<p>ఆదిలాబాద్: ఈజీ మనీ కోసం అత్యాశతో నకిలీ కరెన్సీ ముఠా మాయలో పడి, ఆ తర్వాత పోగొట్టుకున్న డబ్బును రాబట్టుకునేందుకు కిడ్నాప్‌ చేసిన విచిత్ర ఘటన ఆదిలాబాద్ జిల్లాలో వెలుగుచూసింది. ఈ రెండు కేసుల్లో మొత్తం ఆరుగురు నిందితులను అరెస్ట్ చేసినట్లు ఆదిలాబాద్ డీఎస్పీ ఎల్. జీవన్ రెడ్డి వివరాలు వెల్లడించారు. మహారాష్ట్రకు చెందిన ప్రతీక్ అనే వ్యక్తి ద్వారా కొందరు స్థానికులకు నాగ్‌పూర్‌కు చెందిన నకిలీ కరెన్సీ గ్యాంగ్‌తో పరిచయం ఏర్పడింది. రూ.1 లక్ష ఇస్తే రూ.4 లక్షల నకిలీ కరెన్సీ ఇస్తామని సదరు గ్యాంగ్ నమ్మించడంతో, రూ.5 లక్షలు ఇచ్చి రూ.20 లక్షల నకిలీ కరెన్సీ తీసుకునేందుకు ఒప్పందం చేసుకున్నారు.</p>
<p><strong>పోలీసుల పేరుతో డ్రామా - డబ్బుతో పరారీ</strong></p>
<p>రూ.5 లక్షల పెట్టుబడి కోసం షేక్ షకీబ్ అనే వ్యక్తి నుంచి డబ్బులు తీసుకున్న సురేందర్, అతని అనుచరులు, సెప్టెంబర్ 10న మావల బైపాస్ వద్ద నాగ్‌పూర్ ముఠాకు ఆ నగదును అందజేశారు. అయితే, ముందస్తు ప్లాన్ పథకం ప్రకారం నకిలీ కరెన్సీ ముఠాకు చెందిన మరికొందరు వ్యక్తులు ఉన్నట్టుండి అక్కడ ప్రత్యక్షమయ్యారు. తాము పోలీసులమని బెదిరింపులకు పాల్పడి అసలు రూ.5 లక్షల నగదుతో పాటు నకిలీ నోట్ల బాక్స్‌ను తీసుకుని కార్లలో నాగ్‌పూర్ వైపు పరారయ్యారు. దీంతో తమ డబ్బు పోవడంతో తీవ్ర ఆగ్రహానికి గురైన షేక్ షకీబ్, అతని అనుచరులు, తమ డబ్బును తిరిగి రాబట్టుకునేందుకు సురేందర్, అలోక్, దీపక్‌లను తమ అదుపులోకి తీసుకుని బంధించారు.</p>
<p><br /><img src="https://feeds.abplive.com/onecms/images/uploaded-images/2026/09/15/481568cf813c742b9562271778b31f2f1789475350935233_original.jpg" /></p>
<p><strong>కిడ్నాప్ నాటకం గుట్టురట్టు - ఆరుగురి అరెస్ట్</strong></p>
<p>బంధీగా ఉన్న సురేందర్‌తో అతని భార్యకు ఫోన్ చేయించి, రూ.5 లక్షలు ఇస్తేనే విడుదల చేస్తామని షకీబ్ ముఠా బెదిరింపులకు పాల్పడింది. కిడ్నాపర్ల ఫోన్ కాల్ తో ఆందోళన చెందిన బాధితుడి భార్య మావల పోలీసులు ఫిర్యాదు చేయడంతో కిడ్నాప్ కేసు నమోదు చేసి దర్యాప్తు చేపట్టారు. అలాగే నకిలీ కరెన్సీ వ్యవహారంపైనా మరో కేసు నమోదు చేశారు. సెప్టెంబర్ 13న దస్నాపూర్ పెట్రోల్ బంక్ వద్ద వెహికల్స్ చెకింగ్ చేస్తుండగా అనుమానాస్పదంగా కనిపించిన కారును అదుపులోకి తీసుకుని విచారించడంతో ఈ రెండు కేసుల గుట్టు రట్టయింది. కిడ్నాప్ కేసులో ముగ్గురిని, నకిలీ నోట్ల కేసులో ముగ్గురిని అరెస్ట్ చేసి వారి వద్ద నుంచి కారు, ఐఫోన్, ఇతర మొబైల్ ఫోన్లు, నగదును స్వాధీనం చేసుకున్నారు. పరారీలో ఉన్న నాగ్‌పూర్ గ్యాంగ్ కోసం ప్రత్యేక బృందాలతో గాలిస్తున్నట్లు డీఎస్పీ తెలిపారు.<br /><br /></p>
1 month ago
3 
