<p><strong>Huzurabad BRS leaders revolt against Kaushik Reddy: </strong>హుజూరాబాద్ నియోజకవర్గ <a title="బీఆర్ఎస్ పార్టీ" href="https://telugu.abplive.com/topic/BRS-Party" data-type="interlinkingkeywords">బీఆర్ఎస్ పార్టీ</a>లో అంతర్గత విభేదాలు ఒక్కసారిగా భగ్గుమన్నాయి. ఎమ్మెల్యే పాడి కౌశిక్ రెడ్డి ఏకపక్ష నిర్ణయాలు, వ్యవహారశైలిపై నియోజకవర్గ స్థాయి ముఖ్య నేతలు తీవ్ర అసంతృప్తి వ్యక్తం చేస్తున్నారు. పార్టీ కోసం ఏళ్ల తరబడి పనిచేసిన సీనియర్లను విస్మరించి, కౌశిక్ రెడ్డి తన అనుచరులకే ప్రాధాన్యత ఇస్తున్నారనే ఆరోపణలు వెల్లువెత్తుతున్నాయి. ఈ కారణంగా పలువురు కీలక నేతలు కౌశిక్ రెడ్డికి వ్యతిరేకంగా ఏకమై, పార్టీ మనుగడపై ఆందోళన వ్యక్తం చేస్తూ రహస్య సమావేశాలు నిర్వహించడం రాజకీయ వర్గాల్లో చర్చనీయాంశమైంది. </p>
<p>ప్రధానంగా కమలాపూర్, హుజూరాబాద్ మండలాలకు చెందిన స్థానిక ప్రజా ప్రతినిధులు కౌశిక్ రెడ్డి నాయకత్వాన్ని వ్యతిరేకిస్తున్నారు. పార్టీ అధిష్టానం జోక్యం చేసుకుని పరిస్థితిని చక్కదిద్దకపోతే తాము ప్రత్యామ్నాయ దారులు చూసుకుంటామని వారు హెచ్చరిస్తున్నారు. కౌశిక్ రెడ్డి దూకుడు స్వభావం వల్ల క్షేత్రస్థాయిలో కేడర్ విచ్ఛిన్నమవుతోందని, పాత కొత్త నేతల మధ్య సమన్వయం లోపించిందని వీరు బాహాటంగానే విమర్శిస్తున్నారు. ఈ పరిణామాలు గులాబీ దళంలో కలకలం రేపుతున్నాయి. </p>
<p> ఈ అసంతృప్త నేతలు అధికార కాంగ్రెస్ పార్టీ వైపు మొగ్గు చూపుతున్నట్లు సమాచారం. ఇప్పటికే మాజీ మున్సిపల్ ఛైర్మన్ జిడె రాజేశ్వర్, మరికొందరు కౌన్సిలర్లు , మండల స్థాయి నాయకులు మంత్రి పొన్నం ప్రభాకర్, ఇతర సీనియర్ కాంగ్రెస్ నేతల సమక్షంలో హస్తం గూటికి చేరేందుకు రంగం సిద్ధం చేసుకున్నట్లు తెలుస్తోంది. హుజూరాబాద్‌లో బీఆర్ఎస్‌ను ఖాళీ చేయడమే లక్ష్యంగా కాంగ్రెస్ వ్యూహాత్మకంగా అడుగులు వేస్తోంది. దీనివల్ల నియోజకవర్గంలో బీఆర్ఎస్ పట్టు కోల్పోయే ప్రమాదం ఉందన్న ఆందోళన ఆ పార్టీలో వ్యక్తమవుతోంది. </p>
<p> కీలక నేతల అనుచరులు కూడా పార్టీ మారే యోచనలో ఉండటం బీఆర్ఎస్‌కు పెద్ద ఎదురుదెబ్బగా పరిణమించనుంది. ఉప ఎన్నికల సమయంలో కౌశిక్ రెడ్డికి మద్దతుగా నిలిచిన వారే ఇప్పుడు ఆయనపై తిరుగుబావుటా ఎగురవేస్తున్నారు. నియోజకవర్గంలో గ్రూపు రాజకీయాలు పెరిగిపోవడంతో సామాన్య కార్యకర్తలు అయోమయానికి గురవుతున్నారు. ఈ పరిస్థితిని అదుపులోకి తెచ్చేందుకు మాజీ మంత్రులు , పార్టీ వర్కింగ్ ప్రెసిడెంట్ కేటీఆర్ జోక్యం చేసుకోవాలని కోరుతున్నారు. </p>
<p><a title="బీజేపీ" href="https://telugu.abplive.com/topic/BJP" data-type="interlinkingkeywords">బీజేపీ</a>కి పట్టున్న నియోజకవర్గం కావడంతో, ఇప్పుడు బీఆర్ఎస్ నుంచి జరుగుతున్న వలసలు కాంగ్రెస్‌కు ఏ మేరకు లాభిస్తాయనేది ఆసక్తికరంగా మారింది. రాబోయే రెండు మూడు రోజుల్లో హుజూరాబాద్ నుంచి భారీగా నేతలు <a title="కాంగ్రెస్" href="https://telugu.abplive.com/topic/Congress" data-type="interlinkingkeywords">కాంగ్రెస్</a> పార్టీలో చేరతారని ప్రచారం జరుగుతోంది. ఒకవేళ ఇదే జరిగితే, కౌశిక్ రెడ్డి నియోజకవర్గంలో ఒంటరి అయ్యే అవకాశాలు కనిపిస్తున్నాయి. </p>
<p><iframe class="vidfyVideo" style="border: 0px;" src="https://telugu.abplive.com/web-stories/cinema/which-actor-took-the-highest-remuneration-in-dhurandhar-2-241565" width="631" height="381" scrolling="no"></iframe></p>
3 weeks ago
4 
