<p><strong>Friday Stock Markets Crash: </strong>ఫిబ్రవరి 27, 2026, శుక్రవారం నాడు భారత స్టాక్ మార్కెట్లు భారీ పతనాన్ని మూటగట్టుకున్నాయి. అంతర్జాతీయ ప్రతికూల పవనాలు, భౌగోళిక రాజకీయ ఉద్రిక్తతల కారణంగా ఇన్వెస్టర్లు అమ్మకాలకు మొగ్గు చూపడంతో దలాల్ స్ట్రీట్ నష్టాల్లో మునిగిపోయింది. సెన్సెక్స్ ఒకానొక దశలో 1,000 పాయింట్లకు పైగా పతనమవగా, నిఫ్టీ కూడా కీలకమైన 25,200 స్థాయి కంటే దిగువకు చేరుకుంది. ఈ ఒక్క రోజే ఇన్వెస్టర్ల సంపద సుమారు రూ. 5.5 లక్షల కోట్లు ఆవిరైపోయింది.</p>
<p><strong>ఐటీ షేర్లు కోలుకునే ప్రయత్నంలో ఉండటం కొసమెరుపు </strong></p>
<p>ప్రధానంగా బ్యాంకింగ్, ఎఫ్ఎంసీజీ (FMCG), ఆటో రంగ షేర్లు అమ్మకాల ఒత్తిడికి గురయ్యాయి. భారతీ ఎయిర్‌టెల్, ఏషియన్ పెయింట్స్, రిలయన్స్ ఇండస్ట్రీస్ వంటి దిగ్గజ సంస్థల షేర్లు నష్టాల్లో ముగిశాయి. అయితే, ప్రపంచ టెక్ మార్కెట్ల ప్రభావంతో ఇన్ఫోసిస్, టీసీఎస్ వంటి ఐటీ షేర్లు మాత్రం కొంత మేర కోలుకొని మార్కెట్ మరింత దిగజారకుండా స్వల్పంగా అడ్డుకున్నాయి.</p>
<p><strong>ఇరాన్, అమెరికా మధ్య అనిశ్చితితో సమస్య</strong></p>
<p>మార్కెట్ పతనానికి ప్రధాన కారణం అమెరికా-ఇరాన్ మధ్య నెలకొన్న అనిశ్చితి. ఇరు దేశాల మధ్య అణు చర్చలు ఫలించకపోవడం, మధ్యప్రాచ్యంలో యుద్ధ మేఘాలు కమ్ముకోవడం ఇన్వెస్టర్లలో భయాందోళనలు రేకెత్తించాయి. దీనికి తోడు విదేశీ సంస్థాగత ఇన్వెస్టర్లు నిరంతరం షేర్లను విక్రయిస్తుండటం కూడా మార్కెట్ సెంటిమెంట్‌ను దెబ్బతీసింది. అమెరికా వడ్డీ రేట్ల తగ్గింపు వాయిదా పడవచ్చనే వార్తలు కూడా మార్కెట్‌ను కలవరపెట్టాయి.</p>
<p><strong>భారత జీడీపీ లెక్కలపై ఆశలు </strong></p>
<p>రూపాయి విలువ కూడా అమెరికా డాలర్‌తో పోలిస్తే 90.94 స్థాయికి పడిపోవడం ఆర్థిక వ్యవస్థపై ఒత్తిడిని పెంచింది. వారాంతం కావడంతో ఇన్వెస్టర్లు తమ పొజిషన్లను క్లోజ్ చేసుకోవడం వల్ల కూడా అమ్మకాలు పెరిగాయి. రానున్న రోజుల్లో విడుదల కానున్న భారత జీడీపీ గణాంకాలు , అంతర్జాతీయ పరిణామాల ఆధారంగానే మార్కెట్ గమనం ఉంటుందని నిపుణులు విశ్లేషిస్తున్నారు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/business/how-to-open-a-demat-account-online-239137" width="631" height="381" scrolling="no"></iframe></p>
1 month ago
4 
