<p>AP TET Results out | అమరావతి: ఆంధ్ర ప్రదేశ్ ఉపాధ్యాయ అర్హత పరీక్ష (AP TET) తుది ఫలితాలను, ఫైనల్ ఆన్సర్ కీలను ఏపీ పాఠశాల విద్యాశాఖ విడుదల చేసింది. ఇటీవల కంప్యూటర్ ఆధారిత పద్ధతిలో నిర్వహించిన ఈ పరీక్షలకు రాష్ట్ర వ్యాప్తంగా లక్షలాది మంది అభ్యర్థులు హాజరయ్యారు. టెట్ ప్రాథమిక కీ పై అభ్యర్థుల నుంచి స్వీకరించిన అభ్యంతరాలను నిపుణుల కమిటీ సమగ్రంగా పరిశీలించిన అనంతరం టెట్ ఫైనల్ స్కోర్ కార్డులను వెబ్‌సైట్‌లో అందుబాటులో ఉంచారు. రాబోయే ఉపాధ్యాయ భర్తీ (DSC)లో టెట్ మార్కులకు 20 శాతం వెయిటేజీ ఉండటంతో ఈ ఫలితాలు అభ్యర్థులకు ఎంతో కీలకంగా మారాయి.</p>
<p>ఏపీ టెట్ అభ్యర్థులు తమ ఫలితాలను చూసుకోవడానికి ముందుగా అధికారిక వెబ్‌సైట్ ( <a title="https://tet2dsc.apcfss.in/" href="https://tet2dsc.apcfss.in/" target="_self" rel="nofollow">https://tet2dsc.apcfss.in/</a> ) ను సందర్శించాలి. హోమ్‌పేజీలో కనిపించే క్యాండిడేట్ లాగిన్ (Candidate Login) ఆప్షన్‌ను ఎంచుకుని, మీ హాల్ టికెట్ నంబర్ లేదా యూజర్ నేమ్‌తో పాటు పాస్‌వర్డ్ (లేదా పుట్టిన తేదీ), క్యాప్చా కోడ్‌ను ఎంటర్ చేసి లాగిన్ అవ్వాలి. ఒకవేళ లాగిన్ వివరాలు మర్చిపోతే, పేజీలోని రికవరీ ఆప్షన్ ద్వారా మీ నమోదు చేసుకున్న మొబైల్ నంబర్ లేదా ఈమెయిల్ ద్వారా వాటిని తిరిగి పొందవచ్చు.</p>
<p> లాగిన్ అయిన తర్వాత డాష్‌బోర్డ్‌లో డౌన్‌లోడ్ మార్క్స్ మెమో లేదా స్కోర్ కార్డు లింక్ కనిపిస్తుంది. దానిపై క్లిక్ చేసి పేపర్-1, పేపర్-2 వివరాలతో కూడిన స్కోర్ కార్డును పీడీఎఫ్ రూపంలో డౌన్‌లోడ్ చేసుకోవాలి. కేటగిరీల వారీగా నిర్ణయించిన కటాఫ్ మార్కులను సాధించిన అభ్యర్థులు అర్హత పొందినట్లు నిర్ధారిస్తారు. ఈ మార్క్స్ మెమో హార్డ్ కాపీని ప్రింట్ తీసుకుని, రాబోయే డీఎస్సీ ఉపాధ్యాయ నియామక ప్రక్రియ పూర్తయ్యే వరకు భద్రపరుచుకోవాలనీ అభ్యర్థులకు సూచించారు.</p>
1 month ago
3 
