<p><strong>World's Longest Limousine The American Dream:</strong> స్విమ్మింగ్ పూల్, హెలిప్యాడ్, గోల్ఫ్ కోర్స్ వంటి అన్నీ ఉన్న కారు గురించి మీరు ఎప్పుడైనా విన్నారా?. అది కలలా లేదా సైన్స్‌ ఫిక్షన్‌ సినిమాలా అనిపించవచ్చు. కానీ అలాంటి కారు నిజంగానే ఉంది. ఒక హెలికాప్టర్ కూడా దానిపై దిగగలదు. 100 అడుగుల పొడవున్న ఈ లగ్జరీ కారు ప్రపంచంలోనే అతి పొడవైన కారు. ఇది అందరినీ ఆశ్చర్యపరుస్తోంది & అభినందనలు అందుకుటుంటోంది.</p>
<p><strong>ప్రపంచంలోనే అతి పొడవైన కారు</strong><br />'ది అమెరికన్ డ్రీమ్' (The American Dream) ప్రపంచంలోనే అతి పొడవైన కారుగా గిన్నిస్ బుక్ ఆఫ్ వరల్డ్ రికార్డ్స్‌లో చోటు సంపాదించుకుంది. దీని పొడవు 100 అడుగుల 1.5 అంగుళాలు (సుమారు 30.5 మీటర్లు). వాస్తవానికి దీనిని కారు అనకూడదు, లిమోజిన్‌ (Limousine) అని పిలవాలి. ఈ అద్భుతమైన లిమోజిన్‌ను ఇప్పుడు కాదు, 1986లోనే రూపొందించారు. ప్రఖ్యాత కాలిఫోర్నియా కార్ డిజైనర్ జే ఓర్‌బర్గ్ దీనిని డిజైన్‌ చేశారు. ప్రారంభంలో, దీని పొడవు 60 అడుగులుగా ఉండేది. ఆ తరువాత దానిని 100 అడుగులకు పెంచారు, నేరుగా గిన్నిస్ బుక్ ఆఫ్ రికార్డ్స్‌లోకి ఎక్కించారు. నేడు, ఈ కారు USA ఫ్లోరిడాలోని ఓర్లాండోలో ఉన్న ఒక ఆటో మ్యూజియంలో ప్రదర్శనకు ఉంచారు. ఇది ప్రపంచవ్యాప్తంగా ఉన్న పర్యాటకులకు ఆకర్షణ కేంద్రంగా మారింది.</p>
<p><strong>డిజైన్ & ఇంజినీరింగ్</strong><br />అమెరికన్ డ్రీమ్ కారు డిజైన్.. లగ్జరీ & ఇంజినీరింగ్‌ అద్భుతమైన కలయికను ప్రదర్శిస్తుంది. ఈ కారుకు 26 టైర్లను బిగించారు. రైలు తరహాలో, ఈ కారుకు రెండు V8 ఇంజిన్లను (ముందు భాగంలో ఒకటి & వెనుక భాగంలో ఒకటి) ఏర్పాటు చేశారు, ఈ ఇంజిన్‌లు ఈ భారీ కారును నడిపించే శక్తినిస్తాయి. ఈ ప్రత్యేకమైన సెటప్ వల్లే ఈ కారు అపారమైన పొడవు & బరువును మ్యానేజ్‌ చేయాడానికి వీలైంది. దీనిని సూపర్ లిమోజిన్ అనే కంటే "చక్రాలపై రాజభవనం" అని కూడా చెప్పవచ్చు. ఇది చాలా పెద్దది కాబట్టి ఒక్క చూపులో పూర్తిగా చూడటం దాదాపు కష్టం. </p>
<p><strong>హెలిప్యాడ్, జాకుజీ & స్విమ్మింగ్ పూల్</strong><br />అమెరికన్ డ్రీమ్ కారు ఒక లగ్జరీ హోటల్ లేదా రిసార్ట్ లాంటి ప్రత్యేకతలను కలిగి ఉంది. ఈ కారులో స్విమ్మింగ్ పూల్ & డైవింగ్ బోర్డ్, జాకుజీ (అడుగు నుంచి నీళ్లను పైకి ఎగదోసే నీటి తొట్టె), మినీ గోల్ఫ్ కోర్సు, వాటర్ బెడ్, రిఫ్రిజిరేటర్, టీవీ & టెలిఫోన్ వంటి విలాసవంతమైన సౌకర్యాలు ఉన్నాయి. అంతేకాదు, 5,000 పౌండ్ల బరువు ఉన్న హెలికాప్టర్‌ను ల్యాండ్ చేయగల హెలిప్యాడ్‌ను కూడా దీనిపై ఉంది. ఈ లక్షణాలన్నింటి వల్ల ఈ కారును కేవలం వాహనంగా మాత్రమే చూడలేము, ఇది అంతకంటే ఎక్కువ. "ప్రయాణించే లగ్జరీ రిసార్ట్‌"గా కూడా పిలవవచ్చు.</p>
<p><strong>75 మంది ప్రయాణీకులకు సరిపడా స్థలం</strong><br />అమెరికన్ డ్రీం పొడవైనది మాత్రమే కాదు, చాలా విశాలమైనది కూడా. ఇది ఒకేసారి 75 మందికి పైగా ప్రయాణీకులను ఇది తీసుకెళ్లగలదు. దీని లోపలి భాగం మెరిసే ఫ్లోరింగ్, మెత్తటి సోఫాలు & బంగారు రంగు ఫినిషింగ్‌తో రాయల్ కారిడార్ ఉంటాయి. దీనివల్ల ఈ కారులో అడుగు పెడితే రాజభవనం లోకి వెళ్లినట్లు అనిపిస్తుంది. ఈ కారును కొన్ని విభాగాలుగా విభజించారు. ప్రతి విభాగంలో వాతావరణ నియంత్రణ, వెనక్కు వాలే సీట్లు & మినీబార్ వంటి సౌకర్యాలు ఉన్నాయి. ఈ కారును పెద్ద ఈవెంట్‌లు, వివాహ వేడుకలు & హాలీవుడ్ చిత్రాల కోసం ఉపయోగించారు.</p>
1 month ago
2 
