<p>Hyderabad Chennai High Speed Bullet Train | యాచారం: హైదరాబాద్‌-చెన్నై, హైదరాబాద్‌-బెంగళూరు హైస్పీడ్‌ రైలు (Bullet Train) కారిడార్‌ల నిర్మాణ పనుల్లో కీలకమైన తొలి అడుగులు పడుతున్నాయి. ఈ ప్రతిష్టాత్మక ప్రాజెక్ట్‌ల ఎలైన్‌మెంట్‌కు సంబంధించి క్షేత్రస్థాయిలో కసరత్తు ఊపందుకుంది. రంగారెడ్డి జిల్లా నుంచి నల్గొండ, వికారాబాద్‌ జిల్లాల వైపు సర్వే టీమ్స్ విస్తృతంగా పర్యటిస్తూ క్షేత్రస్థాయిలో మార్కింగ్‌లు చేసే ప్రక్రియను ప్రారంభించాయి. దాంతో తెలుగు రాష్ట్రాల్లో బుల్లెట్ రైలు ప్రాజెక్టు పనులు ప్రారంభమవుతున్నాయని చెప్పవచ్చు.</p>
<p><strong>గత పది రోజులుగా సర్వే పనులు</strong><br />శంషాబాద్, మహేశ్వరం, కందుకూరు, యాచారం మండలాల మీదుగా నల్గొండ జిల్లా నాంపల్లి మండలం వైపు హైదరాబాద్‌- చెన్నై హైస్పీడ్ రైలు కారిడార్‌.. అదేవిధంగా శంషాబాద్, షాబాద్‌ మండలాల మీదుగా హైదరాబాద్‌- బెంగళూరు హైస్పీడ్ రైలు కారిడార్‌కు సంబంధించి గత పది రోజులుగా అధికారులు ముమ్మరంగా సర్వే నిర్వహిస్తున్నారు. ఈ సర్వేలో భాగంగా రైల్వే కారిడార్ ప్రయాణించే పొలాలు, ఖాళీ స్థలాలు, ఇతర ముఖ్యమైన ప్రాంతాల్లో ఎరుపు, తెలుపు రంగులతో ప్రత్యేక మార్కింగ్‌లు వేస్తున్నారు.</p>
<p><strong>భూసేకరణ గుర్తింపు కోసమే మార్కింగ్‌లు</strong><br />హైస్పీడ్ రైలు కారిడార్‌ పనుల్లో భాగంగా యాచారం మండలంలోని కురుమిద్ద, మేడిపల్లి, మంకీస్‌గూడెం, తక్కళ్లపల్లి, చింతపట్ల, నల్లవెల్లి, మందన, గౌరెల్లి గ్రామాల పరిధిలో ఇప్పటికే ఈ మార్కింగ్‌ల ప్రక్రియ పూర్తయినట్లు అధికారులు చెబుతున్నారు. ఇవి కారిడార్‌ ఎలైన్‌మెంట్, సర్వే పాయింట్లు, భవిష్యత్తులో అవసరమయ్యే భూసేకరణ పరిధిని గుర్తించేందుకు ఉపయోగించనున్నారు. హైస్పీడ్‌ రైలు కారిడార్‌లకు సంబంధించి తొలుత ఏరియల్‌ సర్వే నిర్వహించగా, ప్రస్తుతం దీని సాధ్యాసాధ్యాలపై అధ్యయనం జరుగుతోంది. అందులో భాగంగానే రూట్‌ను ఖరారు చేసే పనుల్ని అధికారులు వేగవంతం చేశారు. ఈ గ్రౌండ్ సర్వే పూర్తయితే కనుక తుది ఎలైన్‌మెంట్, బుల్లెట్ రైలు స్టేషన్ల స్థానాలతో పాటు భూసేకరణకు సంబంధించి తుది నిర్ణయం తీసుకుంటారు. </p>
4 months ago
9 
