<p>Guntur Viral News: సాధారణంగా పోలీసులకు వచ్చే ఫిర్యాదులు ఎలా ఉంటాయి? దొంగతనాలు, గొడవలు, ఆస్తి వివాదాలు లేదా రోడ్డు ప్రమాదాలు. కానీ గుంటూరు జిల్లాలోని లాలాపేట పోలీస్ స్టేషన్‌కు ఓ వింత ఫిర్యాదు వచ్చింది. కేవలం కజ్జికాయలు పెట్టలేదనే కారణంతో ఒక అల్లుడు ఏకంగా పోలీసులనే ఆశ్రయించాడు. వినడానికి నవ్వు తెప్పించినా ఈ ఘటన ఇప్పుడు సోషల్ మీడియాలో వైరల్‌గా మారింది. </p>
<h3>అసలేం జరిగిందంటే?</h3>
<p>గుంటూరు లాలాపేట పరిధిలో నివసించే ఒక వ్యక్తికి ముగ్గురు కుమార్తెలు. ముగ్గురికీ పెళ్లిళ్లు చేశాడు. పండుగకో, శుభకార్యానికే లేదా మరేదైనా సందర్భానికో తన ముగ్గురు అల్లుళ్లను ఇంటికి ఆహ్వానిస్తుంటారు. ఈ మధ్య కూడా అలానే పిలిచాడు. మామగారి పిలుపు మేరకు ఇంటికి వచ్చారు ముగ్గురు అల్లుళ్లు. ఇంటికి వచ్చిన అల్లుళ్లకు మర్యాదలు చేయడం చేశారు. అందులో భాగంగానే పిండి వంటలు చేయించారు. </p>
<p>అక్కడే అసలు సమస్య మొదలైంది. వచ్చిన ముగ్గురు అల్లుళ్లలో ఇద్దరు తోడల్లుళ్లకు మామగారు ఎంతో ఇష్టంగా కజ్జికాయలు వడ్డించారు. కానీ మూడో అల్లుడికి మాత్రం పట్టించుకోలేదట. అతడికి కజ్జికాయు ఇవ్వకుండా వదిలేశారట. ఆ టైంలో ఆ అల్లుడు అవమానంగా భావించాడు. ఇద్దరు తోడల్లుళ్లకు పెట్టి తనకు ఎందుకు పెట్టలేదని కుమిలిపోయాడు. </p>
<h3>డయల్ 100కు ఫిర్యాదు </h3>
<p>సాధారణంగా ఇలాంటి చిన్న చిన్న విషయాలను కుటుంబ సభ్యులతో చెప్పుకొని సర్దుకుంటారు. కానీ ఆ అల్లుడు మాత్రం దీన్ని సీరియస్‌గా తీసుకున్నాడు. తన మామ కావాలనే తనను అవమానించాడని, తాను మూడో అల్లుడిని అయినందునే ఈ వివక్ష చూపించారని భావించాడు. వెంటనే తన జేబులో ఉన్న ఫోన్ తీసి ఏకంగా డయల్‌ 100కు కాల్ చేశాడు. అత్యవసర సేవల కోసం ఉద్దేశించిన డయల్‌ 100 పోలీసులకు తన గోడు వెళ్లబోసుకున్నాడు. </p>
<p>సార్‌... మా మామగారు నా ఇద్దరు తోడల్లుళ్లకు కజ్జికాయలు పెట్టి, నాకు మాత్రం పెట్టలేదు. ఇది నాకు జరిగిన పెద్ద అవమానం. దయచేసి నాకు న్యాయం చేయండి" అంటూ పోలీసులకు ఫిర్యాదు చేశాడు. ఈ మాట విన్న పోలీసులకు ఒక్కసారిగా మైండ్ బ్లాక్ అయ్యింది. </p>
<h3>పోలీసుల స్పందన</h3>
<p>ఈ వింత ఫిర్యాదు విన్న లాలాపేట పోలీసులు మొదటి ఆశ్చర్యపోయారు. అల్లుడి ఆవేదన చూసి నవ్వుకోవాలో లేకా సీరియస్‌ అవ్వాలో వారికి అర్థం కాలేదు. కానీ ఫిర్యాదు అందింది కాబట్టి స్పందించక తప్పలేదు. వెంటనే రంగంలోకి దిగిన పోలీసులు ఆ మామగారితో మాట్లాడారు. చిన్న పిల్లల గొడవల్లా ఉన్న వ్యవహారాన్ని సర్ది చెప్పే ప్రయత్నం చేశారు. అందర్నీ సమానంగా చూడాలంటూ హితవు పలికారు. దీంతో ఆ అల్లుడు శాంతించాడు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/benefits-of-eating-peanuts-every-day-239510" width="631" height="381" scrolling="no"></iframe></p>
1 month ago
4 
