<p>Case Registered Against YouTuber Anvesh | హైదరాబాద్: ప్రముఖ యూట్యూబర్ అన్వేష్ (నా అన్వేషణ) హిందూ దేవీ దేవతలను దూషించారనే ఆరోపణలపై హైదరాబాద్‌లోని పంజాగుట్ట పోలీస్ స్టేషన్‌లో కేసు నమోదైంది. సినీనటి, బిజెపి నాయకురాలు కరాటే కళ్యాణి పోలీసులకు ఫిర్యాదు చేశారు. ఆమె ఇచ్చిన ఫిర్యాదును స్వీకరించిన పోలీసులు యూట్యూబర్ అన్వేష్‌పై 352, 79, 299 BNS సెక్షన్లతో పాటు 67 IT Act కింద కేసులు నమోదు చేశారు. ఈ వివాదాస్పద వ్యాఖ్యలకు సంబంధించి త్వరలోనే అన్వేష్‌కి పోలీసులు నోటీసులు జారీ చేయనున్నిరు.</p>
<p><strong>హిందూ సంఘాల ఆగ్రహం, డిమాండ్లు</strong><br />అన్వేష్ చేసిన వ్యాఖ్యలపై తెలంగాణవ్యాప్తంగా హిందూ సంఘాలు తీవ్ర ఆగ్రహం వ్యక్తం చేస్తున్నాయి. ఇప్పటికే తెలుగు రాష్ట్రాల్లోని పలు ప్రాంతాల్లో అతనిపై వరుసగా ఫిర్యాదులు అందుతున్నాయి. ప్రస్తుతం విదేశాల్లో ఉన్న అన్వేష్‌ను వెంటనే భారతదేశానికి రప్పించాలని, అతడిని దేశద్రోహిగా ప్రకటించాలని హిందూ సంఘాలు ప్రభుత్వాన్ని డిమాండ్ చేస్తున్నాయి. మతపరమైన విద్వేషాలను రెచ్చగొట్టే విధంగా ప్రవర్తించిన అన్వేష్‌పై కఠిన చర్యలు తీసుకోవాలని వారు కోరుతున్నారు.</p>
<p><strong>యూట్యూబర్ అన్వేష్‌పై ఫిర్యాదులు </strong><br />ప్రముఖ ట్రావెల్ యూట్యూబర్ 'నా అన్వేషణ' (అన్వేష్) ఒక వీడియోలో హిందూ దేవతలపై చేసిన వివాదాస్పద వ్యాఖ్యలు తెలుగు రాష్ట్రాల్లో చర్చకు దారితీశాయి. ఈ క్రమంలో సినీనటి కరాటే కళ్యాణి పంజాగుట్ట పోలీసులకు ఫిర్యాదు చేయడంతో ఈ చట్టపరమైన ప్రక్రియ మొదలైంది. నిందితుడిపై 352, 79 (మహిళల గౌరవానికి భంగం), 299 (మతపరమైన మనోభావాలను దెబ్బతీయడం), BNS సెక్షన్లతో పాటు 67 IT Act కింద కేసులు నమోదయ్యాయి. అన్వేష్ గతంలో కూడా వివాదాస్పద వ్యాఖ్యలు చేశాడని ఆరోపణలున్నాయి. </p>
<p>ఒకవేళ నిందితుడు విదేశాల్లో ఉండి విచారణకు సహకరించకపోతే, దౌత్యపరమైన మార్గాల ద్వారా చర్యలు చేపట్టాలని హిందూ సంఘాలు ఒత్తిడి చేస్తున్నాయి. కేవలం పంజాగుట్టలోనే కాకుండా, వరంగల్, కరీంనగర్ మరియు హైదరాబాద్‌లోని మరికొన్ని స్టేషన్లలో కూడా ఇటువంటి ఫిర్యాదులే అందాయి. సోషల్ మీడియా ప్లాట్‌ఫారమ్‌లలో ఇలాంటి విద్వేషపూరిత కంటెంట్‌ను తొలగించాలని సైబర్ క్రైమ్ విభాగం యూట్యూబ్‌కు లేఖ రాసే ఆలోచనలో ఉన్నట్లు సమాచారం.</p>
3 months ago
7 
