<p>Bandi Bhagirath Case Latest News | హైదరాబాద్: పోక్సో కేసులో బండి భగీరథ్ నేరాన్ని అంగీకరించారని, ఆ తరువాతే అతడ్ని అరెస్ట్ చేసినట్లు సైబరాబాద్ కమిషనర్ తెలిపారు. ఈ మేరకు ఓ ప్రకటన విడుదల చేశారు. బండి భగీరథ్ పై పోక్సో కేసు గత కొన్ని రోజులుగా తెలుగు రాష్ట్రాల్లో తీవ్ర దుమారం రేపుతోంది. నిందితుడు భగీరథ్ పోలీసులకు చిక్కిన తీరుకూడా అంతే స్దాయిలో సంచలనంగా మారింది.</p>
<p>లుక్ అవుట్ నోటీసులు జారీ చేసిన తరువాత బండి భగీరథ్ ను పట్టుకునేందుకు సిట్ బృందాలు తీవ్రంగా గాలింపు చేపట్టాయి. బండి భగీరథ్ నివాసంతోపాటు స్నేహితులు, బంధువుల ఇళ్లను జల్లెడ పట్టాయి. ఇప్పటికే మహిళా సంఘాలు, ప్రతిపక్ష పార్టీల నుండి వస్తున్న విమర్శలు, సోషల్ మీడియా వేదికగా వెల్లువెత్తుతున్న ఆరోపణలతో శనివారం భగీరథ్ ను పట్టుకునేందుకు సీరియస్ గా దృష్టిసారించారు తెలంగాణ పోలీసులు. తెల్లవారుజాము నుండి అనుమానం ఉన్న అన్ని ప్రాంతాలను జల్లెడ పట్టారు.</p>
<p><strong>ఊహించని ట్విస్ట్.. న్యాయవాదులతో కలిసి రోడ్డుపై భగీరథ్ ప్రత్యక్షం..</strong></p>
<p>శనివారం రాత్రి 8.15నిమిషాలకు ఉన్నట్లుండి ఓ వీడియో వాట్సస్ గ్రూపులలో, సోషల్ మీడియా వేదికలపై ప్రత్యక్షమైయ్యింది. ఎవరూ గుర్తుపట్టకుండా మాస్క్ తో బండి భగీరథ్ రోడ్డుపై నిలబడిన వెంటనే , ఓ కారు వచ్చి భగీరథ్ వద్ద ఆగడం, ఆ వెంటనే న్యాయవాదులు భగీరథ్ చేయిపట్టుకుని కారులో ఎక్కించడం ఆ వీడియోలో ఉంది. పోక్సో కేసులో ఆరోపణలు ఎదుర్కొంటున్న భగీరథ్ పేట్ బషీరాబాద్ వద్ద స్వయంగా వచ్చి సిట్ అధికారులకు లొంగిపోయాడంటూ మొదట ప్రచారం జరిగింది. ఈ ప్రచారానికి బలం చేకూరేలా కేంద్ర సహాయమంత్రి బండి సంజయ్ సైతం ఓ ప్రకటన విడుదల చేశారు. చట్టంపై నాకు గౌరవం ఉంది. నా కుమారుడు భగీరథ్ పై వచ్చిన ఆరోపణల నేపధ్యంలో అడ్వకేట్ ల సమక్షంలో పోలీసు విచారణకు అప్పగించానంటూ ప్రకటన విడుదల చేశారు.</p>
<p>Also Read: <a href="https://telugu.abplive.com/telangana/hyderabad/14-days-remand-for-bandi-bhageerath-accused-in-pocso-case-247549">Bandi Bhageerath Remand: పోక్సో కేసులో బండి భగీరథ్‌కు 14 రోజుల రిమాండ్ విధించిన మేజిస్ట్రేట్</a></p>
<p><strong>లాయర్ల సమక్షంలో భగీరథ్ లొంగిపోయాడు - బండి సంజయ్ ప్రకటన</strong></p>
<p>మా అబ్బాయి ఏ తప్పు చేయలేదని పదే పదే చెబుతున్నాడు. ఫిర్యాదు చేసిన వెంటనే భగీరథ్ ను పోలీసులకు అప్పగించాలని అనుకున్నాను. కానీ న్యాయవాదులు ఇచ్చిన సలహాతో ఆధారాలు సేకరించిన తరువాత లొంగిపోతే , ఆ ఆధారాలు చూసి కేసు కొట్టేస్తారని చెప్పడంతో భగీరథ్ ను పోలీసులకు అప్పగించడంలో జాప్యం జరిగింది. కానీ ఇంకా ఆలస్యం చేయడం సరికాదని, స్వయంగా నేనే న్యాయవాదుల సమక్షంలో విచారణుకు సహకరించాలంటూ పోలీసులకు అప్పగించా అన్నారు. తన కొడుకును ఎవరూ అరెస్ట్ చేయలేదని, తానే వచ్చి పోలీసుల ఎదుట లొంగిపోయాడని బండి సంజయ్ ప్రకటించారు. </p>
<p><iframe title="YouTube video player" src="https://www.youtube.com/embed/CvioRA-qQrM?si=-YmtPcjA_inzVpFq" width="560" height="315" frameborder="0" allowfullscreen="allowfullscreen"></iframe></p>
<p><strong>మేమే అరెస్ట్ చేశామంటూ సైబరాబాద్ కమిషనర్ ప్రకటన</strong></p>
<p>బండి సంజయ్ ప్రకటనకు పూర్తి భిన్నంగా సైబరాబాద్ కమిషనర్ ప్రకట విడుదల చేశారు. పోలీసులే బండి భగీరథ్ ను అరెస్ట్ చేశారంటూ క్లారిటీ ఇచ్చారు. భగీరథ్ అరెస్ట్ పై కమిషనర్ ఏమన్నారంటే.. నిందితుడిని పట్టుకోవడానికి ముమ్మర ప్రయత్నాలు జరిగాయి. ఇందుకోసం కరీంనగర్, ఢిల్లీ, ఇతర ప్రాంతాలకు ప్రత్యేక బృందాలను పంపించారు. నిందితుడు తరచూ వెళ్లే ప్రదేశాలతో పాటు, అతనికి పరిచయం ఉన్నవారి ఇళ్లలోనూ ఈ బృందాలు గాలింపు చర్యలు చేపట్టాయి. దీంతో పాటు ఇన్వెస్టిగేషన్ ఆఫీసర్ నిందితుడిపై 'లుక్ అవుట్ నోటీసులు కూడా జారీ చేశారు.</p>
<p><strong>నేరానికి పాల్పడినట్లు అంగీకరించిన భగీరథ్</strong></p>
<p>నిందితుడు పోలీస్ అకాడమీ సమీపంలో తిరుగుతున్నాడనే సమాచారంతో, శనివారం పోలీసు బృందాలు తనిఖీలు నిర్వహించారు. పక్కా సమాచారం ఆధారంగా, సైబరాబాద్ స్పెషల్ ఆపరేషన్ టీమ్ (SOT) నిందితుడైన భగీరథ్‌ను నార్సింగి పోలీస్ స్టేషన్ పరిధిలోని మంచిరేవుల టెక్ పార్క్ సమీపంలో అదుపులోకి తీసుకున్నారు. మే 16వ తేదీ రాత్రి 8:15 గంటలకు అతడిని కస్టడీలోకి తీసుకుని, పేట్ బషీరాబాద్ పోలీస్ స్టేషన్‌కు తరలించారు. నిందితుడిని ఇన్వెస్టిగేషన్ ఆఫీసర్ (IO)ముందు హాజరుపరచగా, సాక్షుల సమక్షంలో పోలీస్ స్టేషన్‌లో అతడిని విచారించారు. తాను ఆ నేరానికి పాల్పడినట్లు నిందితుడు అంగీకరించాడు. దాంతో ఇన్వెస్టిగేషన్ ఆఫీసర్ అతడిని అరెస్ట్ చేశారు. వైద్య పరీక్షలు పూర్తయిన తర్వాత, నిందితుడు భగీరథ్‌ను మెజిస్ట్రేట్ ముందు హాజరుపరచగా, కోర్టు అతనికి 14 రోజుల జ్యుడీషియల్ రిమాండ్ విధించింది.</p>
<p><br /><img src="https://feeds.abplive.com/onecms/images/uploaded-images/2026/05/17/93f33fddc9ee82a0efe11fe5b98698bc1778962774112479_original.PNG" /></p>
<p><strong>సరిగ్గా ఒకే టైమ్ లో లొంగుబాటు..! అరెస్ట్ ఎలా సాధ్యం..?</strong></p>
<p>వరుస ప్రకటనలతో జనంలో అయోమయం.. శనివారం రాత్రి 8.15నిమిషాలకు నిందితుడు భగీరథ్ ను తామే స్వయంగా పేట్ భషీర్ బాద్ పోలీస్టేషన్ కు తీసుకెళ్లి, సిట్ అధికారులకు అప్పగించామని భగీరథ్ తరుపు న్యాయవాదులు, బండి సంజయ్ సైతం ప్రకటిస్తున్నారు. సరిగ్గా అదే సమయానికి తామే భగీరథ్ ను మంచిరేవుల టెక్ పార్క్ సమీపంలో అదుపులోకి తీసుకున్నామంటూ స్వయంగా సైబరాబాద్ కమీషనరేట్ నుండి అధికారిక ప్రకటన వెలువడింది. ఇలా ఒకే సమయంలో విభిన్న ప్రకటనలు గందరగోళానికి గురిచేస్తున్నాయి.</p>
<p>Also Read: <a href="https://telugu.abplive.com/telangana/hyderabad/bandi-bhagirath-surrenders-before-policer-bandi-sanjay-says-law-is-equal-for-all-247543">Bandi Sanjay About Bandi Bhagirath: బండి భగీరథ్‌ను ముందే పోలీసులకు అప్పగిద్దామనుకున్నా.. కానీ: బండి సంజయ్</a></p>
<p>అరెస్ట్ అయ్యాడని చెప్పుకుంటే పరువుపోతుందని <a title="బండి సంజయ్" href="https://telugu.abplive.com/topic/Bandi-Sanjay" data-type="interlinkingkeywords">బండి సంజయ్</a> టీమ్ కేసును తప్పుదోవ పట్టిస్తున్నారా, లేక పోలీసులు ప్రకటనతో మభ్య పెడుతున్నారా అనే విమర్శలు వెల్లువెత్తున్నాయి. ఫిర్యాదు చేసి రోజులు గుడుస్తున్నా భగీరథ్ ను అరెస్ట్ చేయడంలో తెలంగాణ పోలీసులు విఫలమైయ్యారనే బ్యాడ్ నేమ్ నుండి బయట పడేందుకే ఇలా అరెస్ట్ అంటున్నారా అనేది అర్దంకాక అయోమయం నెలకొంది. </p>
<p><br /><img src="https://feeds.abplive.com/onecms/images/uploaded-images/2026/05/17/e0ecf00b5b7ae52dd98a44f6c8bf501a1778962813859479_original.PNG" /></p>
2 weeks ago
3 
