<p><strong>Hero Xpulse 210 real world review:</strong> రోడ్లు బాగాలేని ప్రాంతాల్లోనూ సులభంగా దూసుకెళ్లాలి, రోజువారీ అవసరాలకు కూడా ఉపయోగపడాలి, వీకెండ్‌లో ఒక లాంగ్‌ ట్రిప్‌ కొట్టి రావాలి, అప్పుడప్పుడు ఆఫ్ రోడ్‌లోనూ థ్రిల్లింగ్‌ రైడ్‌ ఇవ్వాలి... ఇలాంటి అవసరాలకు సరిపోయే బైక్ కోసం చూస్తున్న వారికి Hero Xpulse 210 ప్రత్యేకమైన ఎంపిక అవుతుంది. దీని ఎక్స్‌-షోరూమ్‌ రేటు రూ.1.65 లక్షల నుంచి రూ.1.74 లక్షల వరకు ఉంది.</p>
<p>ఒక ఎక్స్‌పర్ట్‌ రైడర్‌ ఇచ్చిన రియల్‌ వరల్డ్ రివ్యూను ఇప్పుడు చదవండి: </p>
<p>Hero Xpulse 210 బైక్‌ను రెండు నెలలకు పైగా ఉపయోగించిన తర్వాత దాని ఓడోమీటర్ 5,600 కి.మీ. దాటింది. ఈ ప్రయాణంలో Xpulse 210పై మంచి అభిప్రాయం ఏర్పడింది. అయితే పూర్తిగా ఇబ్బందులు లేవని మాత్రం కాదు.</p>
<p>రోజువారీ ప్రయాణాలకు సౌకర్యం<br />21 అంగుళాల ముందు చక్రం, ఎక్కువ దూరం ప్రయాణానికి అనకూలమైన సస్పెన్షన్ & మంచి రైడింగ్ పొజిషన్ Xpulse 210కు ప్రత్యేక గుర్తింపును ఇస్తాయి. బైక్ మధ్య భాగం సన్నగా ఉండటంతో నగరంలో రద్దీ మధ్య కూడా సులభంగా నడపవచ్చు.</p>
<p>ముఖ్యంగా.. గుంతలు, గోతులు ఎక్కువగా ఉన్న రోడ్లపై దీని సస్పెన్షన్ అద్భుతంగా పనిచేస్తుంది. రోడ్డుపై ఎదురయ్యే చాలా గోతులను పెద్దగా వేగం తగ్గించకుండానే దాటేయవచ్చు. దీంతో, నగరంలో ఇబ్బంది పెట్టే కొన్ని రోడ్లపై కూడా ఇప్పుడు మీరు ఎంచుకోవచ్చు.</p>
<p>ఇది కూడా చదవండి: <a title="పదివేలు చేతిలో ఉంటే ఈ బైక్‌లు సొంతం చేసుకోవచ్చు! పూర్తి EMI లెక్కలు ఇవే!" href="https://telugu.abplive.com/auto/ten-thousand-down-payment-bike-loan-emi-gig-workers-255800" target="_self">పదివేలు చేతిలో ఉంటే ఈ బైక్‌లు సొంతం చేసుకోవచ్చు! పూర్తి EMI లెక్కలు ఇవే!</a></p>
<p>ఎత్తుగా ఉండే LED హెడ్‌లైట్, ఆకర్షణీయమైన ఇంధన ట్యాంక్ & తక్కువ ఎత్తులో ఉన్న సీటు బైక్‌కు ప్రత్యేకమైన రూపాన్ని ఇస్తాయి. 21 అంగుళాల ముందు చక్రం & ముందు భాగంలోని బీక్ డిజైన్ ఈ బండికి మరింత దూకుడైన రూపాన్ని అందిస్తాయి.</p>
<p>ఆఫ్ రోడ్‌లోనూ సత్తా<br />ఈ ధర పరిధిలో రోజువారీ ప్రయాణం, టూరింగ్ & నిజమైన ఆఫ్ రోడ్ సామర్థ్యాన్ని ఇంత సమతూకంగా అందించే బైక్‌లు చాలా తక్కువ. మరో రూ.30,000 నుంచి రూ.40,000 వరకు ఖర్చు చేస్తే TVS Apache RTX వంటి మరింత టూరింగ్ అడ్వెంచర్ బైక్‌లు వస్తాయి. అయితే Xpulse 210 మాత్రం తన డ్యూయల్ స్పోర్ట్ స్వభావం ప్రత్యేకంగా నిలుస్తుంది.</p>
<p>టైర్లు ఇబ్బంది పెట్టాయి<br />అయితే, ఈ బండికి ట్యూబ్‌లెస్ టైర్లు లేకపోవడం రోజువారీ వినియోగంలో పెద్ద లోపంగా అనిపించింది. ఆఫ్ రోడ్ ప్రయాణాలకు ట్యూబ్డ్‌ టైర్లు ఉపయోగకరమే. కానీ సాధారణ ప్రయాణాల్లో పంక్చర్ అయితే సమయం ఎక్కువగా పడుతుంది.</p>
<p>ఒకే రోజు ముందు & వెనుక టైర్లు రెండూ పంక్చర్ కావడంతో ఈ సమస్య తీవ్రంగా అనిపించింది. బైక్‌ను పంక్చర్ షాపులకు తీసుకెళ్లడం, చక్రాలు తొలగించడం, మళ్లీ అమర్చడం వంటి పనులకు మూడు గంటలకు పైగా సమయం పట్టింది.</p>
<p>బ్రేకులపై ఇంకా అసంతృప్తే<br />బ్రేకులు కూడా పూర్తిగా సంతృప్తినివ్వలేదు. బ్రేకింగ్ సమయంలో తగినంత పట్టు & ఫీల్ లేదనే సమస్య గతంలోనే కనిపించింది. సర్వీస్ సెంటర్‌లో బ్రేకులను బ్లీడ్ చేశారు. బ్రేక్ ప్యాడ్లను మార్చాల్సిన అవసరం లేదని చెప్పారు. అయినప్పటికీ మెరుగుదల స్వల్పంగానే కనిపించింది.</p>
<p>అదే సర్వీస్ సమయంలో, తన ఎడమ కాలికి ఎక్కువ వేడి తగులుతున్న విషయాన్ని కూడా రైడర్ ఆ షోరూమ్‌ సిబ్బంది దృష్టికి తీసుకెళ్లారు. అయితే దీనిపై సరైన వివరణ లభించలేదు.</p>
<p>ఇది కూడా చదవండి: <a title="లక్ష రూపాయలకే E3 Trion ఎలక్ట్రిక్ స్కూటర్.. 82km స్పీడ్‌, 165km రేంజ్‌, AI ఫీచర్లు" href="https://telugu.abplive.com/auto/e3-trion-electric-scooter-price-range-features-explained-in-telugu-255702" target="_self">లక్ష రూపాయలకే E3 Trion ఎలక్ట్రిక్ స్కూటర్.. 82km స్పీడ్‌, 165km రేంజ్‌, AI ఫీచర్లు</a></p>
<p>సైడ్ స్టాండ్ విషయంలోనూ జాగ్రత్త అవసరం. బైక్ సైడ్ స్టాండ్‌పై ఎక్కువగా ఒకవైపు వాలినట్లు కనిపిస్తుంది. సస్పెన్షన్ మెత్తగా ఉండటంతో బైక్ నుంచి దిగిన తర్వాత అది కొద్దిగా కూర్చున్నట్లు మారుతుంది. దీంతో పార్కింగ్ సమయంలో కొంత అసౌకర్యంగా అనిపిస్తుంది.</p>
<p>సర్వీస్ ఖర్చు మాత్రం సహేతుకం<br />Hero ప్రీమియా డీలర్‌షిప్ నెట్‌వర్క్ ద్వారా అమ్మే బైక్ కావడంతో సర్వీస్ సెంటర్ అనుభవం & వాతావరణంలో ఇంకా మెరుగుదలకు అవకాశం ఉంది. అయితే సర్వీస్ ఖర్చు మాత్రం పెద్దగా భారంగా లేదు. మొత్తం సర్వీస్ ఖర్చు రూ.2,214. ఇందులో ఇంజిన్ ఆయిల్‌కు రూ.1,300, ఎయిర్ ఫిల్టర్‌కు రూ.145 & సర్వీస్ ఛార్జీగా రూ.649 చెల్లించారు.</p>
<p>మొత్తంగా చూస్తే కొన్ని లోపాలు ఉన్నప్పటికీ Xpulse 210 ఆకట్టుకునే బైక్‌గానే నిలుస్తుంది. రోజువారీ ప్రయాణాలు, టూరింగ్ & ఆఫ్ రోడ్ రైడింగ్‌ను ఒకే బైక్‌లో ఆస్వాదించాలనుకునే వారికి ఇది మంచి ఎంపిక.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
2 months ago
6 
