<p><strong>Chia Seeds Guide :</strong> చియా గింజలు ఆరోగ్యానికి ఎంతో మంచివి. ఈ విషయం అందరికీ తెలుసు. ఎందుకంటే వీటిలో ఫైబర్ పుష్కలంగా ఉంటుంది. ఒమేగా ఫ్యాటీ 3 యాసిడ్స్తో పాటు.. ప్రోటీన్ నిండుగా కలిగి ఉంటాయి. దీనిలోని యాంటీఆక్సిడెంట్లు గుండె ఆరోగ్యానికి మేలు చేయడంతో పాటు.. కొలెస్ట్రాల్ కంట్రోల్ చేస్తాయి. బరువు తగ్గేందుకు హెల్ప్ చేస్తాయి. అందుకే వీటిని ఎక్కువ మంది డైట్లో తీసుకుంటారు. కానీ సరైన విధంగా, సరైన పరిమితిలో తీసుకోకపోతే కొన్ని ప్రమాదకరమైన సైడ్ ఎఫెక్ట్స్ కూడా ఉంటాయని చెప్తున్నారు నిపుణులు. అందుకే చియాసీడ్స్ ఎలా తినాలి? ఎప్పుడు తింటే మంచిది.. వాటి వల్ల కలిగే సైడ్ ఎఫెక్ట్స్ ఏంటో చూసేద్దాం.</p>
<h3>నానబెట్టకుండా..</h3>
<p>చియా సీడ్స్ నీటిలో నానబెట్టకుండా తీసుకుంటే.. అవి గొంతులో అతుక్కుపోతాయి. తర్వాత ద్రవాన్ని పీల్చుకుని.. ఉబ్బిపోతాయి. అవి గొంతులో ఇరుక్కుపోయే ప్రమాదం ఉంది. దీనివల్ల చాలా ఇబ్బంది పడతారు. ఒక్కోసారి ఇది ప్రాణాంతకమవుతుంది. </p>
<h3>అలర్జీ సమస్యలు</h3>
<p>కొంతమందికి చియా గింజలు తింటే తల తిరగడం, ముఖంపై వాపు, చర్మంపై దద్దుర్లు రావడం వంటి అలర్జీలు కలగవచ్చు. ఈ సమస్యలు ఉంటే చియా సీడ్స్ తినకపోవడమే మంచిది.</p>
<h3>ప్రతికూల ప్రభావం</h3>
<p>డయాబెటిస్, బీపీ, రక్తం పలుచగా చేసే మందులు వాడేవారు చియా గింజలు తీసుకునే ముందు డాక్టర్‌ను సంప్రదించాలి. లేదంటే ఇవి మీపై ప్రతికూల ప్రభావం చూపిస్తాయి.</p>
<h3>పోషకాల శోషణ..</h3>
<p>చియా సీడ్స్లో ఫైబర్ పుష్కలంగా ఉంటుంది. ఇది కాల్షియం, ఐరన్, జింక్ వంటి ఖనిజాలు శరీరానికి అందడాన్ని ఆలస్యం చేయవచ్చు. కాబట్టి సప్లిమెంట్స్ తీసుకునేవారు గ్యాప్ తీసుకుని చియా సీడ్స్ తీసుకోవాలి.</p>
<h3>ప్రోస్టేట్ క్యాన్సర్‌</h3>
<p>చియా గింజల్లో ఉండే ALA ఫ్యాటీ యాసిడ్ ప్రోస్టేట్ క్యాన్సర్‌పై ప్రభావం చూపుతుందని కొందరు చెప్తారు. కానీ దీనిపై మరిన్ని పరిశోధనలు జరగాల్సి ఉంది.</p>
<h3>కిడ్నీ సమస్యలు</h3>
<p>చియా సీడ్స్లో పొటాషియం, ఫాస్ఫరస్ అధికంగా ఉండటంతో కిడ్నీ సమస్యలు ఉన్నవారు జాగ్రత్తగా తీసుకోవాలి. వైద్యుల సూచనల మేరకు వీటిని తీసుకుంటే మంచిది. </p>
<h3>జీర్ణ సమస్యలు</h3>
<p>చియా సీడ్స్ అధికంగా తింటే గ్యాస్, బ్లోటింగ్, కడుపు నొప్పి, డయేరియా లేదా మలబద్ధకం వంటి జీర్ణ సమస్యలు రావచ్చు. కాబట్టి లిమిటెడ్గా తీసుకోవాలి. </p>
<p>ఇవేకాకుండా వీటిలోని ఒమెగా-3 ఫ్యాట్స్ వల్ల రక్తం పలుచగా మారి గాయాలైతే ఎక్కువగా రక్తస్రావం కావచ్చు. ఎక్కువగా తింటే కేలరీలు పెరిగి.. బరువు కూడా పెరగవచ్చు. </p>
<h3>తీసుకోవాల్సిన జాగ్రత్తలు.. </h3>
<p>చియాసీడ్స్ పూర్తిగా నానబెట్టి తీసుకోవాలి. అలాగే వాటిని తీసుకున్న తర్వాత శరీరానికి నీటిని ఎక్కువ అందించాలి. లేదంటే డీహైడ్రేషన్ రావచ్చు. వీటిలోని అధికంగా ఫైబర్ థైరాయిడ్ మందుల ప్రభావాన్ని తగ్గిస్తుంది. కాబట్టి వాటితో కలిపి తీసుకోకూడదు. గర్భిణీలు వైద్యుల సలహాతోనే వీటిని తీసుకోవాలి. </p>
<h3>చియా సీడ్స్ ఎలా తీసుకోవాలంటే..</h3>
<p>చియాసీడ్స్లో నీటిలో లేదా పాలల్లో కచ్చితంగా 20–30 నిమిషాలు నానబెట్టాలి. రోజుకు 1 లేదా 2 టేబుల్ స్పూన్స్ మించి తీసుకోకూడదు స్మూతీలు, ఓట్స్, జ్యూస్‌లో కలిపి తీసుకోవచ్చు. తక్కువ పరిమాణంతో స్టార్ట్ చేసి.. ఎక్కువ తీసుకోవచ్చు. ఉదయాన్నే ఖాళీ కడుపుతో తింటే మెటబాలిజం పెరుగుతుంది. దీనివల్ల బ్రేక్‌ఫాస్ట్‌లో ఎక్కువ ఆకలి ఉండదు. వర్కౌట్ ముందు తీసుకుంటే ఎనర్జీ పెరుగుతుంది. చియా సీడ్స్ ఆరోగ్యానికి మంచివే అయినా.. సరైన విధంగా తీసుకోకపోతే సమస్యలు వస్తాయి. కాబట్టి పరిమితంగా, సరైన పద్ధతిలో తీసుకుంటేనే మంచిది.</p>
<p><iframe class="vidfyVideo" style="border: 0px;" src="https://telugu.abplive.com/web-stories/lifestyle/iron-deficiency-causes-and-prevention-tips-you-should-know-243721" width="631" height="381" scrolling="no"></iframe></p>
<p><strong>గమనిక :</strong> ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.</p>
5 days ago
2 
