<p>హైదరాబాద్: తెలంగాణ ముఖ్యమంత్రి రేవంత్‌రెడ్డి విదేశీ పర్యటన మధ్యలోనే ముగించుకుని రాష్ట్రానికి తిరిగి రానున్నారు. అయితే కేంద్రం పర్మిషన్ ఇవ్వకపోవడంతో రేవంత్ రెడ్డి అమెరికాకు వెళ్లకుండానే యూకే నుంచి భారత్‌కు తిరుగు ప్రయాణం అవుతున్నారు. తన అమెరికా పర్యటనకు కేంద్ర ప్రభుత్వం అనుమతి నిరాకరించడంపై సీఎం రేవంత్ రెడ్డి తీవ్ర అసంతృప్తి వ్యక్తం చేశారు. కేవలం రాజకీయ కారణాల వల్లనే విదేశీ వ్యవహారాల మంత్రిత్వ శాఖ (MEA) తన పర్యటనకు అనుమతి ఇవ్వలేదని పేర్కొన్నారు. కేంద్రం అనుమతి నిరాకరించడంతో తాను ముందస్తుగా షెడ్యూల్ చేసుకున్న అమెరికాలోని బోస్టన్ పర్యటనకు వెళ్లలేకపోతున్నట్లు వివరించారు.</p>
<p>ఈ విదేశీ పర్యటన అంశంలో తనకు పూర్తి స్థాయిలో మద్దతుగా నిలిచిన ఏఐసీసీ అధ్యక్షుడు మల్లికార్జున ఖర్గేకు సిఎం రేవంత్‌రెడ్డి ప్రత్యేక కృతజ్ఞతలు తెలిపారు. అలాగే తన లండన్ పర్యటన విజయవంతంగా ముగిసిందని, మరికొన్ని గంటల్లోనే హైదరాబాద్‌కు తిరిగొస్తున్నానని వెల్లడించారు. హైదరాబాద్ చేరుకున్నాక ఈ వివాదానికి సంబంధించిన ఇతర అంశాలపై పలు విషయాలు మాట్లాడతానని తెలిపారు. ఈ విషయంలో పార్టీ నేతలు, కార్యకర్తలు, ప్రజల నుంచి లభించిన అద్భుతమైన మద్దతుకు ఆయన కృతజ్ఞతలు తెలిపారు.</p>
<blockquote class="twitter-tweet">
<p dir="ltr" lang="en">My deepest gratitude for the strong support from our leader and Congress party national president, Shri Mallikarjun Kharge ji <a href="https://x.com/kharge?ref_src=twsrc%5Etfw">@kharge</a> on the issue of Centre denying me permission to travel to the USA. <br /><br />I am very thankful to my party, all the leaders and people across the country…</p>
— Revanth Reddy (@revanth_anumula) <a href="https://x.com/revanth_anumula/status/2091451232338465075?ref_src=twsrc%5Etfw">August 23, 2026</a></blockquote>
<p>
<script src="https://platform.x.com/widgets.js" async="" charset="utf-8"></script>
</p>
<p><strong>రేవంత్ రెడ్డి అమెరికా టూర్ పర్మిషన్ నిరాకరణపై విదేశాంగ శాఖ</strong></p>
<p>తెలంగాణ CM రేవంత్ రెడ్డి అమెరికా పర్యటనకు కేంద్ర విదేశాంగ మంత్రిత్వ శాఖ (MEA) పొలిటికల్ క్లియరెన్స్ నిరాకరించడం రాజకీయంగా సంచలనంగా మారింది. విదేశాంగ మంత్రిత్వ శాఖ అధికార ప్రతినిధి రణధీర్ జైస్వాల్ ఈ నిర్ణయం వెనుక ఉన్న కారణాన్ని వివరించారు. సాధారణంగా ముఖ్యమంత్రులు లేదా ప్రముఖుల విదేశీ పర్యటనలకు అనుమతి ఇచ్చే ముందు, వారు నిర్వహించే పదవికి, పర్యటన ఉద్దేశ్యానికి ప్రతిపాదిత ప్రోగ్రామ్ తగినట్లుగా ఉందో లేదో సమీక్షిస్తామని ఆయన పేర్కొన్నారు.</p>
<p>రణధీర్ జైస్వాల్ మాట్లాడుతూ.. సీఎం రేవంత్ రెడ్డి ప్రతిపాదిత అమెరికా పర్యటన విషయంలో నిర్దేశిత నిబంధనలు పాటించలేదని, పర్యటన ఉద్దేశం ఆయన హోదాకు తగినట్లుగా సరిపోలలేదని వెల్లడించారు. అందుకే కేంద్ర ప్రభుత్వం ఈ క్లియరెన్స్ నిరాకరించిందని ఆయన తెలిపారు.</p>
<p>తెలంగాణ ముఖ్యమంత్రి కార్యాలయం (CMO) ప్రకారం, రేవంత్ రెడ్డి ప్రస్తుతం లండన్ పర్యటనలో ఉన్నారు. షెడ్యూల్ ప్రకారం అక్కడి నుంచి అమెరికాలోని హార్వర్డ్, ఎంఐటీ, వర్జీనియా టెక్ వంటి ప్రముఖ విశ్వవిద్యాలయాలను సందర్శించడంతో పాటు, న్యూయార్క్‌లో ఇండియన్ ఓవర్సీస్ కాంగ్రెస్ నిర్వహించే కార్యక్రమంలో పాల్గొనాల్సి ఉంది. ఈ పర్యటనల కోసం రాష్ట్ర ప్రభుత్వం ఆగస్టు 16న దరఖాస్తు చేసుకోగా, అధికారిక ప్రతినిధి బృందం యూకే చేరుకున్న తర్వాత అమెరికా పర్యటనకు పర్మిషన్ కేంద్రం నిరాకరించింది. దీంతో సీఎం రేవంత్ రెడ్డి బోస్టన్ పర్యటనను రద్దు చేసుకుని ఆగస్టు 23న లండన్ నుంచి నేరుగా హైదరాబాద్‌కు తిరిగి రానున్నారు.</p>
2 months ago
3 
