfullscreen="allowfullscreen"></iframe></p>
<p> </p>
<h3>ముక్కలు కొట్టడానికే కూలీలు వస్తుంటారు</h3>
<p>ఆవకాయ సీజన్ ఏప్రిల్ నుంచి జూన్ మొదటి వారం వరకూ కనీసం 50 రోజులకు తగ్గకుండా ఉంటుంది. ఈ సీజన్ కోసమే ఉభయ గోదావరి జిల్లాల నుంచి మామిడి కాయ ముక్కలు కొట్టేందుకు వందల మంది వస్తుంటారు. నగరంలోని వివిధ ప్రాంతాల్లో రూమ్‌లు అద్దెకు తీసుకుని ఆవకాయ సీజన్ ముగిసేవరకూ హైదరాబాద్‌లోనే ఉంటూ, పచ్చడి కాయలు ముక్కలుగా కొడుతూ తక్కువలో తక్కువ అన్ని ఖర్చులు పోనూ నెలకు కనీసం 50వేలు సంపాదిస్తుంటారు.</p>
<h3>ఒక్కో రకానిది ఒక్కో రేటు</h3>
<p>పచ్చళ్ల సీజన్ వచ్చిందంటే హైదరాబాద్ మార్కెట్ మామిడి రైతులకు కల్పతరువుగా చెప్పవచ్చు. తెలుగు రాష్ట్రాలలో వివిధ ప్రాంతాల నుంచి ముఖ్యంగా ఉభయ గోదావరి జిల్లాలో మామిడి రైతులు హైదరబాద్ మార్కెట్ కు పచ్చడి కాయలు తరలించి, తామే స్వయంగా అమ్ముతూ లాభాల బాటపడుతున్నారు. ఇక్కడ చిన్న రసాలు ఒక్కో కాయ 20 నుంచి 30 రూపాయలు, తెల్ల గులాబీ 25 నుంచి 35 రూపాయలు, కొత్తపల్లి కొబ్బరి 30 నుంచి 40 రూపాయలు, ఐదర్ సాయిబ్ 25 నుంచి 30 రూపాయలు, దేశవాళీ కాయ 15 నుంచి 20 రూపాయలు, పెద్ద రసాలు 30 నుంచి 40 రూపాయలు, జలాలు 50 నుంచి 60 రూపాయలు, నాటు కాయ ఒక్కోటి 15 నుంచి 20 రూపాయలు, ఇలా కాయ సైజును బట్టి ఒక్కో పచ్చడి కాయ, ఒక్కో ధర పలుకుతుంది. </p>
<h3>హైదరాబాద్‌ ఆవకాయ్‌కు డిమాండ్</h3>
<p>నేను ఆవకాయ పచ్చడి కోసం గత ఏడాది తెల్లగులాబీ తీసుకున్నాం, ఈసారి పెద్ద రసాలు తీసుకున్నాను. పెద్దరసాలతో పచ్చడి పట్టడం వల్ల ఉప్పు, కారం తగిలితే ఆవకాయ పచ్చడి బాగుటుంది. ఒక్కోకాయ 25 రూపాయలు పడింది. ఇక్కడే కాయకు 8 రూపాయలు తీసుకుని ముక్కలుగా కొట్టి ఇచ్చేశారు. ప్రతీ ఏటా కేపీహెచ్ బీ రైతు బజార్ వద్ద దొరికే పచ్చడి మామిడి కాయలు కొంటుంటాం. మాగాయికి తెల్ల రసాలు తీసుకుంటాను. ఈ సమీపంలోనే హోల్ సేల్ దుకాణం ఉంది. కారం, ఆవపిండి, నూనె ఇలా అన్ని ఒకే చోట దొరికేస్తాయి. మా అమ్మాయి అమెరికాలో ఉంటుంది. హైదరాబాద్‌లో పట్టిన ఆవకాయ పచ్చడి ప్రతీ ఏటా అమెరికాకు పంపుతుంటాం. ఏపిలో ఉంటున్న మా బంధువులకు కూడా ఇక్కడ హైదరాబాద్‌లో పట్టిన ఆవకాయ పచ్చడి పంపుతుంటాను.-<strong> విజయవాణీ,హైదరాబాద్ </strong></p>
<p><strong><br /><img src="https://feeds.abplive.com/onecms/images/uploaded-images/2026/04/30/2cd1071f4d2a19b036b0d152bb59fcd71777532373296215_original.jpeg" /></strong></p>
<h3>బంధువులు కావాలంటారు</h3>
<p>మేం గత 25 ఏళ్లుగా హైదరాబాద్‌లో దొరికే మామిడి కాయలతోనే పచ్చడి పడుతున్నాం. మేము ఆవకాయ్ పట్టడమే కాదు, ఇక్కడి నుంచి ఏపిలోని వివిధ గ్రామాల్లో బంధువులకు సైతం పంపుతున్నాం. వాళ్లు కూడా హైదరాబాద్‌లో పట్టే ఆవకాయ్ అంటే చాలా బాగా ఇష్టపడుతున్నారు. - <strong>స్వర్ణకుమారి, హైదరాబాద్ </strong></p>
<p><strong><br /><img src="https://feeds.abplive.com/onecms/images/uploaded-images/2026/04/30/142ac9f23c191a72b3824ea89dc1842c1777532392610215_original.jpeg" /></strong></p>
<h3>జూన్ వరకు అమ్మకాలు</h3>
<p>ఉభయగోదావరి జిల్లాల్లోని పేరుపాలెం, నర్సాపురం, మొగల్తూరు ఇలా వివిధ ప్రాంతాలలో పండించిన పచ్చడి మామిడి కాయలు ఇక్కడ కేపీహెచ్బీ రైతు బజార్ కు సమీపంలో ప్రతీ ఏటా అమ్ముతుంటాం. పెద్ద రసాలు నుంచి నాటు కాయ వరకూ సుమారుగా 15 రకాల పచ్చడి మామిడి కాయలు ఇక్కడ అందుబాటులో ఉంటాయి. ఏప్రిల్ నుంచి జూన్ మొదటి వారం వరకూ అమ్మకాలు బాగా జరుగుతాయి. <strong>- యేసు, మొగల్తూరు రైతు </strong></p>
<p><strong><br /><img src="https://feeds.abplive.com/onecms/images/uploaded-images/2026/04/30/389b9fdc214936869ec6486d2e26133c1777532415320215_original.jpeg" /></strong></p>
<h3>కాయకు ఐదు రూపాయలే వచ్చే ఆదాయం 50 వేలు</h3>
<p>నేను గత 20 సంవత్సరాలుగా ఆవకాయ సీజన్ లో హైదరాబాద్ వచ్చి ఇక్కడే ఉంటూ , పచ్చడి మామిడి కాయలు ముక్కలు కొడుతూ ఉపాధి పొందుతున్నాను. నేను మాత్రమే కాదు వందల మంది ఏపిలోని వివిధ జిల్లాల నుంచి ఇక్కడకు వచ్చి ఈ సీజన్‌లో ముక్కలు కొట్టడం ద్వారా రోజుకు 2వేల రూపాయల వరకూ సంపాదిస్తుంటారు. అన్ని ఖర్చులు పోనూ నెలకు 50 వేల వరకూ ఆదాయం వస్తుంది. ఓ రెండు నెల పాటు ఆవకాయ పచ్చడి సీజన్‌లో హైదరాబాద్ ఎంతో మందికి ఉపాధి కల్పిస్తోంది. పచ్చడి మామిడి కాయ సైజును బట్టి, ఒక్కో కాయ 5రూపాయల నుంచి 10రూపాయల వరకూ తీసుకుంటాం.<strong>- నాగేశ్వరరావు, హైదరాబాద్ (మామిడి ముక్కలు కొట్టే వ్యక్తి)</strong></p>
<p><strong><br /><img src="https://feeds.abplive.com/onecms/images/uploaded-images/2026/04/30/c5b2020357f39df4191b888572a0f6b01777532461656215_original.jpeg" /></strong></p>
1 month ago
5 
