<p><strong>America Dieselgate Scandal : </strong>మనుషులకు శ్మశానాలు ఉంటాయి. కార్లకు ఉంటాయా.. అంటే ఉంటాయని చెప్పక తప్పదు. ఈ శ్మశానాల్లో పాత మిలిటరీ బేస్‌లు, భారీ పారిశ్రామిక ప్రాంతాలలో మైళ్ల దూరం వరకు కేవలం కార్లే కనిపిస్తాయి. ఏదో షోరూమ్ పార్కింగ్ అనుకుంటే పొరపాటే. ప్రపంచ ప్రసిద్ధ ఆటోమొబైల్ దిగ్గజం వోక్స్‌వ్యాగన్ ప్రతిష్టను మసకబార్చిన డీజెల్‌గేట్ ఉద్గారాల కుంభకోణానికి సజీవ సాక్ష్యాలు ఈ కార్ల స్మశానాలు. 2015లో వెలుగుచూసిన ఈ స్కామ్ తర్వాత, వోక్స్‌వ్యాగన్, ఆడి కంపెనీలకు చెందిన లక్షలాది డీజిల్ కార్లు రోడ్లపైకి రాకుండా ఇలా ఎడారుల్లో మూలనపడ్డాయి.</p>
<p><strong>అసలు ఈ డీజెల్‌గేట్ స్కామ్ ఏమిటంటే..?</strong></p>
<p> వోక్స్‌వ్యాగన్ తన డీజిల్ కార్లలో ఉద్గారాల పరీక్షలను తారుమారు చేసే ఒక ప్రత్యేకమైన సాఫ్ట్‌వేర్‌ను అమర్చింది. ల్యాబ్‌లో పరీక్షలు జరుగుతున్నప్పుడు ఈ సాఫ్ట్‌వేర్ ఇంజన్ పనితీరును మార్చి, కాలుష్యం తక్కువగా వస్తున్నట్లు భ్రమింపజేసేది. కానీ, అదే కారు రోడ్డుపైకి వచ్చి సాధారణంగా నడుస్తున్నప్పుడు మాత్రం అనుమతించిన స్థాయి కంటే విపరీతమైన కాలుష్యాన్ని విడుదల చేసేది. ఈ మోసం బయటపడటంతో ప్రపంచవ్యాప్తంగా విచారణలు జరిగి, వోక్స్‌వ్యాగన్ సంస్థకు ఏకంగా 30 బిలియన్ డాలర్ల అంటే సుమారు రూ. 2.5 లక్షల కోట్లు పైగా జరిమానాలు, కోర్టు ఖర్చులు భరించాల్సి వచ్చింది. ఆటోమొబైల్ చరిత్రలోనే ఇది అత్యంత ఖరీదైన కార్పొరేట్ కుంభకోణంగా నిలిచింది.</p>
<p><strong>కాలుష్య కారం అని చెప్పి వెనక్కి తీసుకున్న వోక్స్ వ్యాగన్ </strong></p>
<p>ఈ సంక్షోభం తీవ్రమవ్వడంతో అమెరికా ప్రభుత్వం వోక్స్‌వ్యాగన్ సంస్థను ఒక కఠినమైన ఒప్పందానికి ఆదేశించింది. దాని ప్రకారం.. కస్టమర్ల నుంచి ఆయా డీజిల్ కార్లను కంపెనీయే తిరిగి కొనుగోలు చేయాల్సి వచ్చింది . దాంతో వేలాది మంది కస్టమర్లు పరిహారం తీసుకుని కార్లను కంపెనీకి ఇచ్చేశారు. అలా వోక్స్‌వ్యాగన్ చేతికి వచ్చిన లక్షలాది కార్లను ఉంచడానికి అమెరికాలోని పొడి వాతావరణం ఉండే ఎడారి ప్రాంతాలను ఎంచుకున్నారు, తద్వారా కార్లు త్వరగా తుప్పుపట్టకుండా ఉంటాయని భావించారు. అలా ఏళ్ల తరబడి ఆ కార్లన్నీ ఎడారి నిలువు కాలంలో అలానే ఉండిపోయాయి.</p>
<p><strong>అన్నీ కొత్త కార్లే</strong></p>
<p>ఈ కార్లన్నీ పనికిరానివి లేదా తుక్కుగా మారినవి కావు. ఇవి ఆధునికమైనవి, నడపడానికి వీలైన కండిషన్‌లో ఉన్నవే. కానీ కేవలం కంపెనీ చేసిన సర్టిఫికేషన్ మోసం వల్ల ఇవి అనాథల్లా పడి ఉన్నాయి. అయితే, కాలక్రమేణా కొన్ని కార్లను నిబంధనల మేరకు రిపేర్ చేసి మళ్లీ మార్కెట్లో విక్రయించగా, మరికొన్నింటిని స్పేర్ పార్ట్స్ కోసం, పరిశోధనల కోసం వాడుకున్నారు. అయినప్పటికీ ఇప్పటికీ పెద్ద సంఖ్యలో కార్లు ఆ ఎడారి లాట్లలో డీజెల్‌గేట్ చేదు జ్ఞాపకంగా మిగిలిపోయాయి.</p>
<p><strong>ఎలక్ట్రిక్ వాహనాలు పెరగడానికి ఓ కారణం </strong></p>
<p>ఈ డీజెల్‌గేట్ కుంభకోణం ఆటోమొబైల్ రంగాన్ని పూర్తిగా మార్చేసింది. డీజిల్ కార్లపై నమ్మకం కోల్పోయిన వోక్స్‌వ్యాగన్.. తన రూట్ మార్చి ఎలక్ట్రిక్ వాహనాల వైపు అడుగులు వేగంగా వేసింది. వేల కోట్లు పెట్టుబడి పెట్టి ఐడీ సిరీస్ వంటి ఈవీ కార్లను మార్కెట్లోకి తెచ్చింది. నేడు ప్రపంచవ్యాప్తంగా ఎలక్ట్రిక్ వాహనాల హవా నడుస్తోందంటే దానికి ఒక రకంగా ఈ డీజెల్‌గేట్ స్కామ్ ఒక ప్రధాన కారణమని చెప్పవచ్చు. కార్పొరేట్ సంస్థలు నమ్మకాన్ని కోల్పోతే ఎంతటి భారీ మూల్యం చెల్లించుకోవాలో చెప్పడానికి ఈ కార్ల స్మశానాలే ప్రత్యక్ష ఉదాహరణ.</p>
<p><iframe class="vidfyVideo" style="border: 0px;" src="https://telugu.abplive.com/web-stories/cinema/how-old-is-mrunal-thakur-have-you-ever-felt-too-old-249650" width="631" height="381" scrolling="no"></iframe></p>
1 hour ago
1 