<p><strong>Differences Between EPF and EPS:</strong> ఒక వ్యక్తికి, ఏదైనా ఉద్యోగం చేస్తున్నంతకాలం, కుటుంబాన్ని పోషించుకోవడానికి స్థిరమైన ఆదాయం వస్తుంది. ఉద్యోగం నుంచి రిటైర్‌ అయిన తర్వాత పరిస్థితి ఏంటి, అతనికి ఆదాయం ఎలా వస్తుంది, శరీరంలో బలం తగ్గిపోయిన తర్వాత అతనికి ఉద్యోగం ఎవరు ఇస్తారు? - ఈ ప్రశ్నలకు సమాధానమే EPFO (Employees' Provident Fund Organization). రిటైర్మెంట్‌ తర్వాత కూడా ఉద్యోగులకు ఆర్థికంగా అండగా నిలబడేందుకు, భారత ప్రభుత్వం రెండు ప్రధాన పదవీ విరమణ పథకాలను అమలు చేస్తోంది. అవి.. ఉద్యోగుల భవిష్య నిధి (Employees' Provident Fund - EPF), ఉద్యోగుల పింఛను పథకం (Employee Pension Scheme - EPS).</p>
<p>రెండు పథకాలు, ఉద్యోగులకు వారి రిటైర్మెంట్‌ తర్వాతి జీవితంలో డబ్బు కొరత లేకుండా చూస్తాయి. అయినప్పటికీ, ఈ రెండు పథకాల మధ్య కొన్ని ముఖ్యమైన తేడాలు ఉన్నాయి, వాటి గురించి ఉద్యోగులు తప్పనిసరిగా తెలుసుకోవాలి.</p>
<p><strong>ఎంప్లాయీస్ ప్రావిడెంట్ ఫండ్ (EPF) అంటే ఏంటి?</strong><br />ఈపీఎఫ్‌ అనేది కేంద్ర ప్రభుత్వ సామాజిక భద్రతా కార్యక్రమం. ఉద్యోగుల కోసం రిటైర్మెంట్‌ కార్పస్‌ (పదవీ విరమణ చేసేనాటికి పెద్ద మొత్తంలో డబ్బు) సేకరించడానికి దీనిని రూపొందించారు. ఈ పథకం కింద, ఉద్యోగి & అతని కంపెనీ యాజమాన్యం ఇద్దరూ కొంత నిర్ధిష్ట మొత్తాన్ని నెలనెలా జమ చేస్తారు. కాలక్రమేణా పెద్ద మొత్తంలో ఫండ్‌ సృష్టిస్తారు. పదవీ విరమణ తర్వాత, ఉద్యోగులు ఈ మొత్తాన్ని ఒకేసారి విత్‌డ్రా చేసుకోవచ్చు, ఆర్థికంగా ఇబ్బంది పడకుండా జీవిత ప్రయాణం కొనసాగించవచ్చు.</p>
<p><strong>ఎంప్లాయీ పెన్షన్ స్కీమ్ (EPS) అంటే ఏంటి?</strong><br />ఇది EPFలో ఒక భాగం. రిటైర్మెంట్‌ తర్వాత, ఆ ఉద్యోగికి నెలవారీ పెన్షన్ అందించడం దీని ఉద్దేశం. పొదుపును ప్రోత్సహించేందుకు EPF ఉంటే; అర్హత కలిగిన ఉద్యోగులకు రిటైర్మెంట్‌ తర్వాత కూడా నెలవారీ ఆదాయం అందేలా హామీ ఇచ్చేందుకు EPF ఉంది.</p>
<p><strong>EPF - EPS మధ్య కీలక భేదాలు</strong></p>
<table style="border-collapse: collapse; width: 87.6436%;" border="1">
<tbody>
<tr>
<td style="width: 11.2554%;"> </td>
<td style="width: 40.773%; text-align: center;"><strong>EPF</strong></td>
<td style="width: 35.2544%; text-align: center;"><strong>EPS</strong></td>
</tr>
<tr>
<td style="width: 11.2554%;">కాంట్రిబ్యూషన్‌</td>
<td style="width: 40.773%;">ఉద్యోగులు జీతం + డియర్‌నెస్ అలవెన్స్ (DA)లో 12 శాతం, కంపెనీ యాజమాన్యం 3.67 శాతం జమ చేస్తారు.</td>
<td style="width: 35.2544%;">ఉద్యోగులు కాంట్రిబ్యూట్‌ చేయరు. కంపెనీ యాజమాన్యం, ఉద్యోగి EPF జీతం + DA లో 8.33 శాతం జమ చేస్తుంది.</td>
</tr>
<tr>
<td style="width: 11.2554%;">కంట్రిబ్యూషన్ పరిమితి</td>
<td style="width: 40.773%;">నిర్ధిష్ట పరిమితి లేదు; జీతం + DA శాతం ఆధారంగా నిర్ణయమవుతుంది.</td>
<td style="width: 35.2544%;">నెలవారీ కాంట్రిబ్యూషన్‌ రూ. 1,250కి పరిమితం.</td>
</tr>
<tr>
<td style="width: 11.2554%;">అర్హత</td>
<td style="width: 40.773%;">EPF కింద కవర్ అయిన ఉద్యోగులందరికీ అందుబాటులో ఉంటుంది.</td>
<td style="width: 35.2544%;">జీతం + డీఏగా రూ.15,000 వరకు సంపాదించే ఉద్యోగులకు మాత్రమే అందుబాటులో ఉంటుంది.</td>
</tr>
<tr>
<td style="width: 11.2554%;">నగదు ఉపసంహరణ</td>
<td style="width: 40.773%;">ఐదేళ్ల సర్వీసుకు ముందు విత్‌డ్రా చేయాలంటే ఆదాయ పన్ను చెల్లించాలి.</td>
<td style="width: 35.2544%;">10 సంవత్సరాల కంటే తక్కువ సర్వీస్ ఉన్న ఉద్యోగులకు లేదా 58 ఏళ్ల వయస్సు వచ్చిన ఉద్యోగులకు ముందస్తు ఉపసంహరణకు అనుమతి ఉంటుంది.</td>
</tr>
<tr>
<td style="width: 11.2554%;">ప్రయోజనం రకం</td>
<td style="width: 40.773%;">పదవీ విరమణ లేదా 60 రోజుల నిరుద్యోగం తర్వాత ఏకమొత్తంగా చెల్లిస్తారు.</td>
<td style="width: 35.2544%;">పదవీ విరమణ తర్వాత ఉద్యోగికి, లేదా ఉద్యోగి మరణించిన సందర్భంలో నామినీలకు రెగ్యులర్ పెన్షన్ వస్తుంది.</td>
</tr>
<tr>
<td style="width: 11.2554%;">వడ్డీ </td>
<td style="width: 40.773%;">ప్రభుత్వం నిర్ణయించిన ప్రకారం వడ్డీ వస్తుంది, ప్రస్తుతం 8.15 శాతం వార్షిక వడ్డీ.</td>
<td style="width: 35.2544%;">కాంట్రిబ్యూషన్‌పై వడ్డీ ఉండదు.</td>
</tr>
<tr>
<td style="width: 11.2554%;">ఆదాయ పన్ను</td>
<td style="width: 40.773%;">పెట్టుబడి, వడ్డీ, మెచ్యూరిటీ మొత్తంపై పూర్తిగా పన్ను మినహాయింపు. </td>
<td style="width: 35.2544%;">పెన్షన్ చెల్లింపులు, ఒకేసారి విత్‌డ్రా చేసిన మొత్తాలు పన్ను పరిధిలోకి వస్తాయి.</td>
</tr>
</tbody>
</table>
<p><strong>EPF & EPS ఎలా కలిసి పని చేస్తాయి?</strong><br />ఉద్యోగికి సమగ్రమైన ఆర్థిక భద్రతను అందించడానికి EPF & EPS ఒకదానితో ఒకటి కలిసి పని చేస్తాయి. EPF, ఉద్యోగి రిటైర్మెంట్ నాటికి పెద్ద మొత్తంలో కార్పస్‌ సృష్టిస్తుంది. EPS, పదవీ విరమణ తర్వాత కూడా స్థిరమైన నెలవారీ ఆదాయం అందిస్తుంది. ఈ రెండు పథకాలు కలిసి ఉద్యోగులకు బలమైన ఆర్థిక భద్రత వలయాన్ని సృష్టిస్తాయి, వృద్ధాప్యంలో వారి ఆర్థిక స్వాతంత్ర్యాన్ని కాపాడతాయి.</p>
<p>ఈ రెండు పథకాల మధ్య వ్యత్యాసాలను అర్థం చేసుకోవడం వల్ల ఉద్యోగులు తమ రిటైర్‌మెంట్ ప్లానింగ్ గురించి కీలక నిర్ణయాలు తీసుకోవడానికి, ప్రయోజనాలను పెంచుకోవడానికి వీలవుతుంది.</p>
<p>మరో ఆసక్తికర కథనం: <a title="ATM నుంచి పీఎఫ్‌ డబ్బు విత్‌డ్రా! - ఉద్యోగులకు బంపర్‌ ఆఫర్‌" href="https://telugu.abplive.com/business/personal-finance/you-can-withdraw-provident-fund-pf-from-an-atm-starting-2025-announces-labour-ministry-190251" target="_self">ATM నుంచి పీఎఫ్‌ డబ్బు విత్‌డ్రా! - ఉద్యోగులకు బంపర్‌ ఆఫర్‌</a> </p>
11 months ago
7 
