<p><strong>Cricket Australia Opens Door For Private Investment: </strong>బిగ్ బాష్ లీగ్ (బీబీఎల్) ప్రైవేటీకరణ కోసం క్రికెట్ ఆస్ట్రేలియా (సీఏ) అనుమతులు ఇచ్చిన తరుణంలో భారత ప్రీమియర్ లీగ్ (ఐపీఎల్) యజమానులు ఆస్ట్రేలియా జట్లను కొనుగోలు చేస్తారనే వార్తలు గుప్పుమన్నాయి. ప్రస్తుతం మెల్‌బోర్న్ రెనెగేడ్స్ ఫ్రాంచైజీ వంద శాతం ఈక్విటీ కొనుగోలుకు సిద్ధంగా ఉన్న ఏకైక జట్టుగా నిలిచింది. క్రికెట్ విక్టోరియా కాకుండా నేరుగా క్రికెట్ ఆస్ట్రేలియానే ఈ టెండర్ ప్రక్రియను పర్యవేక్షిస్తోంది. లాభాల్లో సాగుతున్న లీగ్ కావడంతో పెట్టుబడులకు అనువైన మార్కెట్ అయినప్పటికీ, అంతర్జాతీయంగా పలు లీగ్‌లలో జట్లను నడుపుతున్న ఐపీఎల్ యజమానులు ఇక్కడ అడుగుపెట్టేందుకు అంతగా ఉత్సాహం చూపించడం లేదు. మెల్‌బోర్న్ రెనెగేడ్స్ జట్టును సొంతం చేసుకున్నా, కొత్తగా ఫ్యాన్ బేస్, బ్రాండ్ గుర్తింపును మొదటి నుంచి నిర్మించుకోవాల్సి రావడం పెట్టుబడిదారులకు పెద్ద సవాలుగా మారింది.</p>
<p>Read Also: <a title="Dhoni CSK Stake: CSKలో 25 శాతం వాటా అడిగాడా..? ధోని షేర్ల వ్యవహారంపై మేనేజ్‌మెంట్ క్లారిటీ!!" href="https://telugu.abplive.com/sports/ipl/csk-dismisses-reports-on-ms-dhoni-seeking-ownership-stake-258775" target="_self">Dhoni CSK Stake: CSKలో 25 శాతం వాటా అడిగాడా..? ధోని షేర్ల వ్యవహారంపై మేనేజ్‌మెంట్ క్లారిటీ!!</a></p>
<p><strong>ఆపరేషనల్ కంట్రోల్ నిరాకరణ.. </strong><br />ఐపీఎల్ బాస్‌లు ఎప్పుడూ ఫ్రాంచైజీలపై పూర్తి నిర్వహణ నియంత్రణను కోరుకుంటారు. అయితే క్రికెట్ ఆస్ట్రేలియా మాత్రం మ్యాచ్ షెడ్యూలింగ్, వేతన పరిమితులు, మీడియా హక్కులు, ఆటగాళ్ల లభ్యత వంటి కీలక అంశాలను తమ చేతుల్లోనే ఉంచుకోవాలని భావిస్తోంది. ఇంగ్లాండ్‌లో 'ది హండ్రెడ్' టోర్నీ తరహాలో ప్రత్యేక విండో కేటాయించకుండా, ఆస్ట్రేలియా అంతర్జాతీయ సమ్మర్ మ్యాచ్‌లతో పాటే బీబీఎల్ నిర్వహిస్తారు. దీనివల్ల ఆస్ట్రేలియా ప్రధాన స్టార్ ఆటగాళ్లు లీగ్‌లో పూర్తిస్థాయిలో అందుబాటులో ఉంటారనే హామీ లేదు. స్టార్ పవర్ తగ్గితే వ్యాపార విస్తరణ కష్టమవుతుందని ఫ్రాంచైజీలు భావిస్తున్నాయి.</p>
<p>Read Also: <a title="Sachin, Rahane Lounges: వాంఖడేలో సచిన్, రహానే పేర్లతో ప్రత్యేక లాంజ్ లు.. అనుబంధ క్లబ్బులకు భారీ నిధితో ఎంసీఏ సంచలనం" href="https://telugu.abplive.com/sports/cricket/mumbai-cricket-association-announces-massive-corpus-for-stadium-lounges-258756" target="_self">Sachin, Rahane Lounges: వాంఖడేలో సచిన్, రహానే పేర్లతో ప్రత్యేక లాంజ్ లు.. అనుబంధ క్లబ్బులకు భారీ నిధితో ఎంసీఏ సంచలనం</a></p>
<p><strong>భారీ పన్నుల భారం.. సుదీర్ఘ ప్రయాణాల సమస్య</strong><br />సౌతాఫ్రికా, యూఏఈ, బంగ్లాదేశ్ వంటి ఇతర లీగ్‌లతో పోలిస్తే ఆస్ట్రేలియాలో టాక్స్ విధానం చాలా కఠినంగా ఉంటుంది. ఈ లీగ్‌లన్నీ దాదాపు ఒకే సమయంలో జరుగుతుండటంతో విదేశీ స్టార్ ప్లేయర్లు ఎక్కువ పన్నులు ఉండే ఆస్ట్రేలియాను కాదని ఇతర దేశాల వైపు మొగ్గు చూపే అవకాశాలు ఎక్కువగా ఉన్నాయి. మరోవైపు ఈస్ట్ కోస్ట్ నుంచి పెర్త్ వంటి నగరాలకు వెళ్లేందుకు ఐదారు గంటల విమాన ప్రయాణాలు చేయాల్సి రావడం ఆటగాళ్లకు శారీరకంగా పెను భారంగా మారుతుంది. యూఏఈ, ఇంగ్లాండ్ లీగ్‌లలో ఇలాంటి సుదీర్ఘ ప్రయాణాల సమస్యలు చాలా తక్కువగా ఉంటాయి.</p>
<p><strong>పాత బ్రాడ్‌కాస్ట్ డీల్.. నాలుగు ఏళ్ల నిరీక్షణ</strong><br />ఏడేళ్ల బ్రాడ్‌కాస్ట్ హక్కుల ఒప్పందంలో ఇంకా నాలుగేళ్ల కాలం మిగిలి ఉంది. కొత్తగా వచ్చే యజమానులు ప్రస్తుత టీవీ ఒప్పందం ఆధారంగానే తమ పెట్టుబడిపై రాబడిని లెక్కించుకోవాల్సి ఉంటుంది. ఇప్పటికే ఎక్కువ శాతం ఫ్రాంచైజీలు లాభాల్లో ఉండటంతో ప్రైవేటీకరణను తీవ్రంగా వ్యతిరేకించే వర్గాలు కూడా అక్కడి బోర్డులో ఉన్నాయి. ఈ కారణాలన్నీ ఐపీఎల్ బిగ్ షాట్స్‌ను ఆలోచనలో పడేశాయి.</p>
1 month ago
3 
