<p><strong>Andhra Pradesh Latest News:</strong> ఆంధ్రప్రదేశ్‌ హైకోర్టు ఆదేశాలను అనుసరించి రాష్ట్ర వైద్య, ఆరోగ్య శాఖ ఉన్నతస్థాయి కమిటీ జూనియర్ డాక్టర్స్ అసోసియేషన్ ప్రతినిధులతో గురువారం తొలివిడత చర్చలు జరిపింది. జూడా పేర్కొన్న ఆరు డిమాండ్లలో ఐదింటి పరిష్కారం పట్ల కమిటీ ఆందోళన అక్కర్లేదని పేర్కొంది మిగిలిన స్టైపెండ్ పెంపు డిమాండ్‌పై జూడా ప్రతినిధులతో మరోమారు చర్చిస్తామని కమిటీ తెలిపింది.</p>
<p>మంగళగిరిలోని వైద్య, ఆరోగ్య శాఖ ప్రధాన కార్యాలయంలో ఈ సమావేశం కమిటీ ఛైర్మన్, రాష్ట్ర వైద్య, ఆరోగ్య శాఖ కార్యదర్శి జి. వీరపాండియన్ అధ్యక్షతన సుమారు 2 గంటలపాటు జరిగింది. డైరెక్టర్ ఆఫ్ మెడికల్ ఎడ్యుకేషన్ డాక్టర్ ఎ. విష్ణువర్ధన్, డాక్టర్ ఎన్టీఆర్ ఆరోగ్య విజ్ఞాన విశ్వవిద్యాలయం రిజిస్ట్రార్ సుధీర్ పాల్గొన్నారు. జూనియర్ డాక్టర్స్ అసోసియేషన్ తరఫున అధ్యక్షుడు ఈశ్వర్, భార్గవ్, ఇతర ప్రతినిధులు హాజరయ్యారు.</p>
<h2>జూడా డిమాండ్లు – ప్రభుత్వం స్పందన.</h2>
<h3>ప్రొఫెసర్ల ఉద్యోగ విరమణ వయసు పెంపు:</h3>
<p>ప్రొఫెసర్ల ఉద్యోగ విరమణ వయసు పెంపుపై ప్రభుత్వం ఇప్పటివరకు ఎలాంటి విధానపరమైన నిర్ణయం తీసుకోలేదు. ఈ అంశంపై అవసరమైనప్పుడు జూడా ప్రతినిధులతో చర్చిస్తామని కార్యదర్శి వీరపాండియన్ తెలిపారు.</p>
<h3>నాన్ క్లినికల్ వైద్యుల పోస్టుల భర్తీ:</h3>
<p>నాన్ క్లినికల్ వైద్యుల పోస్టుల భర్తీలో నేషనల్ మెడికల్ కమిషన్ (ఎన్ఎంసీ) మార్గదర్శకాల ప్రకారమే ప్రభుత్వం వ్యవహరిస్తోందని కార్యదర్శి స్పష్టం చేశారు. మొత్తం పోస్టుల్లో 30 శాతం వరకు ఎంఎస్సీ, పిహెచ్డీ, ఇతర అర్హతలు కలిగిన వారితో భర్తీ చేసేందుకు ఎన్ఎంసీ మార్గదర్శకాలు అనుమతిస్తున్నాయని తెలిపారు. అయితే ఇప్పటివరకు 11.05 శాతం పోస్టులను మాత్రమే ఈ విధానంలో భర్తీ చేసినట్లు వెల్లడించారు.</p>
<h3>జూనియర్ వైద్యులకు నిర్ణీత పని వేళలు, కనీస సౌకర్యాలు </h3>
<p>జూనియర్ వైద్యులకు నిర్ణీత పని వేళలు, అవసరమైన కనీస సౌకర్యాల కల్పనకు సంబంధించి ఇప్పటికే డైరెక్టర్ ఆఫ్ మెడికల్ ఎడ్యుకేషన్ (డీఎంఈ) ద్వారా అన్ని ఆస్పత్రుల సూపరింటెండెంట్లకు ఆదేశాలు జారీ చేసినట్లు కార్యదర్శి తెలిపారు. ఆదేశాల అమలులో నిర్లక్ష్యం వహించే సూపరింటెండెంట్లపై చర్యలు తీసుకోవడానికి ప్రభుత్వం సిద్ధంగా ఉందన్నారు.</p>
<h3>సీనియర్ రెసిడెంట్ల స్టైపెండ్ </h3>
<p>సీనియర్ రెసిడెంట్ల స్టైపెండ్ అంశాన్ని ప్రభుత్వం వేరుగా పరిశీలిస్తుందని తెలిపారు. <br />సీనియర్ రెసిడెంట్లు జూడా పరిధిలోకి రారని కార్యదర్శి వీరపాండియన్ స్పష్టం చేశారు.</p>
<h3>ఇంటర్న్‌లు, పీజీ, సూపర్ స్పెషాలిటీ వైద్యుల స్టైపెండ్ </h3>
<p>ప్రస్తుతం ఇంటర్న్‌లకు 10 శాతం, పీజీ, సూపర్ స్పెషాలిటీ వైద్యులకు 3 శాతం చొప్పున స్టైపెండ్ పెంచుతామని కార్యదర్శి తెలిపారు. వచ్చే ఏడాది నుంచి ప్రతి ఏడాది మూడు శాతం చొప్పున పెంచుతామని పేర్కొన్నారు. అయితే స్టైపెండ్‌ను 13 శాతం చొప్పున పెంచాలని జూడా ప్రతినిధులు కోరారు. ఈ అంశం పై మరో విడత చర్చ నిర్వహిస్తామని కార్యదర్శి వెల్లడించారు.</p>
2 months ago
3 
