<p>Ayyanna Patrudu Urges Paddy Farmers to Enroll in Crop Insurance Scheme Before August 15</p>
<p>అమరావతి: ఈ ఏడాది ఎల్ నినో (El Nino) కారణంగా భారత్‌లో పలు రాష్ట్రాల్లో లోటు వర్షపాతం నమోదవుతుంది. ప్రతికూల వాతావరణ ప్రభావం కారణంగా వర్షాలు సరిగ్గా కురవక వరి పంటకు నష్టం జరిగే ప్రమాదం ఉందని, అందువల్ల వరి సాగు చేసే రైతులు తప్పనిసరిగా పంట బీమా చేయించుకోవాలని ఏపీ ప్రభుత్వం సూచించింది. ఏపీ అసెంబ్లీ స్పీకర్ చింతకాయల అయ్యన్నపాత్రుడు మాట్లాడుతూ.. ప్రతికూల వాతావరణ పరిస్థితుల వల్ల రైతులు ఆర్థికంగా నష్టపోకుండా రక్షణ కల్పించేందుకే ప్రభుత్వం ఈ బీమా సౌకర్యాన్ని అందుబాటులోకి తెచ్చిందన్నారు. కనుక రాష్ట్రంలోని రైతులు ఆగస్టు 15వ తేదీ లోగా ఎకరానికి కేవలం రూ. 84 చెల్లించి తమ వరి పంటను ఇన్సూరెన్స్ పరిధిలోకి తీసుకురావాలని పిలుపునిచ్చారు.</p>
<p><strong>రైతుల వద్ద ఏ డాక్యుమెంట్లు ఉండాలి..</strong></p>
<p>రైతుల సౌలభ్యం కోసం కామన్ సర్వీస్ సెంటర్లు (CSC), ఆధార్ అప్‌డేట్ సెంటర్లతో పాటు సమీపంలోని గ్రామ సచివాలయాల్లోనూ ఇన్సూరెన్స్ చేసుకునే వెసులుబాటు కల్పించినట్లు ఆయన వెల్లడించారు. పంట బీమా నమోదు కోసం రైతులు తమ 1B పత్రం, బ్యాంక్ పాస్ బుక్ మొదటి పేజీ జిరాక్స్, సెల్ఫ్ డిక్లరేషన్ సర్టిఫికెట్, ఆధార్‌తో లింక్ అయిన మొబైల్ నంబర్‌తో (ఓటీపీ కోసం) గ్రామ సచివాలయాలకు గానీ లేదా సీఎస్సీ సెంటర్లకు గానీ వెళ్లాలని ఆయన వివరించారు.</p>
<p><strong>కౌలు రైతులు ఏ డాక్యుమెంట్స్ సమర్పించాలి..</strong></p>
<p>కౌలు రైతులైతే కౌలు ఒప్పంద పత్రం లేదా గ్రామ సర్పంచ్/ వీఆర్‌వో ధృవీకరణ పత్రాన్ని సమర్పించాల్సి ఉంటుందని అయ్యన్నపాత్రుడు స్పష్టం చేశారు. అలాగే, నాట్లు పూర్తయిన 15 నుండి 30 రోజులలోపు తప్పనిసరిగా 'e-crop'లో తమ వివరాలను నమోదు చేయించుకోవాలన్నారు. అలా నమోదు చేసుకున్న రైతులకు పంట నష్టం వాటిల్లితే ఎకరానికి రూ. 42,400 వరకు బీమా పరిహారం అందుతుందని పేర్కొన్నారు.</p>
<p>ఈ సందర్భంగా మండల స్థాయి నాయకులు, ప్రజాప్రతినిధులు గ్రామీణ ప్రాంతాల్లోని రైతులకు పంట బీమా (E Crop Insurance)పై పూర్తి అవగాహన కల్పించాలని స్పీకర్ కోరారు. అర్హులైన రైతులందరిచేత ఇన్సూరెన్స్ ప్రీమియం చెల్లించేలా చూసే బాధ్యతను ప్రజాప్రతినిధులు సమర్థవంతంగా చేపట్టాలని సూచించారు. వరి సాగు చేసిన ప్రతీ రైతు ఈ అవకాశాన్ని సద్వినియోగం చేసుకుని, ఆగస్టు 15వ తేదీలోగా ఎకరానికి రూ. 84 చెల్లించి తమ పంటకు ఆర్థిక భద్రత కల్పించుకోవాలని స్పీకర్ అయ్యన్నపాత్రుడు విజ్ఞప్తి చేశారు. ఇతర పంటలు సాగుచేసే రైతులు సైతం ప్రభుత్వ సూచనలు పాటిస్తూ పంటలకు బీమా చేసుకుని నష్టం వాటిల్లిన సమయంలో లబ్ధి పొందాలని సూచించారు.</p>
2 months ago
6 
