<p><strong>RC Hypothecation Removal:</strong> మీరు బ్యాంక్‌ లేదా ఫైనాన్స్ కంపెనీ నుంచి లోన్ తీసుకుని స్కూటర్‌, బైక్‌, కారు లేదా మరేదైనా వెహికల్‌ కొనుగోలు చేశారా? ఆ లోన్ మొత్తాన్ని పూర్తిగా చెల్లించేశారా? అయితే మీకో ముఖ్యమైన శుభవార్త. ఇకపై, మీ బండి రిజిస్ట్రేషన్‌ సర్టిఫికెట్‌ (RC)లో హైపోతికేషన్ తొలగించేందుకు RTO ఆఫీసుకు వెళ్లాల్సిన అవసరం ఉండదు. కేంద్ర ప్రభుత్వం ఈ ప్రక్రియను సులభతరం చేసింది. ఇప్పుడు వాహన్ పోర్టల్‌ ద్వారా ఆన్‌లైన్‌లోనే హైపోతికేషన్ టెర్మినేషన్ (Hypothecation Termination In RC) పూర్తి చేయవచ్చు. </p>
<p><strong>హైపోతికేషన్ అంటే ఏమిటి? </strong></p>
<p>మీరు లోన్‌పై వాహనం కొనుగోలు చేసినప్పుడు, మీ RC కార్డులో బ్యాంక్‌ లేదా ఫైనాన్స్ సంస్థ పేరు ఉంటుంది. ఇది, ఆ వాహనం రుణ తాకట్టులో ఉందని సూచిస్తుంది. మీరు లోన్ మొత్తం చెల్లించిన తర్వాత కూడా ఆ వివరాలు RCలో అలాగే ఉంటాయి. అందుకే వాటిని అధికారికంగా తొలగించాలి. ఈ ప్రక్రియనే హైపోతికేషన్ టెర్మినేషన్ అంటారు.</p>
<p><strong>ఎందుకు ఇది అవసరం?</strong></p>
<p>మీరు వాహనాన్ని అమ్మాలనుకుంటే, ఓనర్‌షిప్ మార్చాలనుకుంటే లేదా RCలో పూర్తి హక్కులు మీ పేరుపైనే ఉండాలంటే హైపోతికేషన్ తొలగింపు తప్పనిసరి. ఇది చేయకపోతే భవిష్యత్తులో సమస్యలు తలెత్తే అవకాశం ఉంటుంది.</p>
<p><strong>అవసరమైన పత్రాలు</strong></p>
<p>హైపొతికేషన్ టెర్మినేషన్ కోసం ఈ డాక్యుమెంట్లు సిద్ధంగా ఉంచుకోవాలి:</p>
<p>బ్యాంక్‌ లేదా ఫైనాన్స్ కంపెనీ నుంచి నో అబ్జెక్షన్ సర్టిఫికెట్ (NOC)</p>
<p>RTO ఫారం 35</p>
<p>ఒరిజినల్ RC</p>
<p>చెల్లుబాటు అయ్యే ఇన్సూరెన్స్ సర్టిఫికెట్</p>
<p><strong>ఆన్‌లైన్‌లో ఎలా చేయాలి?</strong></p>
<p>ముందుగా vahan.parivahan.gov.in వెబ్‌సైట్‌లో లాగిన్ అవ్వాలి.</p>
<p>“Online Services”లో “Vehicle Related Services” ఎంచుకోవాలి.</p>
<p>మీ వెహికల్‌ రిజిస్ట్రేషన్ నంబర్‌, ఛాసిస్ నంబర్ నమోదు చేసి OTP పొందాలి.</p>
<p>మీ మొబైల్‌కు వచ్చిన OTP నమోదు చేసి లాగిన్ కావాలి.</p>
<p>“Hypothecation Termination” ఎంపిక చేసి కొనసాగాలి.</p>
<p>అవసరమైన డాక్యుమెంట్లు DMS ద్వారా అప్‌లోడ్ చేయాలి.</p>
<p>ఫీజు చెల్లించి సబ్మిట్ చేయాలి.</p>
<p>ప్రాసెస్ పూర్తయిన తర్వాత మీ అప్లికేషన్ RTOలో పరిశీలనకు వెళ్తుంది. అధికారుల ఆమోదం తర్వాత RCలో హైపోతికేషన్ తొలగింపు జరుగుతుంది.</p>
<p><strong>కొన్ని రాష్ట్రాల్లో ఈ పద్ధతి లేదు</strong></p>
<p>కొన్ని రాష్ట్రాల్లో, ఆన్‌లైన్‌లో అప్లై చేసిన తర్వాత కూడా ఫారం 35, ఇతర అవసరమైన పత్రాలను RTOకి తీసుకువెళ్లి సమర్పించాల్సి ఉంటుంది. అందుకే మీ రాష్ట్రంలో అమల్లో ఉన్న నియమాలు ముందుగా తెలుసుకోవడం మంచిది.</p>
<p>లోన్ పూర్తిగా చెల్లించిన తర్వాత RCలో హైపోతికేషన్ తొలగించుకోవడం చాలా ముఖ్యం. ఆన్‌లైన్ సదుపాయం వల్ల సమయం, శ్రమ రెండూ ఆదా అవుతాయి. మీరు లోన్ క్లోజ్ చేసిన వెంటనే ఈ ప్రక్రియ పూర్తి చేసి మీ వాహనంపై పూర్తి హక్కులు మీ పేరుపైనే ఉండేలా చూసుకోండి, భవిష్యత్తులో ఎలాంటి ఇబ్బందులు రాకుండా ముందే జాగ్రత్త పడండి.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
2 months ago
7 
