<p><strong>Amarnath Yatra 2026 Travel Guide And Documents :</strong> ప్రతి సంవత్సరం లక్షలాది మంది భక్తులు శివుడి పవిత్ర పుణ్యక్షేత్రమైన అమర్‌నాథ్ గుహను దర్శించుకోవడానికి వెళ్తుంటారు. దీనినే అమర్నాథ్ యాత్ర అంటారు. ఈ ఏడాది అమర్‌నాథ్ యాత్ర 2026 జూలై 3న ప్రారంభమవుతుంది. సుమారు 3,888 మీటర్ల ఎత్తులో ఉన్న ఈ గుహలో సహజంగా ఏర్పడిన మంచు శివలింగాన్ని దర్శించుకోవడానికి.. భారతదేశం, విదేశాల నుండి పెద్ద సంఖ్యలో యాత్రికులు వెళ్తారు. అయితే ఇక్కడికి వెళ్లేవారు కచ్చితంగా కొన్ని డాక్యుమెంట్స్ తీసుకెళ్లాల్సి ఉంది. అవేంటో.. అమర్నాథ్కు సంబంధించిన పూర్తి డిటైల్స్ ఇప్పుడు తెలుసుకుందాం. </p>
<h3>కచ్చితంగా ఉండాల్సిన డాక్యుమెంట్స్.. </h3>
<p>మీరు 2026 అమర్‌నాథ్ యాత్రకు వెళ్లాలనుకుంటే బయలుదేరే ముందు రిజిస్ట్రేషన్, ఆరోగ్య ధృవపత్రాలు, ప్రయాణ అనుమతులు, RFID కార్డులు కచ్చితంగా తీసుకెళ్లాల్సి ఉంటుంది. ప్రతి యాత్రికుడు రిజిస్ట్రేషన్ తప్పనిసరిగా ఉండేలా చూసుకోవాలి. చెల్లుబాటు అయ్యే ప్రయాణ అనుమతి, RFID కార్డు లేకుండా ఏ యాత్రికుడిని యాత్రా మార్గంలోకి అనుమతించరు. </p>
<p><strong>Also Read : <a href="https://telugu.abplive.com/lifestyle/amarnath-yatra-2025-starting-date-registration-process-offline-and-online-full-details-here-that-certificate-is-must-204554" target="_blank" rel="noopener">అమర్నాథ్ యాత్ర ప్రారంభ తేదీ, రిజిస్ట్రేషన్ ప్రాసెస్ ఇదే.. ఆ సర్టిఫికెట్ లేకుంటే యాత్రకు అనుమతి ఉండదట, డిటైల్స్ ఇవే</a></strong></p>
<h3>2026 అమర్‌నాథ్ యాత్ర</h3>
<p>శ్రీ అమర్‌నాథ్‌జీ పుణ్యక్షేత్ర బోర్డు (SASB) ప్రకారం.. అమర్‌నాథ్ యాత్ర 2026 జూలై 3న ప్రారంభమై.. 2026 ఆగస్టు 28న ముగుస్తుంది. ఈ సంవత్సరం యాత్ర మొత్తం 57 రోజుల పాటు కొనసాగుతుంది. గత సంవత్సరం కంటే ఎక్కువ. </p>
<h3>అమర్‌నాథ్ యాత్రకు వారికి అనుమతి లేదు</h3>
<p>యాత్ర కోసం కొన్ని నియమాలు కచ్చితంగా ఫాలో అవ్వాలి. యాత్రికుల వయస్సు 13 నుంచి 70 సంవత్సరాల మధ్య ఉండాలి. ఆరు వారాల కంటే ఎక్కువ గర్భవతిగా ఉన్న మహిళలను యాత్రకు అనుమతించరు. అమర్‌నాథ్ యాత్రకు వెళ్లే ప్రతి యాత్రికుడికి ఆరోగ్య ధృవీకరణ పత్రం అవసరం. ఈ ధృవీకరణ పత్రం ఏప్రిల్ 8, 2026న లేదా ఆ తర్వాత అధీకృత వైద్యుడు లేదా గుర్తింపు పొందిన వైద్య సంస్థ నుంచి జారీ చేసినది ఉండాలి. దానిపై యాత్రికుడి ఫోటో తప్పనిసరిగా ఉండాలి. ఆరోగ్య ధృవీకరణ పత్రం ధృవీకరించిన తర్వాత మాత్రమే ప్రయాణ అనుమతి ఇస్తారు. </p>
<p><strong>Also Read : <a href="https://telugu.abplive.com/lifestyle/irctc-south-india-tour-package-2026-tirupati-rameshwaram-mallikarjuna-jyotirlinga-irctc-package-cost-and-full-details-252056" target="_blank" rel="noopener">IRCTC టూర్ ప్యాకేజీ 2026.. తిరుపతి, రామేశ్వరం, కన్యాకుమారి, శ్రీశైలం యాత్ర.. పూర్తి వివరాలు ఇవే</a></strong></p>
<h3>ప్రయాణ అనుమతి, RFID కార్డ్ అంటే ఏమిటి?</h3>
<p>యాత్రికులకు యాత్ర అనుమతి పత్రం యాత్రకు నమోదు చేసుకున్నప్పుడే జారీ చేస్తారు. ఈ అనుమతి పత్రంలో యాత్ర తేదీ, ఎంచుకున్న మార్గం, ప్రవేశ ద్వారం, రిపోర్టింగ్ సమయంతో సహా పూర్తి సమాచారం ఉంటుంది. ప్రతి యాత్రికుడికి ఒక RFID కార్డు కూడా ఇస్తారు. యాత్ర సమయంలో ఈ కార్డును అన్ని వేళలా మెడలో ధరించి ఉండాలి. ఈ కార్డు ద్వారా నిర్వాహకులు యాత్రికుల ఆచూకీని కనుగొనగలరు. అత్యవసర పరిస్థితుల్లో తక్షణ సహాయం అందించగలరు. బయోమెట్రిక్ ధృవీకరణ తర్వాత.. జమ్మూ లేదా శ్రీనగర్‌లోని నిర్దేశిత కేంద్రాలలో ఈ RFID కార్డు లభిస్తుంది. </p>
<h3>అమర్‌నాథ్ యాత్రకు ఏ మార్గం మంచిది?</h3>
<p>అమర్‌నాథ్ గుహకు చేరుకోవడానికి రెండు మార్గాలు ఉన్నాయి. మొదటిది పహల్గామ్ మార్గం. దీనిని సాంప్రదాయ మార్గంగా పరిగణిస్తారు. ఇది సుమారు 46 నుంచి 48 కిలోమీటర్ల దూరం ఉంటుంది. ఈ ప్రయాణం పూర్తి చేయడానికి 3 నుంచి 5 రోజులు పడుతుంది. అలాగే ఎత్తు క్రమంగా పెరుగుతుంది. మొదటిసారి యాత్ర చేసేవారికి, కుటుంబంతో ప్రయాణించే వారికి ఇది మంచి ఎంపిక. పహల్గామ్ నుంచి చందన్‌వారి వరకు మొదటి 16 కిలోమీటర్ల దూరాన్ని మినీబస్సులో చేరుకోవచ్చు. </p>
<p><strong>Also Read : <a href="https://telugu.abplive.com/lifestyle/char-dham-yatra-2026-details-dates-step-by-step-registration-and-travel-guidelines-235848" target="_blank" rel="noopener">చార్‌ధామ్ యాత్ర 2026.. రిజిస్ట్రేషన్ నుంచి ప్రయాణం వరకు పూర్తి వివరాలు</a></strong></p>
<p>రెండవది బల్తాల్ మార్గం. సమయం తక్కువగా ఉండి.. మీరు శారీరకంగా దృఢంగా ఉంటే.. బల్తాల్ మార్గం ఉత్తమమైనది. దీని దూరం సుమారు 14 కిలోమీటర్లు. ఈ ప్రయాణాన్ని 1 నుంచి 2 రోజులలో పూర్తి చేయవచ్చు. ఈ మార్గం చాలా నిటారుగా ఉంటుంది. శారీరకంగా దృఢంగా ఉన్న యాత్రికులకు ఇది ఉత్తమమైనది.</p>
<h3>అమర్‌నాథ్ యాత్రకు ఎలా చేరుకోవాలి?</h3>
<p>అమర్‌నాథ్ యాత్రకు వెళ్లడానికి.. యాత్రికులు విమానం, రైలు, రోడ్డు రవాణా మార్గాలను ఉపయోగించుకోవచ్చు. విమాన ప్రయాణికులు.. శ్రీనగర్ అంతర్జాతీయ విమానాశ్రయం చేరుకోవచ్చు. బాల్తాల్ సుమారు 62 కిలోమీటర్ల దూరంలో, పహల్గామ్ సుమారు 90 కిలోమీటర్ల దూరంలో ఉంటాయి. </p>
<p>రైలులో ప్రయాణించే యాత్రికులు జమ్మూ తావి, ఉధంపూర్, లేదా బనిహాల్ రైల్వే స్టేషన్లకు చేరుకోవచ్చు. ఆ తర్వాత వారు రోడ్డు మార్గంలో ప్రయాణించాల్సి ఉంటుంది. మీరు జమ్మూ నుంచి రోడ్డు మార్గంలో మీ ప్రయాణాన్ని ప్రారంభిస్తే.. పహల్గామ్ సుమారు 315 కిలోమీటర్ల దూరంలో, బాల్తాల్ సుమారు 400 కిలోమీటర్ల దూరంలో ఉంటాయి. ఇక్కడి నుంచి యాత్రికులు తాము ఎంచుకున్న మార్గం ప్రకారం అమర్‌నాథ్ వెళ్లవచ్చు. </p>
<p><iframe class="vidfyVideo" style="border: 0px;" src="https://telugu.abplive.com/web-stories/spirituality/12-jyotirlinga-names-and-places-in-india-194416" width="631" height="381" scrolling="no"></iframe></p>
4 months ago
9 
