<p><strong>Angkrish Raghuvanshi Shines as Kolkata Knight Riders Post Massive Total:</strong> ఐపీఎల్ 2026 సీజన్‌లో కోల్‌కతా నైట్ రైడర్స్ (KKR) యువ సంచలనం అంగ్ క్రిష్ రఘువంశీ తన అద్భుతమైన ఫామ్‌ను కొనసాగిస్తున్నాడు. శనివారం ఈడెన్ గార్డెన్స్ వేదికగా గుజరాత్ టైటాన్స్ (GT) తో జరిగిన మ్యాచ్‌లో ఈ 21 ఏళ్ల బ్యాటర్ క్లాస్ ఇన్నింగ్స్‌తో చెలరేగిపోయాడు. ఒత్తిడిలోనూ ఎంతో ప్రశాంతంగా ఆడుతూ కేకేఆర్ జట్టు నిర్ణీత 20 ఓవర్లలో 2 వికెట్ల నష్టానికి 247 పరుగుల భారీ స్కోరు సాధించడంలో ముఖ్య భూమిక పోషించాడు. ఈ మ్యాచ్‌లో రాఘువంశీ 82 పరుగులతో నాటౌట్‌గా నిలిచాడు. ఈ సీజన్‌లో ఆయనకు ఇది ఐదో హాఫ్ సెంచరీ కావడం విశేషం. ఈ అద్భుత ప్రదర్శనతో కేకేఆర్ చరిత్రలోనే అత్యుత్తమ బ్యాటింగ్ ప్రదర్శన చేసిన దిగ్గజాల సరసన ఆయన స్థానం సంపాదించుకున్నాడు.</p>
<p>Read Also: <a title="Anshul Kamboj Expensive Spell: CSK బౌలర్ అన్షుల్ కాంబోజ్ చెత్త రికార్డు: LSG పై భారీగా పరుగులు సమర్పించుకున్న పేసర్" href="https://telugu.abplive.com/sports/ipl/anshul-kamboj-concedes-63-runs-in-expensive-spell-against-lucknow-super-giants-247456" target="_self">Anshul Kamboj Expensive Spell: CSK బౌలర్ అన్షుల్ కాంబోజ్ చెత్త రికార్డు: LSG పై భారీగా పరుగులు సమర్పించుకున్న పేసర్</a></p>
<p><strong>గంభీర్, ఉతప్పల రికార్డుల సమం.. </strong></p>
<p>ఈ సీజన్‌లో ఐదోసారి యాభై కంటే ఎక్కువ పరుగులు చేసిన రఘువంశీ, కేకేఆర్ తరపున ఒకే సీజన్‌లో అత్యధిక హాఫ్ సెంచరీలు చేసిన ఆటగాళ్ల లిస్టులో చేరాడు. కోల్‌కతా తరపున ఒకే సీజన్‌లో గౌతమ్ గంభీర్ 2012లో అత్యధికంగా 6 హాఫ్ సెంచరీలు చేశాడు. ఆ తర్వాత రాబిన్ ఉతప్ప (2014, 2017), గౌతమ్ గంభీర్ (2016) చెరో 5 సార్లు ఈ ఫీట్ సాధించారు. ఇప్పుడు రాఘువంశీ కూడా 5 హాఫ్ సెంచరీలతో వారి రికార్డులను సమం చేశాడు. కేవలం కేకేఆర్ లోనే కాకుండా ఐపీఎల్ లీగ్ చరిత్రలోనే 21 ఏళ్ల వయస్సులో ఈ ఘనత సాధించిన ఎలైట్ క్లబ్‌లోకి ఆయన ప్రవేశించాడు. ఈ వయస్సులో రిషభ్ పంత్ (2018లో 6), యశస్వి జైస్వాల్ (2023లో 6) మాత్రమే ఇతనికంటే ముందున్నారు. 2022లో దేవదత్ పడిక్కల్ చేసిన 5 హాఫ్ సెంచరీల రికార్డును రాఘువంశీ సమం చేశాడు.</p>
<p><strong>ఫిన్ అలెన్ ఊచకోత.. గ్రీన్ తో కలిసి భారీ భాగస్వామ్యం..</strong></p>
<p>ఈ మ్యాచ్‌లో టాస్ గెలిచిన గుజరాత్ టైటాన్స్ కెప్టెన్ శుభ్‌మన్ గిల్ మొదట ఫీల్డింగ్ ఎంచుకున్నాడు. పిచ్ కాస్త స్టిక్కీగా ఉన్నప్పటికీ కేకేఆర్ ఓపెనర్ ఫిన్ అలెన్ గుజరాత్ బౌలింగ్‌ను పూర్తిగా చిత‌క్కొట్టాడు. కేవలం 35 బంతుల్లోనే 10 భారీ సిక్సర్లతో 93 పరుగులు చేసి ప్రత్యర్థి జట్టుకు చుక్కలు చూపించాడు. అయితే ఆయన అవుట్ అయిన తర్వాత కూడా రన్ రేట్ తగ్గకుండా రఘువంశీ, కామరూన్ గ్రీన్ బాధ్యత తీసుకున్నారు. వీరిద్దరూ కలిసి మూడో వికెట్‌కు కేవలం 53 బంతుల్లోనే 108 పరుగుల అజేయ భాగస్వామ్యాన్ని నెలకొల్పారు. గుజరాత్ ఫీల్డర్లు ఈ మ్యాచ్‌లో ఘోరంగా విఫలమయ్యారు, మొత్తంగా నాలుగు క్యాచ్‌లు వదిలేశారు. రఘువంశీ 52 పరుగుల వద్ద ఉన్నప్పుడు వాషింగ్టన్ సుందర్ ఇచ్చిన క్యాచ్ అవకాశాన్ని చేజార్చడం గుజరాత్ జట్టుకు భారీ నష్టాన్ని మిగిల్చింది.</p>
<p>Read Also: <strong><a title="IPL 2026 MI VS PBKS Result Update: పంజాబ్‌ను దెబ్బ తీసిన MI, అర్షదీప్‌ వల్గర్ కామెంట్స్‌కు బ్యాట్‌తో తిల‌క్ ఆన్సర్, పీబీకేఎస్‌కు వ‌రుస‌గా ఐదో ఓట‌మి" href="https://telugu.abplive.com/sports/ipl/ipl-2026-mi-vs-pbks-mumbai-indians-beats-punjab-kings-tilak-varma-shardul-thakur-247344" target="_self">IPL 2026 MI VS PBKS Result Update: పంజాబ్‌ను దెబ్బ తీసిన MI, అర్షదీప్‌ వల్గర్ కామెంట్స్‌కు బ్యాట్‌తో తిల‌క్ ఆన్సర్, పీబీకేఎస్‌కు వ‌రుస‌గా ఐదో ఓట‌మి</a></strong></p>
<p><strong>గుజరాత్‌పై మూడో అత్యధిక స్కోరు..</strong></p>
<p>లైఫ్ లభించిన తర్వాత రాఘువంశీ మరింత ప్రమాదకరంగా మారాడు. డెత్ ఓవర్లలో బౌండరీల వర్షం కురిపిస్తూ స్కోరు బోర్డును పరిగెత్తించాడు. ఆయన చేసిన 82 పరుగుల సాయంతో కేకేఆర్ చేసిన 247/2 స్కోరు, ఆ ఫ్రాంచైజీ చరిత్రలోనే మూడో అత్యధిక టోటల్ గా నమోదైంది. గతంలో కేకేఆర్ ఢిల్లీపై 272, పంజాబ్ పై 261 పరుగులు చేసింది. అలాగే ఐపీఎల్ చరిత్రలో గుజరాత్ టైటాన్స్ జట్టుపై నమోదైన అత్యధిక స్కోరు కూడా ఇదే కావడం విశేషం. <a title="అంతకుముందు 2025లో పంజాబ్ కింగ్స్ చేసిన 243 పరుగుల రికార్డును కేకేఆర్ బ్రేక్ చేసింది. ఈ సీజన్‌లో డిఫెండింగ్ ఛాంపియన్స్ అయిన కోల్‌కతా జట్టు ప్రదర్శనలో నిలకడ లేకపోయినప్పటికీ, రఘువంశీ లాంటి యువ ఆటగాడి ఎదుగుదల ఆ జట్టుకు అతిపెద్ద పాజిటివ్ అంశంగా మారింది." href="https://telugu.abplive.com/sports/ipl/chennai-super-kings-sign-dian-forrester-as-replacement-for-injured-jamie-overton-247341" target="_self">అంతకుముందు 2025లో పంజాబ్ కింగ్స్ చేసిన 243 పరుగుల రికార్డును కేకేఆర్ బ్రేక్ చేసింది. ఈ సీజన్‌లో డిఫెండింగ్ ఛాంపియన్స్ అయిన కోల్‌కతా జట్టు ప్రదర్శనలో నిలకడ లేకపోయినప్పటికీ, రఘువంశీ లాంటి యువ ఆటగాడి ఎదుగుదల ఆ జట్టుకు అతిపెద్ద పాజిటివ్ అంశంగా మారింది.</a></p>
2 weeks ago
3 
